唯港薈好多年前嚟過出席啲活動，但酒店內嘅餐廳就未幫襯過，而今次食下午茶嘅「GREEN」當然喺第一次到訪。踏入酒店大堂，就見到餐廳位置，第一個嘅感覺喺非常舒服，一來樓底特高，二來枱椅嘅編排好闊落，空間感超強，再者，一邊牆上嘅植物牆，一邊落地大玻璃，都喺環境上嘅亮點之一。
我哋就被安排坐晌一組半圓嘅梳化椅，攤住個人真喺好寫意。加上之後有少少夕陽射入嚟，幾好氣氛架。
除咗有多張梳化椅配茶几枱之外，靠牆一邊仲有啲正規餐枱，因為呢度除下午茶之外，都提供一啲正規嘅西式餐飲，如意大利麵、漢堡……等等，以及4道菜晚餐。
枱上早已擺放好餐具、餐巾及餐墊，但夠膽用上純白色，絕對喺對自家衛生極有信心嘅表現。再者，酒店幾時都喺對衛生比較着緊，所以，除有消毒紙巾，亦提供口罩袋俾客人。
餐枱上放咗張「唱片」，其實就喺今日嘅餐牌嚟，非常有心思。每日2:45pm-4:45pm及4:45pm-6:45pm供應，平日每位HK$408，兩位用就HK$748元，而星期六、日及公眾假期每位HK$438，兩位用HK$788，但每位客人就會額外贈送法國氣泡酒一杯。整份下午茶包咗5款鹹點、5款甜點及英式傳統鬆餅，仲有一個亮點，就喺無限量供應Godiva軟雪糕同士多啤梨朱古力，咁豐富，當正餐都不為過啦。
法國氣泡酒 晌出面嘅餅櫃之上，放上一排排嘅香檳酒杯，彷如嚴陣以待。雖然，無刻意去留意氣泡酒喺咩品牌，因為小弟又唔算好嗜酒，小酌一、兩杯都可以，但酒色金黃清澈，氣泡幼細，好易入口之餘，酒精度又唔太高，再者，小弟就較喜歡白酒多過紅酒，感覺幾唔錯。
有張黑膠「唱片」，自然要有部黑膠嘅唱機啦，所有鹹甜點就喺放晒晌一部唱機呈上，當睇見實物，型到咁，仲唔嘩嘩聲咩。唔喺得個樣，每個細節位都做到一絲不苟，而且，個唱盤真喺可以轉，真喺未食先興奮。
朱古力脆皮鴨肝慕絲伴黑魚子雖然，菜式名已寫晒出嚟，但唔篤開就真喺唔知咩嚟，外面一層白朱古力脆皮，裡面就喺非常幼滑、味道甘腴嘅鴨肝慕絲，再配上少少矜貴鹹香嘅黑魚子，令整體味道好多變化，非常有趣。
Impossible™他他睇見「Impossible」就知喺以植物肉製作嘅鹹點，食落確喺幾有真肉嘅質感同味道，配以嘉拿餅、青瓜片、車厘茄，入口好清爽。
煙三文魚伴三文魚子5款鹹點中，以呢一款感覺比較普通啲，大抵因為香港人都經常食三文魚，不過，啲挪威煙三文魚本身質素幾好，十分油潤，帶微微煙燻香，而三文魚子一咬開，嗰陣陣鹹鮮味湧晒出嚟。
甜蝦血色瑪莉以雞尾酒杯盛載喺有兩款鹹點：甜蝦及辣肉腸橄欖串。先講甜蝦，蝦隻鮮味十足，爽口彈牙，而個咯嗲汁加咗少少馬天尼，沾上少少醬汁，令蝦鮮味更為突出。
辣肉腸橄欖串再試試個辣肉腸串，以西班牙嘅辣肉腸嚟做，辣肉腸入口煙煙韌韌，極有咬口，滲出微微辣味，帶點刺激，而伴有青椒、紅椒及青橄欖，可以平衡一下啲辣味。
一邊食住鹹點，一邊飲住啲氣泡酒，感覺喺幾享受。食完一輪鹹點，就喺輪到介紹甜點喇。上文都有講，甜點共5款（未計GODIVA士多啤梨朱古力及軟雪糕），再數數，原來仲多兩粒白朱古力小方塊。
Godiva朱古力 先試試一試原裝嘅Godiva朱古力粒，外層喺黑朱古力夾雜榛子碎碎，內層喺牛奶朱古力，朱古力嘅口感幾香滑。
酒漬櫻桃黑朱古力 呢一款水果朱古力唔只好睇得，仲好好食。將櫻桃包住一層黑朱古力，灑上啲金粉，成粒小恆星咁，造型精緻，而一口咬落去，黑朱古力外殼好脆口，而櫻桃以酒漬做法，非常之香，再加以少少金箔作點綴，更顯矜貴。
伯爵茶黑朱古力慕絲 單喺賣相已覺得呢一款甜點唔簡單，打直切開，由下而上，有消化餅餅底、朱古力脆脆、伯爵茶慕絲、黑朱古力慕絲及最外層嘅鏡面朱古力，口感、味道都極富層次，而幽香馥郁嘅伯爵茶配以甘苦醇厚嘅黑朱古力，真喺好搭配嘅組合。
