江南‧翡翠 Jiang Nan by Crystal Jade：「江」鮮亮麗瓜果菜

盛夏嘅炎熱，多多少少都影響人嘅食慾，最近行經海港城嘅「江南‧翡翠」見到推出一系列以瓜果入饌嘅菜式，睇落好清新，好啱我老婆大人嘅口味，所以，趁周五晚又做無飯夫妻，拉埋佢過嚟食餐飯，乾手淨腳嘛！。

睇鋪面真喺睇唔出間鋪咁大，個鋪位好深，仲分咗幾區，整體裝修雅致，富江南風，加上有部份座位有海景加持，自不然更加舒適。

除了有2、4人枱，又有卡位，以及長型8人枱，適切到唔同人嘅需求；此外，餐具亦都頗精美，順帶一提，茗茶$15位，但店家採用龍井，飲落甘醇爽口，香氣裊裊，感覺喺俾得值。

大大本餐牌就真喺好難影晒出嚟，既要今次有目標而嚟，就影低「瓜果盛宴」系列嘅菜式同衍生出嚟嘅2人、4人套餐，原本都打算叫2人套餐，但有啲嘢老婆就唔食得，所以，改為散點。

餐前小食 $10

初頭以為喺啲筍乾，睇真啲原來喺啲蓮藕粒同毛豆粒，前者以醬油煮過，帶點爽口感，富醬油嘅香味，但完全無過鹹嘅問題；後者就粉粉腍腍，而且，毛豆營養高呀。

脆脆水母花 $85

水母花即喺海蜇頭，餐牌都有標明，作為前菜，呢個真喺好食，一來海蜇頭切成一小口一小口，二來口感爽脆有嚼頭，加上酸香醒胃，又不嗆喉。

哈密瓜三鮮炒蝦球 $178

兩款瓜果菜嘅賣相都好清新，色彩鮮艷吸引，先分享碟炒蝦球，真喺估唔到哈密瓜用嚟炒都OK喎，爽口清甜，加埋啲鮮百合、蘆筍仔，就令到個菜式嘅口感更清爽；而大主角蝦球既色澤亮麗，又味道鮮甜，肉質更喺爽口彈牙，食得出每樣嘢都用料新鮮。

橙香炒魚丁 $108

至於碟炒魚丁，同樣味道好清爽，初時以為除咗有橙肉，仲加咗紅黃燈籠椒，原來黃色嘅喺橙皮，食落帶澀，純粹提吓味，而魚丁質感嫩滑，確喺滲出淡淡微酸嘅橙香，幾特別，兩款瓜果菜都好啱用嚟餸飯食。

桂圓雪梨茶 $30、養生豆漿 $28

另外，嗌咗兩杯飲品，小弟就揀凍嘅桂圓雪梨茶，雖然凍嘅，絕對唔會一大杯冰，而喺入口涼涼哋，好潤喉，滿滿雪梨嘅清甜，配以龍眼肉嘅爽口，夏天飲寧舍清涼消暑；老婆向來講健康，佢就揀熱嘅豆漿，豆味香濃，甜度啱啱好，微熱很啱入口。

總括而言，環境舒適，服務熨貼，上菜速度快，菜式有亮點，最緊要喺啱口味。有時食嘢就喺咁，唔一定大魚大肉，要食得好富貴，合口味，啱食就得喇！

個人評分
味道：9/10
環境：9/10
服務：9/10
抵食：9/10
平均每人消費：HK$280

餐廳資料：
江南‧翡翠 Jiang Nan by Crystal Jade
地址：尖沙咀廣東道3-27號海港城港威商場3樓3328號舖
電話：2622 2699 / 5216 1696 (WhatsApp)