PitStop：「鞍」心偽郊遊

無得出門，只好晌香港住吓酒店，扮吓渡假，2021年中，曾住過晌石門嘅「帝逸酒店」，玩吓宅渡假，印象幾唔錯。故此，又同啲舊同事夾好日子又嚟玩一趟，而今次揀嘅套票喺「帝逸單車樂住宿計劃」，除包一晚酒店房、翌日自助早餐之外，仲有一套雙人帝逸郊遊籃，而食物喺酒店大堂旁「Pit Stop」嘅出品。

晌等候食物期間，都晌餐廳打個轉，餐廳嘅定位喺咖啡店咁，主要賣啲輕食。環境幾舒服，因為地方闊落，樓底特高，空間感強，加上又有啲戶外露天位，感覺寫意悠閒。

因為唔喺正式幫襯「Pit Stop」，所以，餐牌就無刻意影，不過，睇到凍櫃，就見有唔少歐陸三文治、鬆餅、蛋糕……供選擇。當然，餐廳仲提供咖啡、茶品、果汁……等等。

對於個郊遊籃，事前都問咗好多相關資訊先，最正喺入住當日，可以提早到12:00pm就可以到取，所以，我哋一早嚟辦入住登記，然後，拎住份郊遊籃去馬鞍山公園野餐。等咗一輪，卒之砌好份郊遊籃，唔怪之得搞咁耐，真喺有好多嘢（註：圖中粉紅色嘅藤籃需退回俾酒店）。

先晌餐廳現場影番張相先，呢個喺雙人份量，有薯片、沙律、三文治、甜點、生果同蒸餾水，如果配支果汁就好喇！味道就稍後講，但份量絕對十足，淨喺食份沙律及三文治已好夠飽，亦由於呢兩樣唔留得，所以食咗先，薯片、生果就拎返去酒店慢慢再食。

其實，馬鞍山公園都好大，小弟就第一次嚟，園內有好多大草地，星期六中午唔太多人，眼見主要都喺少部份外傭姐姐同啲親子家庭，都會晌度坐吓、玩吓，因為空間多，大家都保持好一段距離。而有部份對住單車徑嘅草坡地，更附送海景，景觀一流。唔鍾意「蓆」地而坐，覺得食嘢唔方便，亦有啲野餐枱。

喺時候開餐，攤開晒啲嘢食，真喺大陣容，唯全部都用上膠盒，確喺有啲唔環保，所以，有啲用得着嘅，都拎番去洗洗重用，盡點綿力。

野菌雜椒長通粉沙律

先試個沙律，份量俾到成一大盒，對有啲女士而言，已經夠一餐。啲長通粉煮得啱啱好，軟身得嚟夠咬口，淋上嘅黑醋酸香，沉實醇厚，質感杰身，食得出喺煮過嚟，而啲野菌、燈籠椒亦唔錯。

煙三文魚意大利軟包

晌餐廳見，一個三文治包都賣成$45個。佢哋啲意式三文治包好大個，睇我單手拎住半個，就對比出有幾大件，而且好足料，夾有大大片煙三文、生菜、蕃茄，啲食材亦頗新鮮，加上個「拖鞋包」非常軟熟，真喺有一定嘅水準。

火腿煎蛋意大利香草包

意式包中，意大利香草包喺小弟嘅最心水，每個郊遊籃都有兩款包，同老婆一人一半就試晒。雖然睇名喺「腿蛋治」，但絕對唔喺茶記嘅層次，而喺酒店嘅級數，火腿喺比較靚嘅貨色，食味真喺唔同啲，配上香草包，又香又軟熟，一流。

蜜桃丹麥酥
其實，食完以上嘅沙律及三文治包，已飽到九乘，不過，面對個咁靚仔嘅丹麥酥又點忍口，幸好細細件，一口食埋去。啲蜜桃好清甜，個丹麥酥焗得夠酥脆，食落又充滿牛油香，真喺唔錯。

雖然同老婆不時都去行山，但郊遊野餐就真喺無乜幾何，因為拎住太多嘢都喺嫌麻煩，難得今次Staycation提供咁豐富嘅郊遊籃，天氣又唔錯，晌馬鞍山公園渡過一個愉快午後時光，確喺唔錯嘅體驗。

個人評分
味道：8/10
環境：8/10
服務：8/10
抵食：8/10
平均每人消費：HK$0（Staycastion套票已包）

餐廳資料：
PitStop
沙田源康街1號帝逸酒店1樓
3653 1319