好到底水餃雲吞麵：麵食夠「底」氣

又趁住周末放晴，同老友踩番轉單車，由上水踩去元朗，再食餐晏先回程。今次踩遠少少，踩到去朗屏一帶，食太飽會踩得無咁舒服，所以，通常會揀食粉麵，就想起位於「安寧路」嘅老字號麵家「好到底」。

地方細細，裝修簡樸，格局好街坊，勝在乾淨企理，左右兩排喺卡位，就當然揀卡位，好坐啲。

留一留記錄又好，俾大家做參考又好，慣例都會影一影餐牌。大類分為湯麵類、撈麵類、懷舊類、小食類及一啲港式飲品。主餐牌背面仲羅列咗一埋人氣熱賣，無心水嘅可以晌呢度落手。

水餃牛腩幼麵 $60

店名加咗「水餃、雲吞」，心想應該喺招牌嘢，所以，老友就點咗水餃牛腩麵，佢話水餃正所謂皮薄餡靚，隻隻飽滿，塞滿豬肉、蝦仁、木耳……等等，牛腩等陣由我分享，但好肯定餸料非常足，而麵條好爽口。

雲吞牛腩粗麵 $53

小弟就選雲吞搭牛腩配粗麵，睇相就睇唔出，足足有成4粒雲吞，加埋啲牛腩真喺好足秤，而雲吞包得扎實，食落就知真材實料，而牛腩咬落都好鬆化，甚具肉香，又帶點點油脂香，湯頭濃而不濁，好夠鮮味，加上腩汁，正！

炸鯪魚球 $45
見炸鯪魚球喺人氣熱賣，追加多一客，新鮮炸起，咬落熱焫焫，口感爽彈，鯪魚味濃，沾一點點蜆蚧，獨特嘅鹹香味一湧而出。

凍咖啡 +$10、凍檸樂 +$12

飲品有加配，加上天口熱，當然大家都要杯凍飲嚟解吓渴。今趟揀凍咖啡，都喺傳統港式嘅口味，入口都幾濃厚，而凍檸樂只要啲檸檬品質唔差得去邊，理應都收貨。

食完碗麵，飲咗杯凍飲，又攤抖咗一陣，啲力氣返晒嚟，下午繼續上路，回程向上水進發。

個人評分
味道：9/10
環境：8/10
服務：8/10
抵食：8/10
平均每人消費：HK$90

好到底水餃雲吞麵
地址：元朗元朗安寧路67號福安樓地舖
電話：6744 3331