九姑娘 Jiu Gu Niang：「九」負盛名

舊同學小聚，最方便大家嘅都喺約返尖沙咀區，老友就介紹呢間樓上個性小店「九姑娘」，一來 有特色，二來好近地鐵站出口，今晚就晚飯話當年。

雖然位處嘅大廈比較舊，但一出電梯，感覺完全唔同晒，由門口到室內，裝修都好有濃厚嘅中國風，古雅而不俗氣，每吋地方、每件擺設都好有心思，例如接待處嘅大屏風、木鼓、天花嘅吊燈。

而小弟最欣賞嘅係四邊嘅壁畫，望真啲，全人手手繪，絕對稱得上喺藝術品。

此外，仲有兩間廂房，大嘅有客人用緊餐，細嘅可以影張相留紀錄。問過店家，細房最低消費大概$2,500，大房就大概$3,500，對比出面好多酒樓，呢個價真喺唔貴。

雖然散點菜式有好多選擇，不過，最划算都喺呢個「精選烤鴨套餐（二人套餐）」，原價賣 $468，依家$398就可以，而且，份量十足，我哋加多個甜品就夠晒3人食。如果大食啲嘅頂多加碟炒粉飯麵。補充一句，茗茶$12位，除慣常嘅普洱、香片之類，可以麥茶，而且，侍應阿姐招呼熨貼，又好禮貌。

手拍青瓜

本來餐牌喺寫涼拌豬耳，但啱啱賣晒，手拍青瓜都啱我哋，當喺補充多啲纖維素，青瓜口感爽脆，充滿蒜香。

雞絲粉皮

雞絲撕得幼細，手工嘢，淋滿胡麻醬，並加入青瓜絲，所以食落去既有爽口感，又有嫩滑感，而下面嘅粉皮質感又好軟滑。

京味酸辣湯

平常飲酸辣湯都喺上海版本，今回喺北京版，相比而言，辣度比較強啲，但仍帶一股股酸香感，加上湯內材料多，味道確喺唔失禮。

北京烤鴨（半隻）

唔好睇話半隻，其實對兩人嚟講份量都幾多，食晒可能會覺得有啲「漏」，但3到4個人共享我就覺得喺啱啱好。幾片鴨肉，加上青瓜條、京蔥、甜鴨醬，趁餅皮熱焫焫捲起嚟一啖入口，餅皮軟熟，既充滿油香，又帶有清爽感，甜甜哋，味道豐富，口感多元化。

涼瓜炒鴨骨

雖然話炒鴨骨，但食落都有唔少肉，而且，炒得好惹味，用嚟拌飯好錯，加埋啲涼瓜苦苦哋、甘甘哋，唔錯唔錯！

乾煸四季豆
呢道菜亦喺好餸飯嘅菜式，四季豆煸得乾身，又唔太油，肉碎炒得香口，鹹香惹味，而且，鑊氣十足。

北京水餃

自家手工製，外皮厚薄均一，口感極好，裡面嘅豬肉口感鬆化，飽滿多汁，味道算得上鮮甜，沾上醋，更有風味。

高力豆沙 $88

套餐無包甜點，所以，加多一客高力豆沙，一客6個，剛好夠分。每個都做得漲卜卜，外層灑滿糖霜，一口咬落去，外皮軟綿，內面放有唔少豆沙餡，清甜不膩。

講明聚舊，成晚嘅話題特別多，有懷緬，有向前，但願友情長長久久。

個人評分
味道：8/10
環境：9/10
服務：9/10
抵食：8/10
平均每人消費：HK$190

餐廳資料：
九姑娘 Jiu Gu Niang
地址：尖沙咀堪富利士道11號堪富利士大廈2樓
電話：2766 0566