Cafe Corridor：走廊盡頭細味咖啡

晌Shack Tapazaka食完正餐，大家似乎有啲唔夠喉，但又未至於要搵下場食多餐，咁啱友人要買咖啡豆，所以，Cafe Corridor就成為我哋下一場嘆咖啡嘅地方。由於老友喺熟客仔，經常嚟依度入貨，所以，佢非常熟架步。此行目的喺嘆杯咖啡，但亦試番件蛋糕。

咖啡店嘅環境屬小店格局，座位唔多，一張又一張嘅二人咖啡枱，左拍右砌，其實都有少少逼，但因為我哋食完晚餐先嚟，都有啲夜，故客人唔多，仲好啦，靜靜局等我哋可以吹吓水無咁多騷擾。

所有飲品、食物寫晒晌水吧上嘅黑板，前者有各款咖啡、果汁、沙冰……等等，而後者有全日早餐、三文治、多士、沙律及蛋糕。

晌餐牌黑板下，仲整咗個小吊櫃，放咗啲旅遊書，望落好新吓，全部都喺16/17，甚至17/18，啲出版社都好誇張，啱啱先踏入2017，就出到17/18版，友人打趣咁講，成本書嘅內容無改、無更新，隨時仲喺幾年前嘅舊料或錯料，改嘅咪就喺呃人以為最新版嘅年份字樣，小弟深表讚同！

Sea Salt Toffee Tart $35

話題講遠咗，講番啲食，依件海鹽拖肥撻非常眼熟，事後再睇番以往食評，原來數月前曾晌佐敦嘅Café Hillywood食過，明顯喺搵同一個供應商供貨。撻殼入口脆身鬆化，卻唔重牛油味，餡心嘅朱古力慕絲既幼滑又濃郁，面層又灑滿唂咕粉，朱古力味更濃重，而且，撻殼內塗咗一層海鹽拖肥醬，甜中滲出點點鹹味，喺一件好有層次嘅甜點。

Latte $35

雖然咖啡選擇非常之多，但Latte始終喺小弟嘅心水，友人同樣都喺Latte迷，大家各點一杯細味享受。拉花做出3重心形，做得細緻，不過，唔似一般咖啡店沖調得滿滿，仲有啲水位，唔使攪飲落去，口感綿密而均勻細膩，第一口到最尾，味道及口感都一致。

Cafe Corridor晌咖啡界都頗有地位，佢哋嘅咖啡出品真喺毋庸置疑，然而，蛋糕喺來貨，未能睇到佢哋做食物嘅功夫，故此食評未全面反映得晒店家嘅水平！

個人評分
味道：8/10
環境：7/10
服務：6/10
抵食：7/10
平均每人消費：HK$70

餐廳資料：
Cafe Corridor
銅鑼灣羅素街26A地下
2892 2927