鳳城皇宴 Fung Shing Restaurant：鳳陪到底

話晒晌美孚都住咗一段長時間，睇住依個鋪位由「盈暉海鮮酒家」轉為「凱旋門宴會廳」，之後再轉手為「百樂門宴會廳」，仲諗住由大集團搞會做得長啲（其實都做咗5年幾喇），最近就又再轉，轉為「鳳城皇宴」，哈哈，與其叫轉手，不如叫改名貼切啲，因為百樂門系同鳳城系其實都屬於新光酒樓集團嘅附屬，睇睇新光個官網你就清楚晒。今年細胞小組嘅團年飯揀依度，原因有三，第一，新店自然有少少貪新鮮；第二，鳳城幫襯過好幾次，對其出品有信心；第三，難得就算臨近過年嘅星期日晚，都無分時段。講開依一班小組組員，同行廿數載，搞親咩活動都奉陪到底，團年飯當然積極出席啦！

上文講到「改名」，成間店，對比以前百樂門宴會廳嘅食評，除咗門面、地氊換過，基本上成個內籠、吊燈、枱櫈都喺沿用舊嘅。講真，其實佢個場真喺幾富麗堂皇，少柱位，掛咗幾盞大型水晶燈，加裝彩色射燈，又搭晒台，擺婚宴喺唔錯選擇，唯一先天不足就喺位置有少少吊腳啫。順帶一提，此鳳城不同彼鳳城，北角同太子嘅鳳城算叫做老店，由始創人嘅徒弟集資開嘅，而其他鳳城則由北角店主廚夥同新光酒樓集團所開嘅（來源：維基百科），更被註冊為商標。

是夜座無虛席，亦見有翻枱，實在旺場。我哋一行10大2細，一共12人齊濟濟一堂，亦都夠晒熱鬧！由於喺團年時段，所以，餐牌就得一張「新春小菜紙」，當然亦有套餐，但唔划算，所以，實惠啲散點小菜，此外，茶位$12個，收足我哋12人，而酸菜$15碟，收我哋3碟錢，嚟得酒樓就預晒依啲數。

欖角焗肉排 $88

雖然我哋有叫個生炒糯米飯，但點都要叫幾碗白飯，一來有啲組員喺「飯桶」，無飯到肚唔安樂，二來個欖角焗肉排超惹味，欖角餸飯真喺一流，加上啲肉排大大件，又好肉地，啖啖肉，正呀。

家鄉煎蓮藕餅 $88

好唔好食在乎手工，蓮藕粒切得夠細，又唔好太碎，咁先有咬口，豬肉搓得夠時間，入口先鬆化，下點芫茜吊吊味，加上煎得焦香脆口，做得穩打穩紮嘅手工菜。

脆皮炸子雞 $268（半隻$138）

脆皮炸子雞晌鳳城都算招牌菜之一，佢哋做嘅炸子雞確有一手，睇落佢哋用嘅唔會用太大隻，所以，雞肉嫩滑，入味，皮下脂肪又唔多，而外皮炸得金黃香脆，脆到好似威化紙咁，咔嚓應聲裂開，蘸少少喼汁可以去去油膩感，沾少少淮鹽就更鹹香惹味。

煎釀鯪魚 $148

順德桂魚卷、煎釀鯪魚及窩貼大明蝦喺店家嘅幾道順德經典名菜，食鯪魚就最怕骨多，但依一道煎釀鯪魚就喺講手工，講心機，拆肉、起骨、打膠，再釀番入條鯪魚度香煎，原條連頭連尾上碟。食落故然香口，又食唔到碎骨，魚味濃郁，魚身又彈牙，唯一喺調味重手咗，有少少過鹹。

沙田豆腐 $88

曾睇過啲文章介紹，以前沙田嘅山水豆腐非常有名，皆因沙田河谷嘅水清澈冰涼，做出嚟嘅豆腐會特別清香嫩滑。全盛時期，沙田有成十多間豆腐工廠，衛生原因，依家就梗喺無晒山水豆腐啦。沙田豆腐，都喺借意表原夠嫩滑，的確，咪睇碟豆腐好似一般紅燒豆腐咁普普通通，入口真喺堅滑溜，又有豆香。

翡翠炒帶子 $168

收得你百六蚊一碟西蘭花帶子，都無迤住做，西蘭花煮得翠綠爽口，而帶子唔喺啲奀挑鬼命嘅貨色，粒粒都有番咁上下大粒，厚肉爽口彈牙，配少少燈籠椒，賣相色彩靚仔啲。

瑤柱扒豆苗 $118

由始至終食嘅幾道菜，都交足貨，依道瑤柱扒豆苗，豆苗好嫩口，而瑤柱絲睇落唔似出面有啲中菜館咁，用啲又細又爛嘅瑤柱嚟做，只喺得啲瑤柱碎，眼前依碟稱得上瑤柱絲，一絲絲好大條，入口口感都唔同啲。

生炒糯米飯 $108

相信依家都好少店家會做到真正生炒，都喺煮好再炒，加上食落啲飯粒煙糯得嚟，又有少少黏同腍，所以，我覺得都喺先煮後炒，雖然唔算最好，但都足以收貨。

西米焗布甸 $108

甜點唔喺蟠桃大壽包，就喺西米焗布甸，西米焗布甸晌鳳城好馳名，布甸一上枱熱氣騰騰，猶如新鮮出爐，焗得面面帶微焦。好有蛋香，中間喺幼滑嘅白蓮蓉，軟滑、清香、少甜，實在喺水準之作。

雖然今晚全場滿座，見啲店員做到飛沙劈石、行軍迅速咁款，但服務都算OK，換碟添水都做足，喺去到西米焗布甸叫換碟先有人搞，而且上菜都夠快，一碟接一碟，值得俾多少少貼士。

個人評分

味道：8/10
環境：8/10
服務：8/10
抵食：8/10
平均每人消費：HK$160

餐廳資料：
鳳城皇宴 Fung Shing Restaurant
美孚景荔徑8號盈暉薈1樓126號舖
2328 8398