環境就唔多講，傳統中式酒家嘅格局，枱與枱嘅密度一般般啦，至少埋邊位唔會出入唔到，樓底又高，空間感算強，所以，喺幾好坐。而且，人手足，侍應跟餐枱數量比例平均，唔會搵極都搵唔到侍應，兼幾好禮貌。隔日同朋友行完城門水塘，再落荃灣千色匯間富臨，個場大到可以擺30多圍，但侍應就見只得三幾個，睇佢哋做到踢晒腳之餘，仲一肚火嘅服務態度。
雖然佢哋有個主餐牌，但見張「快速」點菜紙都有嘢啱食，況且，我哋嚟東海都無話特別想試乜，所以索性晌度一次過點晒啱食嘅菜式。
海底椰雪梨煲大尾魚 $138
其實佢喺是日例湯嚟，卻喺大家全晚最欣賞嘅菜式，因為夠火喉，入口又潤，飲落無味精，的確值得讚佢。湯渣另外碟上，以證明真材實料。
茶樹菇黑椒炒牛柳 $108
黑椒炒就一定喺惹味啲，所以，道牛柳用嚟伴飯就一流，而茶樹菇又喺健康有益嘅食材，炒出有啲油，喺美中不足之處。
大花尾躉兩味$298
先上嘅喺果皮絲蒸頭腩，話雖頭腩，但得堆骨，魚肉好少，最致命喺完全無果皮香，成碟頭腩摷勻得幾絲果皮絲，心諗：唔使咁慳呀嘛！
翡翠炒斑球
碟斑球就似樣啲，伴西芹好吖，降吓血壓嘛，斑球亦炒得嫩滑，不過，份量真喺偏少。
四季豆粟米炒秋葵 $88
粟米，仲以為喺粟米粒，原來喺珍珠粟米，加上四季豆、秋葵，下醬油唔多，爆啲蒜蓉嚟炒，喺一道簡單而頗健康嘅菜式。
瑤柱蛋白炒飯 $98
白飯$12碗，與其叫三幾碗白飯都幾十蚊，舅仔話不如炒個炒飯，餐牌就無列炒飯出嚟，但大路嘅都可以做到。無乜瑤柱又無乜蛋白，佔大多嘅都喺翠玉瓜粒同蔥粒，只可以講個飯炒得夠乾身，但餸料確實少得可憐。
家人知小弟甚好甜品，所以， 慫恿我點都叫啲甜品試吓，過個甜蜜生日，故隨意點咗以下幾款。
香軟麻沙糍 $26
即喺舊時叫開嘅雷沙湯圓，熱辣辣，外皮軟糯，芝麻餡夠香，做得幾好食。
杞子桂花糕 $26
落咗好多杞子，又充滿桂花香，件糕嘅質感爽爽哋，夾起又唔會輕易散開，做得有水準。
特濃朱古力慕絲蛋糕 $28
中式甜點做得好，件西式蛋糕會喺點？雖然無問，覺得似來貨，但朱古力味好濃郁，慕絲柔滑，不過，無諗過喺咁細件，兩啖就無咗，哈哈！
茶位收$12個，另例牌收加一，埋單九百五十幾，唔算貴，亦唔叫平，但以質素而言，就唔算好抵食。嚟東海食飯擔唔擔心中伏，如果當佢街坊酒家，無太大要求，應該都唔需要太擔心嘅！
個人評分
味道：6/10
環境：7/10
服務：8/10
抵食：6/10
平均每人消費：HK$190
味道：6/10
環境：7/10
服務：8/10
抵食：6/10
平均每人消費：HK$190
餐廳資料：
東海酒家 East Ocean Restaurant
青衣青敬路33號青衣城1樓117號舖
2317 8889
東海酒家 East Ocean Restaurant
青衣青敬路33號青衣城1樓117號舖
2317 8889
沒有留言:
發佈留言