香港都有不少主題餐廳，而以英超球隊嘅，其實唔多，而「Lockeroom」就打正旗號喺撐英超阿仙奴，所以，由出電梯至室內任何一個角落，裝修、擺設都同「兵工廠」有關，最搞鬼喺連地下都鋪成好似球場咁，踩落去似喺人造草場啲地，喺差咗啲邊線、禁區線無畫埋出嚟。
唔單止有簽咗名嘅球衣，晌餐廳一角，仲直情整咗個有紀念品櫃，當然，個英超獎杯就肯定喺仿製品啦。
枱上嘅餐具擺得好整齊，絕對唔兒戲，主餐牌就無刻意影，因為，嚟之前都睇過人家嘅食評，都喺打算叫晚餐，因為非常划算。
晚餐已包沙律、餐湯、麵包、主茶及餐飲，主菜選擇十分之多，由A - R共18款，定價由$138-$268，可謂豐儉由人。而且，可以加錢配紅白餐酒，亦可以以6折優惠點選主餐牌內嘅甜點。
田園沙律 不得不讚其心思，沙律以密封玻璃樽奉上，好處喺一來予人感覺非常衛生乾淨，二來就喺一早預備好晒，減省好多製作時間。打開樽蓋，睇到除有沙律菜，仲有車厘茄、烤南瓜同藜麥，並附上黑醋，隨個人喜好自由添加。啲沙律菜好爽脆，烤南瓜好好味，藜麥就唔使講，夠晒健康，仲有，啲黑醋應該處理話過，杰身得嚟仲好醇厚，唔會只得個酸字，更有點甜味。
南瓜甘筍湯、蒜香牛油法包 雖然，餐湯嘅外貌平淡咗，當然加少少忌廉劃啲花就會靚仔好多，但絕對喺做得有水準，睇見湯面咁平滑，入口口感柔滑細緻，南瓜及甘筍味都幾平衡，而且，味道確喺濃郁清甜。個餐包寫就寫法包，但食落好軟熟，口感似厚身嘅排包，兼且充滿蒜香同牛油香，估唔到咁正！如果有添食嘅話，就實打孖食多兩件。
香煎海鱸魚柳意式鮮蕃茄莎莎 $188 因為老婆偏素，所以晌眾多主菜當中，佢較為心水喺啲海鮮類，故此，縮窄範圍就揀咗海鱸魚柳。整體賣相唔錯，有兩大件魚柳，仲睇得到外樣煎得勁香脆，並伴有薯菜。的確，入口外皮甘香脆口，魚肉卻細滑非常，更喺頗有魚味，配以鮮蕃茄莎莎，多添一份新鮮、酸爽感。
香烤澳洲羊架拼德國腸 $208 其實，十多款主菜，睇見都心郁郁，真喺有好多款都想試，但講到最偏好，都喺揀番羊架，始終，出去食啲晚餐，雞牛豬通常都有，但就唔喺間間都會提供羊肉類，再拼上德國腸，感覺就更加唔單一啦。
先講啲羊架，要咗5成熟，都真喺啱啱好，外層少少微焦，切出嚟肉心仲喺嫩紅，入口口感極之軟腍，又富肉汁；由於邊位都有幾多膏，故羊羶味都比較重，啱我囉！而德國腸睇餐牌嘅英文喺Bratwurst（巴雷特香腸），上網睇睇喺以小牛肉、牛肉或豬肉製成，腸衣好脆，質感好挺，煎封之後確喺幾好食。
兩份主菜都哋伴薯菜，不過，此薯菜就有別一般貨色，薯喺指蕃薯，仲喺「雞蛋黃」，打成蕃薯蓉，軟滑得嚟帶點纖維感，而且，蕃薯味極濃；菜喺炒過嘅羽衣甘藍，做沙律生食嘅多，炒熟都喺第一次，感覺又幾好，仲有扒蕃茄添，睇得出喺誠意嘅出品。
即磨咖啡、熱檸水 我哋都喺揀番啲基本選擇，但如果想飲其他飲品，如特別咖啡、果汁、梳打……之類，有半價優惠。而講到佢哋嘅即磨咖啡，相信喺啲靚豆嚟，確喺好芳香，入口醇和，帶點果仁嘅香氣。熱檸水雖然喺普通嘢，不過，小弟早前晌街市買咗啲有問題嘅檸檬，未篤，就咁浸熱水都有好大陣澀味。
因為叫晚餐，點甜品有6折優惠，所以，都選咗一款嚟共享。甜品餐牌，就有6款，有足球公仔都喺推介，不過，投老婆所好，就揀咗特濃朱古力蛋糕。
上文都講過佢哋晌裝修、擺設上都好呼應餐廳主題，依家食甜品，換上新碟，都喺跟足球有關，一隻喺足球圖案，一隻喺球隊圖案，非常得意。
特濃朱古力蛋糕 $68 整份甜品嘅賣相唔算好花巧，都喺做番足基本功，唧啲朱古力漿，灑上糖霜。然後，件朱古力蛋糕頗為吸引，橫看有3層，由下而上，分別有消化餅做嘅餅底、夾雜脆片嘅朱古力層、濃厚嘅軟朱古力層。最上層嘅軟朱古力味道好豐厚，朱古力味超濃郁，不失特濃嘅風味，而口感挺身卻喺微軟，中層因為加咗啲脆片，豐富咗口感，變得更具層次。
以往去啲主題餐廳，好多時有姿勢，無實際，即喺花臣嘢多，但食物做得好一般，然而，今趟到訪「Lockeroom」，由沙律、餐湯到主菜、甜品，都比預期好，亦食得出製作有誠意！服務亦好熨貼，例如，主菜會做到同步上菜，又會上甜品時換上新餐碟，更不時添水……等等，店員亦好有禮貌。
個人評分
味道：9 /10
環境：8 /10
服務：8 /10
抵食：8 /10
平均每人消費：HK$240
味道：9 /10
環境：8 /10
服務：8 /10
抵食：8 /10
平均每人消費：HK$240
餐廳資料：
Lockeroom Dining
油麻地彌敦道558-560號譽發廣場8樓
5236 8680
Lockeroom Dining
油麻地彌敦道558-560號譽發廣場8樓
5236 8680
沒有留言:
發佈留言