Espresso Alchemy：早 • 有「意」思

難得表哥放大假，所以，約咗佢出嚟食個高檔早餐。海港城嘅「Espresso Alchemy」食過一次晚飯，知道食物質素高，咖啡好，最緊要喺環境舒服嘛，又可以坐耐少少傾吓偈。

開放式鋪面主要喺落單買食物，而主用餐區就晌鋪面對住嘅商場空間，地方頗大，座位亦好闊落，裝修帶點歐陸風，因為有設計成拱門形嘅窗框，又有啲波波燈，整體感覺寫意。

如大多數嘅咖啡店，都會兼營售賣不少咖啡嘅相關產品，如濾杯、濾紙、咖啡豆……等等。

早市時段提供配上咖啡嘅早餐，款式有全日早餐、奄列、意大利三文治及多士，配即磨咖啡，亦可以加$10轉為其他意式咖啡。

餐廳採半自助形式，晌收銀處落單後，收到號碼牌，就由店員將食物送上，亦唔收加一服務費。

此外， 店員會送上餐具，不過，額外嘅餐具、清水、紙巾、調味料……等等，可以晌自由櫃枱隨意取用，當然，唔好濫用，唔好浪費啦。

檸檬汁烤雞煙肉意大利三文治 $69

曾經晌其他分店食過佢哋啲意式三文治，做得喺唔錯，而呢款有檸檬汁烤雞肉，又搭上煙肉，幾啱小弟口味。麵包烘得靚仔，拎上手熱焫焫，入口麵包烘至外脆內軟，而裡面餡料非常之多，烤雞嫩滑有檸檬香清香，而煙肉煎得脆口，整體味道惹味，喺有質素嘅意式三文治。

澳白咖啡 +$10

小弟向來偏好加入奶泡嘅意式咖啡，大多數都飲鮮奶咖啡，今次就改一改要澳白咖啡。呢度嘅拉花向來出色，呢杯澳白都唔差，表面平滑，花紋對稱而細緻，入口口感平均，奶泡跟咖啡都十分平衡，沖泡手勢非常好。

火雞胸蕃茄芝士意大利三文治 $69

表哥揀咗另一款意大利三文治，不過，由於啲三文治都會被切成半，所以，我哋可以都試到對方所揀嘅口味。呢款三文治嘅配搭比較傳統啲，不過，質素依然，火雞胸唔會好嚡，蕃茄新鮮而酸香，芝士烘過好軟綿，整體亦喺唔錯。

鮮奶咖啡 +$10

表哥話佢少飲意式咖啡，所以，我都推介佢加錢轉飲鮮奶咖啡，佢就問跟我杯有咩分別，簡單嚟講都喺奶泡同濃縮咖啡嘅比例而已。佢就話杯咖啡真喺幾好飲，除咗醇香之外，有陣陣果仁香，口感有種厚身感，而且，好綿柔。

自家製藍莓核桃蛋糕 $31

佢覺得啲嘢好食，就貪口痕追加多一客藍莓核桃蛋糕，入口蛋糕部份好鬆軟，藍莓味道清香，而核桃好香脆，唔會有陣陣「益」味，更幾飽肚添。

大家講番疫情下生活唔少變化，的確，今日唔知聽日事，有啲無奈，但亦會積極面對，總之保持態度正面，無話搞唔掂！

個人評分
味道：8/10
環境：8/10
服務：8/10
抵食：8/10
平均每人消費：HK$79

餐廳資料：
Espresso Alchemy
尖沙咀廣東道3-27號海港城港威商場地下G104號舖
2610 2998