Poke Go：健康「Bowl」仔飯

大概年多前晌「D2 Place」第一次接觸夏威夷蓋飯（Poke Bowl）呢樣嘢，又多食材混埋一齊，又健康，最緊要夾到，又好食嘛。今日過到嚟鴨寮街睇嘢，順便落埋大南街試吓啲咖啡店，就喺咁啱見到有家主打夏威夷蓋飯嘅「Poke Go」，就喺咁改咗食夏威夷蓋飯為晚餐，健康多一晚咁。

其實，晌門面已睇得出餐廳嘅裝修已下過功夫，以木系為主，甚至餐具都用咗啲木材，餐碗更喺全木造嘅，樓底高，空間感足；而牆上有好多彩繪，都喺人手一筆一筆咁畫，有一幅喺超得意嘅三文魚公仔，色彩鮮明，另外有啲喺以森林中嘅花花草草、雀鳥為主題，小清新得嚟又添啲活力。

枱上或其他位置又有唔少三文魚公仔、貝殼公仔、海星公仔……等等嘅小擺設，都幾得意。

蓋飯選擇方面，有5款指定款式，由飯底、主食材、配料、醬汁、調味都已經設計好晒，喺懶人包之選，定價為$98-$108，餐廳唔收加一。

但如果想揀啲自己最想食、最心水嘅配搭，亦可以自由選料嚟製作出心水蓋飯，詳細就唔講，識食車仔麵嘅香港人都應該睇得明點玩法。此外，仲有啲小食，人多嚟就可以點一、兩款共享，小弟得一支公，就食唔到咁多嘢；而飲品方面，都喺健康嘢居多，熱嘅有唔少花果茶款式，凍嘅就有冷壓果沙、鮮果特飲。

紅火龍果汁 $38

雖然紅火龍果汁依家都好普及，但紅火龍果比較少食，紅火龍果汁印象中都未飲過。以新鮮紅火龍果汁打成，無添加，自然既健康，又有益，當然紅火龍果本身唔喺咩味道濃重之物，所以，入口感覺喺比較清爽，質感好綿密，仲食到粒粒紅火龍果籽，可謂真材實料，據講就有助腸胃消化；而杯面嘅紅火龍果片喺自家風乾，入口煙煙韌韌，非常清甜，絕對唔止裝飾咁簡單。

自選夏威夷蓋飯 $108

主食材選上雜菌香菇（$78），嚟得呢度梗喺想食健康啲，飯底就要咗珍珠糙飯配沙律菜，配料就揀咗酸蘿蔔、櫻桃蕃茄、蟹籽，跟住配菜就要牛油果、鮮蟹肉（每款$12），然後醬汁就要最心水嘅蜜糖芥末醬，最後調味就選擇果仁、木魚絲、紫菜絲、黑白芝麻。堆吓堆吓堆到一大碗，加上色彩繽紛，食材多元，都咪話唔震撼。

食嘅時候都有少少技巧，都唔可以一次過撈勻嚟食，慢慢食咗面層啲餸料先，然後，又食咁少少沙律菜，跟住先撈得勻嚟食。啲珍珠糙飯OK喎，唔會太硬，而沙律菜就十分新鮮爽脆；雜菌香菇、牛油果、鮮蟹肉都好正，香菇好爽口，牛油果口感柔滑，鮮蟹肉落得一啲無手緊，鹹鮮好味；佐以酸蘿蔔，味道酸爽，櫻桃蕃茄又好清甜爆汁，蟹籽呀、木魚絲呀、紫菜絲呀、黑芝麻就令到味道變得紛陳。仲有，裝飾用嘅蓮藕片亦炸得好香脆，附上半隻青檸，唧落嘅汁亦令味道更酸香清爽。唯一個挑剔位喺，酸蘿蔔落得比較多，所以，陣酸香味冚咗蜜糖芥末醬嘅香味啫。

依家越嚟越多人食嘢講求健康，所以，無怪乎夏威夷蓋飯都有咁多人嚟幫襯，雖然，入夜之後大南街都幾靜，但「Poke Go」都擠得水洩不通咁滯。

個人評分
味道：8/10
環境：8/10
服務：8/10
抵食：8/10
平均每人消費：HK$140

餐廳資料：
Poke Go
深水埗大南街211號地舖
3563 8137