摩斯漢堡 MOS Burger：「斯」心推介

之前，旅發局再推出咗「賞你住」活動，有幸訂到東涌「富諾特酒店」嘅Staycation套票，可以慳番$500，淨付出$800就可以喇，趁老婆生日，就入到東涌來一趟小旅行。套票包一晚房、自助早餐及兩份野餐包，故入住前就晌「Mos Burger」食個輕怡午餐。

雖然「Mos Burger」晌香港紮根都好一段日子，但真喺未幫襯過，反而晌札幌幫襯過一次。環境就唔講太多，典型快餐店格局，但勝在兩面都喺對街嘅落地大玻璃窗，視野開揚，樓底又過。我哋搵咗個柱後死角位，自成一角。

一入門口就喺收銀位，個哥仔見佢又收銀、又執搭、又送餐。餐牌就一版睇晒，包類有成十多款，有漢堡、珍珠堡、熱狗，轉為套餐嘅組合亦多，更有不少升級優惠。

落好單，埋位等食就得喇，因為，佢哋會俾個牌仔你，之後，由店員將食物送上。

金平牛蒡珍珠堡 $24

唯一素食嘅就喺呢一款金平牛蒡，珍珠堡亦好啱老婆食，咪睇佢細細個咁，拎上手都幾墜手。打開包裝，裡面勁塞滿牛蒡，調味唔錯，入口爽爽脆脆，好食；而個珍珠堡嘅飯粒軟綿，口感帶點黏糯，壓得實淨卻唔會死死實實。

法式和牛漢堡 $30

法式所指喺將法式燒汁入饌，配上和牛所做嘅漢堡，配有大量生菜絲及芝士。和牛肉果然好食，肉味濃之餘又有多點油香，而個法式燒汁非常惹味，包身亦好鬆軟，睇落個包好簡單，但確實幾好味。

北海道南瓜薯餅、玉泉乾薑味汽水 $22

薯餅就食得多，南瓜薯餅就少啲，而用上北海道南瓜，自然又加啲分。南瓜薯餅炸得出色，熱焫焫卻唔油膩，一咬落去咔嚓裂開，脆到不得了，南瓜味亦夠晒突出。

雖然呢餐簡單，但好食就得，平平哋又食得有少少質素，「摩斯」都可以算喺唔錯選擇。唔食咁飽，因為，辦完入住手續就打算先享用吓酒店泳池游吓水，之後再去機場維修區睇日落及飛機升降。

個人評分
味道：8/10
環境：7/10
服務：8/10
抵食：8/10
平均每人消費：HK$38

餐廳資料：
摩斯漢堡 MOS Burger
東涌富東街6號富東廣場地下23號舖
3793 4740