Express Bar by Lassana：檸丹妙藥

老友知小弟甚喜歡食甜品，特意送個蛋糕俾小弟試試，老實唔客氣，多謝晒先。又喺Express Bar by Lassana嘅新出品，以往都試過好幾次佢哋嘅蛋糕，如Creme Brulee Cheesecake、焦糖朱古力慕絲蛋糕，對其出品都頗有信心。

今趟嘅新蛋糕喺檸檬慕絲蛋糕（Lemon Tree），定價$128，賣相保持住佢哋慣常嘅作風夠「精簡」，不過，小弟認為普通咗啲，餅面插一片燒乾嘅檸檬片，咁會唔會好睇啲呢？

至於個蛋糕嘅味道喺點先？老友果然有眼光，個檸檬慕絲蛋糕食落清新輕盈，檸檬味好清香，慕絲做得柔滑細緻，底層嘅消化餅底又夠薄，不過，好味還好味，始終覺得唔喺太有驚喜嘅感覺，層次感比較單薄，如中間加一層檸檬軟心或果蓉，增加味道嘅層次，想像起嚟應該會有啲驚喜。

雖然對今次嘅新品覺得有少少不足，但基本功紮實，不足都只哋小弟嘅挑剔啫，哈哈！有專家講，食啲甜點喺可以令人開心啲，我就唔知有幾多科學根據，但食甜點令人有種滿足感，尤其一餐飯之後，所以，我都仲喺信佢喺種心靈上嘅靈丹妙藥！

個人評分

味道：8/10
環境：- /10
服務：- /10
抵食：- /10
平均每人消費：HK$0（朋友送贈）

餐廳資料：
Express Bar by Lassana
天后電氣道169號康宏匯地下
2877 7879