門面一睇就知喺日本餐廳，但入到店內，雖然都喺以淺木色為主，不過，裝修比較摩登。一張L形板前席，有12個位，喺食「廚師發辦」嘅指定最佳位置，因為可以睇到師傅切魚生嘅刀功、揑壽司嘅手勢，而且，用大大塊透明膠板隔住。
近門口亦有張4人枱，如果唔喺食「廚師發辦」，尤其午市嚟，食吓定食都OK。
晌呢啲中高檔餐廳，除咗環境，餐具及服務都喺值得留意嘅一環。一碟、一杯都好古雅，之後盛菜嘅器皿亦都賞心悅目；而服務方面，好熨貼，廚師會先問問有無嘢唔食得，或食物敏感，態度有禮，店員又不時為我哋添茶及收拾餐具。師傅上菜嘅速度，亦喺恰到好處，令人用餐感到悠閒唔急促。
午市方面，除咗兩款「廚師發辦」（$398 / $498）之外，仲有10款定食供選擇，定價為$148-$378，豐儉由人，已包括沙律、茶碗蒸、味噌湯。
田園沙律 雖然沙律只喺一般較和風嘅做法，即喺新鮮嘅沙律菜，淋上少少柚子醋，然後加多塊脆片，但沙律菜好爽脆，醬汁酸香，熱吓身，等客人打開胃納。
茶碗蒸 最亮點喺個盛器，連埋隻匙，一整套，非常別緻。而啲蒸蛋本身非常滑溜就唔在講，而且，甚具蛋香，裡面加咗少少紫菜、冬菇、鳴門卷……等等，確喺幾好食。
一邊食住沙律、茶碗蒸，一邊就睇住師傅開始切刺身及預備各種配料。小弟就試$498嘅「廚師發辦」，包括刺身5種、壽司5貫及手卷1本。
帆立貝、魴鮄魚、煙燻鰹魚 卒之到刺身登場啦，師傅為咗賣相靚，先嚟3款刺身上碟，比起一件件上自然靚好多，再配上黑豆及秋葉，賣相非常有意景，美如一幅畫咁。味道亦相當唔錯，按次序先食魴鮄魚，將薄切嘅魴鮄魚捲住啲啫喱醋嚟食，入口有陣陣酸香，更突出到魚鮮味；帆立貝底下墊咗塊青檸片，確喺有陣陣青檸香味，夾住一瓣海膽，鮮甜味加倍；至於煙燻鰹魚肉質較挺身，帶點韌性，煙燻香好強烈，感覺好特別。
真蠔 雖然隻蠔睇落好肥美靚仔，不過，更吸引喺隻器皿，手工精巧，非常之靚。而隻真蠔都好正，口感爽脆，海水味好重，不過，師傅已加咗啲柚子醋作平衡，以及少少口感潺潺嘅蓴菜作配襯。
大拖羅 大拖羅即喺大拖羅，油份果然超強，咬落即感覺到嗰份油脂豐富，入口即化嘅境界。不過，師傅除咗巧妙加入啲蔥碎、芝麻之外，更以一片脆口嘅紫菜包住嚟食，感覺無咁「漏」之餘，味道豐富咗，卻又唔會嚟夾。
炸白蝦 5款刺身食完，間間場，俾咗一小碟炸白蝦，等我過過口癮。啲蝦炸得香脆不膩。
見到啲壽司飯，就知壽司即將登場。其實喺製作刺身時，都已見到師傅為做壽司已作準備，將需要嘅魚生從雪櫃拎出嚟，切好，攤暖備用，更不時以手背去量吓啲魚生嘅溫度，會唔會仲喺好冰凍、適合俾客人食未。
秋刀魚壽司 首先登場喺秋刀魚，呢個時候喺時令，外皮十分閃爧爧，更專登鎅幾吓花，賣相就特別好睇。已搽咗少少醬油，底下加咗少芥末，剛好一口一件，魚肉好清爽，味道好新鮮。
牡丹蝦壽司 食「廚師發辦」經常都會有牡丹蝦嘅出現，呢隻牡丹蝦都好夠大隻，肉質黏黏哋卻又帶有爽身嘅口感，但最驚喜位喺將蝦膏燒至更濃縮，再放番上面，嗰陣陣膏香甚有畫龍點睛之效。
赤身壽司 用咗醬漬去處理，加上赤身本身色澤紅潤，份外好睇。赤身油份唔太重，肉質細緻柔軟，魚味又夠突出，逐步逐步食更濃味嘅壽司。當然，中間食片薑，飲啖茶清清味蕾。
火灸銀鱈魚 平常以定食，西京燒就食得多，今回做成壽司，再火灸都，等魚肉滲出丁點魚油，並滲進飯中。跟食煎過嘅銀鱈魚好唔同，魚肉同樣嫩滑，只帶微微油潤，感覺一樣好好。此外，另一亮點喺面頭加咗少少黑松露醬，令味道更昇華。
赤海膽壽司 以小碗盛載，一大瓣一大瓣赤海膽鋪晌飯上一啖入口，鮮甜味就非常突出，而且，口感甘香豐腴，綿密細膩，仲有種甘甜嘅餘韻，喺靚貨嘅表現。
中拖羅手卷 小弟食好幾次「廚師發辦」都喺以吞拿魚腩嚟做手卷多，而今次用上中拖羅，又喺捲成長條形。中拖羅比赤身油份重啲，但又唔會好似大拖羅咁多油脂，可以講脂肪適中，配以紫菜，一樣令人回味。
麵豉湯 麵豉湯唔喺就咁普普通通嘅麵豉湯，喺加入咗啲大蜆去煮，味道好鮮甜，既有麵豉嘅香味，又有陣陣海水嘅鹹鮮味！
抹茶奶凍 餐牌就無寫，原來仲有甜品，一道小巧精緻嘅抹茶奶凍，抹茶味濃，帶點甘苦，質感柔滑，配上清甜嘅紅豆，為一餐有個完美嘅作結。
至於友人嘅壽司「廚師發辦」就唔多寫喇，同樣包括沙律、茶碗蒸、壽司11貫、手卷1本、麵豉湯及甜品。而壽司有深海池魚、金鯛、金線鯛、八角、帆立貝、牡丹蝦、赤身、中拖羅、池魚、右口魚、赤海膽。友人就大讚出色，雖然唔喺好識啲魚種，但真喺學咗好多嘢，有啲魚連名亦未聽過。
小弟同樣覺得又喺上咗一課，雖然，下次再食「廚師發辦」，都未必認得到啲魚種，但總喺每次都有啲驚喜感。
個人評分
味道：8/10
環境：8/10
服務：8/10
抵食：8/10
平均每人消費：HK$490
味道：8/10
環境：8/10
服務：8/10
抵食：8/10
平均每人消費：HK$490
餐廳資料：
鮨廷 Sooshi Gold by Sushi Sooshi
中環威靈頓街148號地舖
2666 9169
鮨廷 Sooshi Gold by Sushi Sooshi
中環威靈頓街148號地舖
2666 9169
沒有留言:
發佈留言