金石寿司 Kin Seki Sushi：金石良「源」

前文提要，因為無得出門，疫情下同老婆、舊同事一齊入到去石門嘅「帝逸酒店」，玩吓宅渡假，由於所買嘅套票喺一個郊遊樂嘅組合，包一晚酒店房、翌日自助早餐及雙人帝逸郊遊籃，而晚餐就自理，故此，我哋就揀咗過石門嘅「京瑞廣場」嗰邊食，並由於其中一位舊同事好哈日，所以，篩選落嚟就揀咗「金石寿司」。

餐廳唔算好大，屬中小型，主要都喺做附近屋苑客嘅生意，不過，裡面裝修都幾骨子，以木系為主調，近住廚房位掛咗好多木製食物名牌，加埋非常別緻嘅天花燈，讓整個環境都充滿和風氣息。

大多數嘅日本餐廳，除咗環境花咗啲心思之外，餐具一環都用心，就算喺今晚咁摩登嘅居酒屋，啲餐具都好精緻架。

此外，枱上仲放有好幾款額外嘅調味料，如醬油、七味粉之類。

食物方面，可謂種類繁多，由刺身、壽司、手卷、卷物、串燒、天婦羅、炸物、燒物、煮物、麵類、飯類、湯類……以至小食、沙律、甜品都一應俱全。

有選擇困難症，或唔想煩嘅，可以考慮啲二人套餐，包咗多款食物，由$488-$1,288，豐儉由人啦。

仲有牆上掛咗個時令推介，有生蠔，有刺身，又有啲特色飯品。當然，因為喺時令嘢，標價出嚟都唔平。

燒味醂雞泡魚乾 $52

先燒一客雞泡魚乾咬吓先，當喺等候各樣美食登場時嘅小食。件雞泡魚乾大大片，燒得金黃焦香，睇樣就非常吸引，入口柔韌，帶點咬口感，加上用咗啲味醂調味，更芳香好食。

串燒雞軟骨 $18 x 2

再嚟客串燒過過口癮，揀雞軟骨，貪其軟軟韌韌口感過癮，燒得唔錯，陣陣香氣，又唔會太乾身。

東京灣池魚刺身（半條） $140

晌時令推介中見到呢款刺身，友人就非常雀躍，當然叫番半條嚟試一試。賣相真喺好靚，尤其是襯埋魚頭及整條魚骨，而半條魚就切出6件刺身，每件都幾厚身，色澤閃亮，仲鎅晒花。肉身晶瑩帶點淡粉色，食落肉質嫩得嚟帶爽口，魚鮮味頗突出。

炙燒三文魚芝士反卷 $72

一客有4件，啱啱好一人一件，而基本上，卷內喺三文魚，卷外亦喺三文魚，再加上大片芝士晌面。芝士炙燒過，微微軟身，入口充滿油香，然而口感單調少少。

南瓜天婦羅 $55

大家都鍾意食南瓜，所以，專登單點一客天婦羅。不過，佢哋啲天婦羅粉漿可能開的好稀吓，瀉到無晒咁，所以，你見啲南瓜都好似無乜脆漿皮，但啲南瓜就真喺又粉又清甜。

野菜天婦羅 $90

呢個野菜天婦羅跟個南瓜都差唔多，脆漿皮唔多，都喺薄到無乜影，有冬菇、茄子、大蔥、南瓜……等等，幸好炸得唔油膩，不過，覺得性價比都喺唔高。

天婦羅蝦手卷 $40、軟殼蟹手卷 $48

另外，又點咗兩款手卷，我就無份食，喺友人想試，佢哋話麻麻，味道比較「寡」，好少料，啲粉漿好厚，明顯同對上嘅天婦羅南瓜同野菜有天淵之別。

黑豚肉湯蕎麥麵 $84

近尾，就點啲熱熱哋，又飽肚嘅麵食同飯品，先嚟個蕎麥麵，份量唔少，夠4個人「些牙」，大家都試啲。個湯頭唔錯，清香不膩，薄切嘅豚肉都好嫩滑，麵條有韌勁，不過，略嫌啲配料比較普通。

松葉蟹釜飯 $158

反而個釜飯有啲睇頭，日本嘅釜飯大致可以理解為我哋常食嘅煲仔飯，睇到個賣相，飯面鋪滿松葉蟹肉，不愧喺時令推介之一，最正喺唔使拆蟹都食到啖啖蟹肉，爽呀。的確，啲蟹肉真喺幾正，既鮮甜，又帶有啲啲海水鹹鮮味；啲飯粒圓潤軟綿，又有點黏糯感，喺唔見有飯焦啫。

雖然有好幾款食物都好有水準，但亦有啲菜式做得普普通通，整體而言，算中間偏上少少；服務就幾唔錯，店員都好勤快，添茶、收碟。

個人評分
味道：7/10
環境：8/10
服務：8/10
抵食：8/10
平均每人消費：HK$215

餐廳資料：
金石寿司 Kin Seki Sushi
沙田石門安群街3號京瑞廣場1期地下G30A號舖
3619 4394