隱世就唔算隱世喇，有時過到嚟界限街另一邊都知有間日式小店，喺無留意叫咩名啫，之但喺，就肯定一家喺小店，拉門而入，店內環境一眼睇晒，約7個座位左右，1個師傅一腳踢，整體裝修好有居酒屋嘅風格，全吧枱位，可以直接跟師傅交流。
啲餐具都幾靚喎，瓦碗好雅致，但啲鐵筷子就唔喺咁好揸，此外，中間嘅小型木托盆就唔喺好知有咩用途，無刻意問，我哋就當咗骨碟，不過，最後都無點用到。而枱上放有紙巾同水杯，人手所限，呢度就有少少需要自己招呼自己。
食物方面，咪睇佢鋪仔細細，其實有好多選擇，由佐酒小食、燒物、串燒、炸物……到時令海鮮，有近50款食物。
飲品又點呢？另一頁餐牌，就見到提供好多酒精及非酒精類飲品，不過，都喺以酒精類的為多。
手工櫻花蝦醬拌凍豆腐 $48先嚟一道師傅極力推介嘅冷盤，以日本直送嘅凍豆腐再加上自家製嘅櫻花蝦醬配搭而成，凍豆腐比較清淡，不過，口感非常嫩滑，而櫻花蝦醬帶出陣陣鹹鮮，鹹香惹味，加上櫻花蝦嘅卜卜脆口感，一起放入口，又真喺幾過癮。
魷魚軟骨沙律 $48魷魚相信大家食唔少啦，魷魚軟骨呢？新鮮爽脆嘅沙律菜配上自家調製嘅沙律醬，本身都已經幾好食，配搭埋啲魷魚軟骨，煙煙韌韌好有咬口，幾有新鮮感，比預期有驚喜。
雞腎串 $18 x 2點咗兩點雞腎，單純過過口癮而已，不過，又燒得唔錯，唔會乾到柴咁，又有啲咬口，少少鹽作調味，都已經夠晒。
黑松露醬配炸薯條 $$68老友可以講喺薯條控，所以，又點可以錯過呢道菜呢！首先，喺薯條炸得香脆不膩，做足基本，而薯條之上，糝咗少少海苔粉，令食味更有特色，當然，自家製嘅黑松露醬，亦功不可沒，調和得充滿黑松露嘅香味，夾薯條，正呀喂。
和風高湯煮日本沙白蜆 $68小弟就喜歡食啲濕濕哋嘅嘢，所以，揀咗呢道沙白蜆，估唔到份量都幾多，有一大碗沙白蜆，隻隻睇落都好飽滿，入口都夠肉地，最緊要喺夠晒鮮甜；而所謂和風高湯，真喺無欺場，飲落清香而有陣陣甜味，值得推介。
燒鰈魚 $88師傅就話喺人氣菜式之一，姑且信佢一次，查實，鰈魚比較陌生，應該似喺未食過喇。一客有4件，每件都幾大件吓，燒得外表焦香，老套一句都要講，食落果然皮脆肉滑，又有魚味，磪喺好有質素嘅食材嚟。
海膽流心忌廉餅 $78最後，意猶未盡，再追加一客忌廉餅，果然做到流心嘅效果，啲海膽流心忌廉餡好正，質感綿密又滑溜，咬落去嗰吓一湧而出；至於件餅身，炸至金黃，入口熱焫焫，又甘香脆口，最正喺無油膩感，可見炸功確有一手。
師傅忙於上菜，做個不停，都未有太多機會交流，但從各菜品中，都感受到師傅嘅心思同誠意，多謝友人嘅介紹，又食到餐好嘢。
個人評分
味道：8/10
環境：7/10
服務：7/10
抵食：8/10
平均每人消費：HK$240
味道：8/10
環境：7/10
服務：7/10
抵食：8/10
平均每人消費：HK$240
餐廳資料：
山系。本舍 yama shǒuzhì
太子界限街23號地下A1號舖
6188 8741
山系。本舍 yama shǒuzhì
太子界限街23號地下A1號舖
6188 8741
沒有留言:
發佈留言