檸檬馬鞭草覆盆子馬卡龍 將馬卡龍做成手袋模樣，加以一物粉紅，真喺幾跳脫。以檸檬及馬鞭草做成嘅外殼，有陣陣清爽嘅芳香，質感煙韌卻唔會太甜，而裡面就喺覆盆子做嘅軟滑夾心，令整體食起嚟更酸香好味。
自家製碎榛果朱古力 不讓Godiva獨領風騷，餐廳都自家製一款碎榛果朱古力，有別上面提及嘅Godiva朱古力，依一粒整粒都喺以軟滑嘅朱古力嚟做，入口非常柔滑，再晌外層黐上榛果碎片，增加脆口感。
白朱古力小方塊 最後嘅甜點，喺晌餐牌上無介紹嘅，雖然喺白朱古力，但無預期咁過甜，而且，加了少少焦糖效果，味道磪喺唔錯，小小一口，作為甜點部份嘅完結。
英式傳統鬆餅配奶油忌廉及果醬食英式下午茶點都要有英式傳統鬆餅先似樣，一如大多數餐廳，都喺以英式提子鬆餅為主，佢哋嘅鬆餅做得出色喎，鬆化而唔會太乾身，甚具麵粉香氣。無論配上奶油忌廉，抑或士多啤梨果醬，效果都好唔錯。
最後要分享就喺無限量供應Godiva軟雪糕同士多啤梨朱古力，亦喺留到臨尾嚟慢慢嘆。晌近門口側旁，就座立一大部Godiva軟雪糕機，隨客人自己動手唧；此外，士多啤梨朱古力亦放晌度，自由取用
Godiva士多啤梨朱古力 小弟當然會試晒黑朱古力、白朱古力兩款口味啦，士多啤梨本身已經又大粒、又清甜多汁，包住芍薄薄一層朱古力，自然變得更香甜，無論黑還是白，都好食！
Godiva軟雪糕唧軟雪糕都講技巧，老婆唧嘅甜筒就衰咗，因為底層攞得唔夠闊，小弟就以小杯唧一客「鴛鴦」。軟雪糕非常幼滑，朱古力味亦好濃郁。雖然軟雪糕喺無限任食，但都無搏命，因為吃罷整份下午茶，到此刻都已經九乘幾飽喇。
除了額外嘅法國氣泡酒，套餐仲奉送餐飲，選擇非常之多，亦可以額外加錢享受無限添飲香檳、氣泡酒，又或不甘單調，可自費選用一啲特色嘅雞尾酒及無酒精雞尾酒。
棉花糖朱古力 如喜歡熱朱古力嘅朋友，就唔好錯過呢一款棉花糖朱古力，一來朱古力採用GODIVA品牌，朱古力味非常濃郁，帶少少甘苦香味，加上，放上一朶棉花糖花，「綻放後」確喺幾得意。
鮮奶咖啡咖啡豆採用意大利嘅illy，自不然對品質有信心。而拉花嘅圖案幾靚，線紋細緻，以非咖啡店而言，着實拉得唔錯，入口醇厚芳香，口感均勻細滑，果然喺豆靚，沖泡手勢亦唔錯。
食到中段，酒店嘅行政總廚何師傅（Danny Ho）會周圍跟客人打招呼同交流，有留意到佢真喺枱枱都去，有啲仲坐低傾幾句，佢喺大馬人，我又去過大馬兩趟，本身亦好鍾意大馬，有啲話題搭到咀。佢每人都會送一張食得嘅朱古力「信用卡」，唔碌得，但食得，而且，卡面設計勁有心思，自己發掘吓啲心思位晌邊。
榴槤芝士蛋糕 $68同何師傅傾開，知我同樣喜歡食榴槤，佢二話不說，即場晌餅櫃攞件榴槤芝士蛋糕俾我試。雪白嘅外型好簡約，一小片金箔作點綴，未切開，喺完成聞唔到任何榴槤氣味，但一切開，榴槤味好澎湃，而入口喺極之軟綿柔滑，細味之下，先喺榴槤嘅香味，隨之而來喺陣陣鹹鹹哋嘅芝士香味，兩者平衡而協調，可以講互相輝映。
聽店員介紹，就算唔嚟食呢個下午茶，佢哋亦以Godiva朱古力炮製出多款甜點，晌午市或晚市套餐上供應，對Godiva朱古力有興趣嘅朋友，就要趁機一試，尤其聖誕、新年快到，可以順道慶祝一番，有個甜蜜節日。
個人評分
味道：9/10
環境：9/10
服務：9/10
抵食：9/10
平均每人消費：HK$435
環境：9/10
服務：9/10
抵食：9/10
平均每人消費：HK$435
餐廳資料：
GREEN
尖沙咀科學館道17號唯港薈地下
3400 1300
GREEN
尖沙咀科學館道17號唯港薈地下
3400 1300
沒有留言:
發佈留言