京林屋 Kyo Hayashiya：京喜若狂

如果喺抹茶控，嚟到晌日本京都有二百多年歷史嘅「京林屋」一定驚喜若狂，雖然小弟未喺去到抹茶控嘅境地，但一直想嚟京林屋好耐，因為好想試一試佢個林屋抹茶芭菲，不過，之前兩次都見好多人排隊，就打消幫襯嘅念頭。是夜，因為要落銅鑼灣拎糕，就順便睇睇多唔多人，見難得門口無人排隊，就一圓食佢抹茶芭菲之願。

由門面、門口櫃位開始，見到好多京林屋嘅抹茶產品，雖然都喺模型，但就做得栩栩如生，睇見都吸引。

上文話門口唔見人排隊，入到去，無論和座定普通座，原來座無虛席咁滯。小弟得一支公，當然好易攝到個位。整間店雖然裝修簡約，但一室木系，加上兩組和座，白色花花天花佈置，簡樸優雅，已夠特別。

大大本餐牌，圖文並茂，中英日文有齊，方便遊客。但不得不溫提一句，店家設有最低消費，就喺每位客人需點選一杯飲品或一客食品，用餐時間亦有限制，和座為60分鐘，定普通座為90分鐘，並設有加一服務費。

焙茶沙冰雪糕 $58

因為一早已目標好林屋抹茶芭菲，所以，飲品就想試試焙茶系，有冷熱焙茶（焙茶朝薰）、桃味焙茶、焙茶牛奶、焙茶沙冰、焙茶牛奶忌廉、焙茶沙冰雪糕等等，因為打算食個熱嘅抹茶蕎麥麵，所以，就揀選焙茶沙冰雪糕，只比焙茶沙冰貴$10，又同時試到佢嘅焙茶沙冰及焙茶雪糕，一舉兩得。

杯沙冰打得算幾幼細，焙茶味又甘香、又有餘韻，夠晒冰涼，真喺一啖熱辣辣嘅蕎麥麵，一啖冰冰凍嘅焙茶沙冰，感覺好爽；而個焙茶雪糕既有奶香，口感柔滑細膩，唔太甜，抵飲。去到臨尾，留番少少雪糕，打溶入啲沙冰度，變成奶昔，又會有唔同嘅感覺！

抹茶蕎麥麵 $78

抹茶蕎麥麵有熱食，有冷食，同樣都喺賣$78，其實，京林屋嘅食事選擇唔太多，除兩款蕎麥麵，剩低嘅選擇就只有冷或熱食嘅讚岐烏冬及稻庭麵。

熱湯嘅抹茶蕎麥麵佐以一小碟醃蘿蔔，好爽脆，而麵內伴有本菇、蘿蔔蓉及紫菜，配以淡味嘅醬油湯底，令個蕎麥麵顯得更翠綠。蕎麥麵食得出抹茶味輕輕滲出，唔會話好強，但勝在有咬口，沾上蘿蔔蓉引出蘿蔔嘅清甜。

林屋抹茶芭菲 $88

甜點絕對喺京林屋嘅強項，嚟到唔食甜點，好似枉你嚟過咁。由冬日限定、甜湯、布丁、蕨餅、雪糕、冰品、芭菲、蛋糕、卷蛋……等等，一應俱全。

芭菲吸引之處，就喺將（由下而上）抹茶蕨餅、糖漬白桃、忌廉、抹茶軟雪糕、紅豆蓉、抹茶啫喱、白玉丸子及抹茶雪糕一層又一層放埋一齊，好睇就唔在講，一次過試到咁多嘢食，對甜品迷嘅小弟就實滿足死啦。抹茶雪糕甘苦細緻，白玉丸子軟糯煙韌，抹茶啫喱口感QQ，紅豆蓉清香不膩，抹茶軟雪糕香濃軟滑，糖漬白桃清甜軟腍，抹茶蕨餅柔滑不澀，真不愧為店家最受歡迎嘅甜點。

老店即喺老店，京林屋自有其個人之處，抹茶菜式，無論食事、甜點、飲品都層出不窮，睇完一次餐牌，我都講唔到咁多，今晚所品嚐嘅幾樣嘢，就算唔喺一鳴「京」人，都絕對有「京」喜。

個人評分
味道：8/10
環境：8/10
服務：8/10
抵食：8/10
平均每人消費：HK$246

餐廳資料：
京林屋 Kyo Hayashiya
銅鑼灣軒尼詩道500號希慎廣場6樓603-604號舖
3580 1838