Chitose：意麵千尋

走到長沙灣一段嘅青山道尾，屈個彎就進入荔枝角，每逢經過依截街都覺得好靜好靜，附近嘅店舖雖未至十室九空，但就肯定吉鋪唔少。是夜晌附近攞完嘢俾朋友，順便約表姨甥女食餐晚飯，燈火通明嘅Chitose成為我哋嘅選擇。

店內環境裝修得好簡單，水泥牆，五顏六色嘅座椅，卡位只喺木板櫈，坐得唔算好舒服。不過，服務好搭番夠，又免收加一服務費。

求先入門口，已留意到地下塊黑板所推嘅優惠，享套餐加$1就有一客是日窩夫（當然唔喺正價嘅份量啦），其中一款意大利麵套餐只賣$50，所以，兩者都成為我哋選擇嘅目標。

再翻翻餐牌有咩選擇，一打開就喺啲沙律、小食同甜品，之後一版就喺A-J共9款主食類，單點或套餐都得，如選擇套餐就包日式和風沙律及熱飲，另加$15可轉特色飲品。

日式和風沙律

好簡單以胡麻醋汁撈勻沙律菜、洋蔥、蕃茄及青瓜所做成嘅一道帶和風嘅田園沙律，食材新鮮爽脆，開胃清新，依一類沙律只要食材夠新鮮，都唔會點出事。

香蔥五花腩芝士汁意大利麵 $50

原先套餐價要$78，依家$50就有得試，份量仲好足本，睇落唔似將貨就價。唔撩起底下啲意大利粉，差啲以為嚟錯碗拉麵，因為3大件香燒五花腩、紫菜、溏心蛋、蔥花放晒晌面，一派拉麵格。食完依道意日融和嘅意大利麵，確喺有少少驚喜，五花腩鬆化且有層焦香，溏心蛋煮得恰到好處，意大利麵咬口且掛滿芝士汁，以車打芝士做成嘅汁底，稀杰度啱啱好，不愧喺店中嘅推介之一。

喇沙湯海鮮墨魚汁意大利麵 $98

另一道主食，我哋揀咗一道意馬融和嘅意大利麵，因為湯底用上馬來西亞出名嘅喇沙湯，又加入唔少喇沙常用嘅食材，如青口、鮮蝦、魚柳、豆卜，仲有炸響鈴，配墨魚汁意大利麵，滿滿嘅一大碗。個湯底好出色，辣而富椰香，鮮蝦好爽口，魚柳又嫩滑，豆卜吸滿喇沙湯，好味，而意大利麵入口煙韌，可謂真材實料。

飲品餐牌共兩頁，有咖啡、梳打特飲、茶品、特飲、奶昔……等等供選擇。

蜂蜜鮮奶咖啡 +$15

雖然只喺小店一家，但杯鮮奶咖啡絕無求其，咖啡嘅拉花都好細緻，入口順滑而口感平均，醇香嘅咖啡味中滲出蜂蜜嘅絲絲清甜，加$15轉飲佢實在物有所值。

Oreo奶昔 +$15

奶昔沖得大大杯，先飲一口，冰涼富奶香，又帶點朱古力味，再將面層嘅忌廉跟奶昔攪勻，口感比較更柔滑，亦無一種死甜嘅感覺，伴甜品都唔錯。

朱古力雪糕泡芙 +$1

初時晌外面睇見個推介牌喺享套餐加$1就有一客是日窩夫，不過，店員告之窩夫賣晒，改為泡芙，咁只喺加$1又無理由唔試。一客有兩粒，真喺擺明當送俾啲客，泡芙幾鬆軟，內裡夾有朱古力雪糕、忌廉及朱古力碎，味道唔錯喎。

朱古力布朗尼 $45

食一粒泡芙真喺唔夠喉，所以，額外點多客朱古力布朗尼，即叫即做，都等咗十多分鐘。賣相都幾得意，大大件布朗尼之上，加咗件烘棉花糖，並伴有朱古力雪糕及杏仁片，整體食味不俗，烘棉花糖軟綿綿，布朗尼嘅朱古力味亦好濃郁，又有唔少合桃，只喺個人覺得乾身啲，多少少濕潤就一流喇。

舊年年中去咗一轉北海道旅行，落戶新千歲機場，所以，一眼就認出店名Chitose喺指千歲嘅意思，雖然唔知點解店主會揀「千歲」做店名，但小弟都幾喜歡依個名字，因為喜歡北海道這地方，風景靚更喺美食處處。

個人評分
味道：8/10
環境：7/10
服務：8/10
抵食：8/10
平均每人消費：HK$112

餐廳資料：
Chitose
長沙灣昌華街23號地下16號舖
5409 4649