La Pizza Express：La La 「臨」開餐

年初嚟過牛頭角食嘢，然後，沿觀塘海濱公園由牛頭角行到去觀塘，發覺原來海濱呢度有幾家餐廳，不過，當時已經食咗晏，就齋睇望望吓。今回就過開嚟，揀間平靚正嘅試試，睇到呢一間「La Pizza Express」，一身橙色貨櫃鋪面，幾搶眼喎。

睇店名，都知主力做外賣，不過，對出有數張餐枱，可以「堂食」，慢慢享用。亦可以買嚟到海濱嘅草地打躉，見唔少親子客、後生仔到草地區當野餐。

而對出喺一片「有蓋」（其實喺天橋底）遊樂場空間，空間開揚，見有啲小朋友踩單車，年輕人玩滑板，但又唔會影響到食客，加上開始入秋，天氣涼涼哋，晌度食嘢感覺都幾舒服。

門面玻璃窗貼出咗大餐牌，有咩食就一目了然，三文治、特色餡餅、沙律、小食、薄餅……等等，睇店名都知，應該要試試佢哋嘅薄餅啦，而佢哋啲薄餅主要喺賣意大利拿坡里式，即喺咩？哈哈，小弟無研究，都喺上網睇，確喺有特定做法，簡單嚟講，麵粉糰從中央往外推，揉出一道「小圍場」嘅1-2cm厚批邊，茄醬底要用上有「蕃茄之王」San Marzano製成嘅茄汁，平均灑上莫沙里拉芝士及羅勒葉。

飲品方面，除汽水、冷壓果汁之外，竟然仲有手工啤同果味氣酒。收銀位前，更放咗好多樣辦，唔知喺咪之前有人隨手拎，故店主專登貼上貼紙，提醒客人「只供展示，請勿飲用」，哈哈！可能客唔算多，店員捧埋啲嘢食出嚟俾我哋，而且，亦好有禮貌。

芝士薯條 $48
本來喺想要芝士薯格，不過，店員話賣晒，粗薯條有無問題？咁薯條都OK嘅，只哋薯格少食兼好耐無食啫。薯條新鮮即炸，炸得金黃，而且，面頭淋滿芝士汁，變得份外吸引。始終喺新鮮炸，當然甘香好食，脆而不膩，又有薯味，沾上芝士汁食味更喺一流。一口凍飲，一口脆薯條，爽呀。

牛油果慢煮雞胸沙律 $68

食邪惡嘅芝士薯條，咪就梗喺搵一道沙律嚟減低罪惡感啦，呢款沙律真喺要推薦吓，牛油果、雞胸肉均份量十足，賣呢個價覺得真心抵，前者夠晒熟，口感綿滑，後者利用慢煮方式，肉質超嫩滑，灑上少少七味粉，添加多一分風味；而沙律菜新鮮爽脆，佐以蜜糖芥末汁，非常次好食。

香草雜菌薄餅 $48

就番老婆口味，就選上呢個全素簿餅，雖然只喺8吋大（兩個人食就夠晒啦），但睇相都見落料無欺場，堆到滿晒成個餅面，再者，只喺賣$48咋喎。睇到啲圍邊，真喺有拿坡里風，而雜菌用上新鮮貨色，肉厚多汁，加上鮮活嘅茄醬底，灑下大量莫沙里拉芝士，加埋啲新鮮車厘茄同翡翠苗，香濃中滲出陣陣清爽感，又夠熱焫焫，真喺正呀喂。

冷壓果汁（橙汁 $28、熱情果蘋果茉莉花茶 $38）

「Bless」呢一個品牌嘅冷壓果汁向來口碑唔錯，前者當然就無話有啲咩好特別，勝在夠健康，冷壓做出原汁原味，一啲營養都無流失；而後者嘅味道就幾特別，有種飲緊台式果茶咁，酸香而清爽。

晌度食嘢悠然自得，無拘無束，啲定價又非常相宜，用料又交足貨，最緊要喺味道一啲都唔失禮嘛！

個人評分
味道：9/10
環境：7/10
服務：8/10
抵食：9/10
平均每人消費：HK$115

餐廳資料：
La Pizza Express
牛頭角觀塘海濱道86號地下2號舖
5599 2256