極．大瀛喜日本料理 Kiwami Daieiki：再「喜」革命

都好耐無同老婆食日式放題，趁住放「暑假」，佢啲義工教學活動完晒，無咁忙，就一齊嚟到「極．大瀛喜日本料理」大擦一餐，食得盡興。之前曾經食過，知道店家用料上心，選擇又多，而今次到訪嘅觀塘店新開無耐，又有啲新張優惠，順理成章就到訪呢家店。

雖然成日聽人話北上搵食，香港飲食業生意唔好呀……等等，其實，只要用心做，一樣客路源源，好似今晚，嚟得早，都已經有7、8乘滿，越夜越多人。再講講個環境，地方好大，以金色為主調，有種金碧輝煌之感，但一啲都唔俗氣，通道、座位都好闊落，令用餐體驗更好，而且，啲間隔屏風夠高，前後嘅騷擾度大減。

門口已列好收費表，唔同放題選項，唔同時段，都一清二楚，我哋就揀「放題B」餐，可以食到多啲貴嘢同特色嘢。午市最長可以食3個鐘，晚市就以2個鐘為限，不過，當晚所見，未話有人等位，所以，2個鐘後都無趕我哋走，只喺唔可以再嗌嘢食而已。

價錢就講咗喇，順便介紹埋自助食物區，就晌入門口右邊，同樣通道闊落，唔怕人撞人。掃視一番，絕對令人花多眼亂，非常多元化，睇相你都見，照顧到唔同年紀層嘅人，包括有30多款冷盤小食、沙律，以及自助餐常見嘅凍海鮮，仲有熱盤、炸物、熱湯、點心、生果、甜品、雪糕雪條、軟雪糕搭多種配料、自助茶啡、果汁、自家製健康飲品，同埋一大櫃多到數唔晒嘅飲品。淨喺呢個自助區都可以食飽人啦！

除咗出面自助食物區之外，透過二維碼下單，有一大埋菜式選擇，分類有刺身、創作料理、壽司、火炙壽司、卷物、軍艦、串燒、燒物、炸物、天婦羅、一品料理、煮物、蒸焗鐵板燒系列……等等，當然，就仲有「放題B」嘅特色嘢。

小食
襯我埋頭苦幹點餐時，老婆就晌自助區拎啲小食、果乾、腰果過過口癮。

湯品
香港人都喜歡餐前飲碗湯，所以，先試試佢哋啲湯品，老婆就大讚個蟲草花膠雞湯，夠火喉，味道濃郁又好潤；而新品海皇一品冬瓜盅雖然唔及單張嘅相咁靚，但飲得出好足料，清甜又清爽。

飲品

食放題就點可以無嘢飲，喺自助區影完相第一件事就喺順手攞埋嘢飲，小弟一起手拎咗芒果汁同蘋果汽酒，飲品嘅選擇實在數唔晒；老婆就唔鍾意飲汽水，話唔健康，相反就較喜歡熱飲，所以，佢就斟咗杯熱菊花蜂蜜，非常滋潤。

創作刺身

食放題，唔易飽肚又較回本，唔使多講都喺刺身啦，雖然刺身選擇多多，但主力瞄準晌B餐重點食物嘅金槍魚腩同創作刺身嘅柚子醋配花海蜇、泰式虎蝦、酒醉鮑魚，用料不賴，食得出食材應有嘅質素，味道、口感都上佳。

創作理料

今回同老婆嚟，太易飽肚嘅卷物、軍艦、壽司就一於拒於門外，只喺試咗一款創作理料：香芒芝味魚生薄，喺店家新品，配搭有特色，芒果搭芝士再墊片薄脆餅乾，唔錯喎。

煮物

老婆就唔食得太多生冷嘢，所以，煮物一類就最啱佢，不過，啲壽喜燒、蟹粥、烏冬怕大鍋，就無謂喇，而瑤柱汁扒豆苗就最好，兼可以加多少少纖維素。講番個豆苗，好嫩滑，個芡汁質感啱啱，帶有鹹鮮味。

一品料理
再落嚟分享吓啲一品料理類，新推出嘅翡翠百鳥歸巢、魚露金不換凍蜆皇當然要試，而推介嘅油鹽焗大頭蝦同御品蠔皇花膠盛宴亦唔可以錯過。單喺睇個名都覺得好架勢，食落真喺有料到，例如凍蜆皇蜆肉肥厚味道有層次，蠔皇花膠嘅花菇肉厚菌香，花膠柔軟有咬口。

天婦羅

炸嘢向來都討人歡心，分別點咗虎蝦、日本南瓜，兩者都炸得夠火喉，香而不膩，外層粉漿又薄又脆，虎蝦爽口鮮甜，南瓜夠粉足南瓜味。

串燒、燒物、炸物

再落嚟呢一轉就繼續喺熱氣嘢，一口氣點咗6款大家都最想食嘅：功夫雞皮虎蝦、香草烤羊鞍、西京燒比目魚、極品金枕頭榴槤燒、3.6牛乳炸鮮奶、巴馬火腿忌廉芝士。羊鞍真喺無得彈，燒得恰到好處，濃濃嘅獨有味道，而榴槤燒真喺滿足到我哋好榴槤之人。此外，雞皮虎蝦亦好有驚喜，比目魚就最討老婆歡心，因為佢最鍾意食魚。

B餐精選

除咗金槍魚腩，B餐嘅重點食物仲有上湯芝士焗龍蝦伊麵、油鹽焗膏蟹，最後衝刺就梗喺要試埋，前者真喺成隻龍蝦，大啖大啖肉，爽呀，而且，伊麵做得恰到好處，沾滿芝士香；而膏蟹有相你睇，勁膏呀，蟹肉亦好鮮甜。

生果

正所謂飯後果，但今日有果王榴槤晌度，都無點食其他生果。最初，老婆已裝咗杯泰國榴槤蓉，堅好食，榴槤香味馥郁，口感絲滑；再嚟，就正情喺食新鮮即開榴槤果肉，榴槤嘅香味直送入口腔，果肉黏滑，正呀喂！

甜品

小弟向來都好鍾意食甜品，所以，臨尾點都要留番啲空間放甜品，先試噝二維碼落單嘅海燕窩椰汁雪耳燉木瓜燉得夠火喉，木瓜又腍又甜，加埋海燕窩、雪耳，好潤；仲有，晌自助區拎嘅原條芒果肉雪條、Häagen-Dazs雪糕、榴槤大福、提拉米蘇大福、芝士餅、楊枝金露，總結一句，實在大滿足。

今餐真喺食得稱心滿意，不單地方大，環境好，食物選擇多，供應充滿，而且，上菜快，又無漏單，招呼好好，啲店員好有禮。雖然無可能試齊所有嘢，但想試嘅都八八九九，算得上盡興而回！

個人評分
味道：9/10
環境：9/10
服務：9/10
抵食：9/10
平均每人消費：HK$460

餐廳資料：
極．大瀛喜日本料理 Kiwami Daieiki
地址：觀塘觀塘道418號創紀之城五期(apm)5樓L5-8號舖
電話：3188 3212 / 3188 3213