鹹酸菜、花生小碟
食潮州菜，除鹵水以外，最懷念仲有鹹酸菜，餐前小食就有鹹酸菜及脆花生，小弟細個都試過加多碗潮州粥，就當一餐。
今次餐牌就唔多提，因為好大本，頁數多，影起嚟較麻煩。但打開餐牌，就有介紹餐廳嘅品牌，先明白餐廳嘅英文名何解，所以，未開餐，先飲番杯功夫茶。
嚟食潮州嘢，都好難會錯過潮州鹵水，有鵝肉片、鵝掌翼、五花腩肉、牛展、豬大腸、墨魚片、豬腳蹄、拼盤、雙拼……等等。有小份，亦有例牌選擇，更列明小份1-3人享用，例牌就4-6人享用，俾大家叫餸時有個預算。
滷水骨香鵝肉片 $148
滷水鵝就最誘人，鵝肉切片大細厚薄均一，肉質柔軟有口感，鵝味濃，滷水醇香沉實，果然喺老店嘅手勢。墊底嘅滷水豆腐，同樣軟滑帶淡淡豆香。
除鹵水，仲有啲潮式嘅特色前菜，如潮式炸魚皮、潮州咸雞，潮式煙燻鴨胸。
潮式煙燻鴨胸 $88
碟鴨胸嘅賣相都幾靚仔，其實，小弟都唔喺太知潮唔潮式嘅分別，但個鴨胸淋上蜜糖橙汁，下底墊有鮮菠蘿片，幾新派嘅感覺。味道又幾唔錯，酸甜嘅醬汁平衡番鴨胸嘅脂油，食落更感輕盈，而煙燻嘅香味令鴨胸更有個性。
廣東人一向都喜歡飲湯，潮州人都喺，所以，餐牌內有多款湯羹選擇，下火之選就梗喺經典嘅咸菜豬肚湯。
咸菜豬肚湯 $128
食完啲前菜、小食，一鍋熱湯，倍感窩心。湯內嘅胡椒味十足，帶點辛辣刺激，而咸菜所引出嘅酸香，唔會太過分；豬肚件爽腍，無一點豬燥味，可知洗豬肚喺件幾煩瑣嘅事。
百樂一品煲 $198
啲咩拼盤、什錦鍋之類包羅萬有，就最易附合到唔同人嘅喜好，所以，依一道百樂一品煲集齊多款海鮮、海味，如鮑魚、帶子、花膠、海參、蝦球，伴啲雞柳、西蘭花、冬菇，可見用料「一品」。雖然唔喺樣樣試晒，但花膠軟滑富膠質，蝦球又大又爽彈，就連粒冬菇都好食好多，哈哈！
主餐牌內實在有太多選擇，正所謂不時不食，所以，店方都推出唔少廚師時令推介，想煩少啲就可以不妨晌依度着手。揀嚟大芥菜煲、羊腩煲及臘味飯，一窺質素如何。
胡椒排骨大芥菜煲 $98
冬天食煲仔菜寧舍有風味，而且，以煲仔熨住，啲餸菜亦無話咁快凍。胡椒香味當然突出，排骨好鬆化，大芥菜吸收咗湯嘅精華，自然更好食。最後，煲內嘅湯同樣飲得，所以，飲得就唔好嘥，節儉喺潮州人嘅特性。溫提，多男生驚唔夠飽肚，可以加$20加蕃薯。
潮式北蔥羊腩煲 $288
是晚重點菜式卒之登場，羊腩煲本身跟生菜，但加$20可以轉其他蔬菜。一大鍋羊腩煲需先明爐煮一煮，一開蓋真喺芳香到不得了。問過店員，何謂潮式，原來主要分別喺去晒骨，所以食起嚟啖啖肉，兼且好酥化，羊羶味唔霸道。而醬汁濃杰度啱啱好，將鮮嫩嘅豆苗沾上醬汁食，絕對升級晒，其次支竹、馬蹄亦不能錯過。
金不換檸檬蒸烏頭 $128
潮州菜中凍烏頭、剝皮魚都喺幾多人鍾意嘅菜式，天寒地凍食蒸魚，烏頭蒸出嚟意外地嫩滑，更以金不換、檸檬蒸，別有一番滋味。提一提，人少可以嗌半條，只賣$68！
合時臘味飯 $240
臘味飯壓軸登場，睇見一大煲臘味飯，而臘鴨、潤腸、臘腸、臘肉鋪滿整個飯面，非常吸引，幾日前先同啲死佬晌御苑皇宴食過臘味飯，估唔到咁快又再遇上。合時臘味飯其實喺斷位計，$60客，4人起，不過，眼前依煲喺4人份，已足夠5、6人享用。
小弟就鍾意落多少少甜豉油，所以，豉油另上就方便客人要多要少，軟熟嘅飯粒添了豉油，又有臘味滲下嘅油香，真喺好甘香。臘味嘅質素亦相當高，臘腸好有玫瑰露嘅酒香，膶腸極之膶口，內裡嘅膶肝好豐腴，臘鴨同樣油潤而酥香。
喜歡食甜品嘅朋友都不愁無選擇，一大個甜品餐牌，足有10款之多，當中不乏「潮」味之選。
蛋白杏仁茶 $38
食咗咁多油膩嘢，清香嘅蛋白杏仁茶就能最討我歡心，杏仁味又香又濃，質感順滑，蛋白又多，食埋個糖水，暖透心兼好滿足。
果然有老店晌背後撐腰，整晚所試嘅每道菜式，都高水準，具質素。咪睇嘅員工都喺上年紀，反而個個都敬業樂業，禮貌周周，服務熨貼。最後，來多一杯功夫茶作結，消膩解滯，非常舒服！
個人評分
味道：8/10
環境：8/10
服務：8/10
抵食：8/10
平均每人消費：HK$300
味道：8/10
環境：8/10
服務：8/10
抵食：8/10
平均每人消費：HK$300
餐廳資料：
百樂小館 Chateh
尖沙咀彌敦道132號美麗華商場食四方4樓4A1-4A2號舖
2157 9949
百樂小館 Chateh
尖沙咀彌敦道132號美麗華商場食四方4樓4A1-4A2號舖
2157 9949
沒有留言:
發佈留言