村爺爺車仔麵 Grandpa Mura：「村」流不息

早排晌葵涌一間小店食過一道全隻龍蝦喇沙，定價非常相宜，而且，非常好食，今晚趁住老婆要晌油麻地返學，等埋佢放學就會一會「村爺爺」，試試佢哋大熱嘅龍蝦車仔麵，身邊有唔少食友都幫襯過，都一致讚好，加上老婆都話好耐未食過車仔麵，就豪食一餐車仔麵。

有幫襯過「村爺爺」都知，佢一間鋪賣車仔麵「村爺爺車仔麵」，隔個鋪位就賣泡飯、燉湯「村爺爺龍蝦湯.泡飯.燉湯專家」，我哋先入「車仔麵」嗰邊，點解無乜人？

原來有啲特喇事，提早收鋪，店主就安排我哋過去「泡飯」一邊，照樣可以點車仔麵嘅嘢。話時話，呢邊都好旺，差唔多坐滿客咁滯，啲枱亦翻得好快。

門口棟咗個抵到無朋友嘅湯麵餐牌，指定嘅5款湯麵，只賣$25碗，絕對喺糧尾救星。

此外，主打車仔麵就分龍蝦湯底（3餸1麵賣$52、4餸1麵賣$60）及豬骨湯底（3餸1麵賣$36、4餸1麵賣$44、5餸1麵賣$52），加餸每款$8，如揀必食推介就$11，6:00pm前惠顧4餸以上仲送嘢飲添，但配嘢飲都唔貴，熱飲加$6，凍飲或汽水就加$9。

蟲草花螺頭雞湯 $48

呢個喺新出品，因為老婆鍾意飲湯，湯水啱晒佢。唔講得笑，雖然喺湯，但湯料也不少，裡面有好多蟲草花同雞肉，仲有啲娃娃菜，而且，堅有唔少螺片。湯嘅味道好香甜，飲得出用料十足，雞肉亦頗嫩滑，淨飲呢個都夠頂到一餐。

4餸（墨魚手指、大腸、蠔油冬菇、豆卜）$35

既然喺豪食，當然配多幾款餸，餐牌中粉紅字為推介，又點啲試試。墨魚手指真喺幾唔錯，外層脆口甘香，內層墨魚膠打得好彈牙；大腸洗得乾淨，亦去走晒啲肥膏，完全無嗰陣臊羶味，又醃得好食；蠔油冬菇非常大隻，超厚肉，以蠔油炆過，完全入晒味。豆卜就純粹喜好嗌埋，都好有豆香，無油膉味，整體真喺食得出用料不賴。

殿 • 龍蝦湯車仔麵 $68

以前食龍蝦伊麵喺高檔嘢，依家就平民化、大眾化好多。呢款龍蝦湯麵有半隻龍蝦，反轉睇一睇，勁多蝦膏，而且，蝦肉好爽彈，又足蝦鮮味；呷一口湯，果然好堅，蝦味精華湧晒出嚟，好濃郁，喺嫌湯少咗啲，然而配上伊麵，索咗啲湯汁，就寧舍好味。餐廳都好貼心，備有大鉗、濕紙巾，唔怕搞唔掂隻龍蝦。

4餸（南乳炸雞翼、秘製豬手、蠔油冬菇、生根）$38

既然同老婆各自揀，小弟就要番多啲肉。南乳炸雞翼炸得香脆，卻唔油膩，帶有陣陣南乳香；秘製豬手都好正喎，炆得又腍又香，外皮好爽滑；蠔油冬菇上文就講咗啦，而生根吸咗啲滷水汁，就自然好食啦！

凍檸樂 $14

跟餐要汽水就加$9，檸底就再加多$5，不過，食住車仔麵，食住凍檸樂，感覺特別爽，更喺一種平民情懷。

無論啲湯底、車仔餸，果然喺做得有質素，不單味道好，用料亦無欺場，再者，店家晌湯底、食材都花咗唔少心思，搞吓啲特色嘢吸客，怪不之得啲客川流不息咁啦！

個人評分
味道：9/10
環境：7/10
服務：8/10
抵食：9/10
平均每人消費：HK$105

餐廳資料：
村爺爺車仔麵 Grandpa Mura
油麻地砵蘭街76號地舖
6773 8757