雖然餐廳喺禁煙，但近橫巷邊嘅偷雞位，會成為吸二手煙嘅區域，要有啲心理準備。
既然喺日式居酒屋，和食自然喺主打，串燒、燒物、煮物……等等，據店長介紹，佢哋用料講究，更推介店中嘅二人套餐，$398已包括頭盤、串燒拼盤、主食、甜品及飲品。此外，人多少少，就可以諗諗個四人套餐（$798）。
白酒（Chardonnay）
餐飲可以揀汽水、果汁或餐酒，以配合唔同人士嘅需要，雖然小弟極少飲酒，但一杯半杯都無問題，況且晌唔蝕底嘅驅使下就更揀白酒啦。評酒我就自問只會獻醜，由友人代評吧！佢話酒身圓滑，有豐富果香，酒精度唔高，非常易入口。
薄切炙烤劍魚片
老友怕食生牛肉，故劍魚片喺我哋唯一選擇。一客共有4片劍魚片伴沙律，魚質非常新鮮，佐以辣蘿蔔蓉及蔥花，鮮甜以外，多添幾分層次；底下墊有爽脆嘅沙律菜，以柚子醋、醬油拌過，食味不俗，但每人只得兩片，實在唔夠喉。
蒜蓉法包
雖然焗得香脆，但特色欠奉，既然喺居酒屋，何不晌法包之上配啲日式食材？
串燒拼盤
餐牌列明有岩手雞腿肉、岩手雞軟骨、牛小排、鮮菇、迷你紫薯，整體而言，啲串燒有質素，唔止用料靚，燒得啱啱好，好似啲牛小排嫩腍富肉汁，唔會燒到柴乾咁，而雞軟骨亦好好食，有嚼頭又有脆口感，啲迷你紫薯亦討人歡心，粉甜有薯香。不過，每款只得一串，即每人只得一小口，二人餐而言，份量始終覺得有啲偏少。
日式牛油炒花蛤
依道炒花蛤做得出色，雖然簡單，但入口既唔會有沙，大隻厚肉，肉質嫩滑而鮮甜，散發濃香嘅牛油味，卻與花蛤鮮味保持平衡。但以一客6隻嘅份量，似前菜多過似一道主食。
和風海鮮炒烏冬
初時睇餐牌，真喺好易產生誤會，以為一喺就和風牛肉炒烏冬，一喺就海鮮炒飯，原來可以互相拼配。雖然嚟到最後嘅一道菜，亦喺主食，但唔喺想像中般多，然而，質素都仲喺保持到，大蝦、帶子、花蛤，睇得出海鮮料不賴，烏冬配日式燒汁炒得柔靭有彈性。可是既為二人餐，啲海鮮料每款至少有兩件喺咪附合大眾期望啲呢？
甜品晌餐牌中咁寫法，我以為喺夾埋選其中一款，實情喺每人任擇一款，咁就唔使考慮每款各一試勻啦。
綠茶果凍配雪糕
話果凍，我就覺得似喺羊羹，因為咬落煙靱軟糯，而綠茶味濃香帶甘；配紅豆雪糕可能喺指定動作，不過，眼前所見喺配黑芝麻雪糕，芝麻味好香濃，相襯度都還可以，但可能先入為主，仲喺覺得紅豆雪糕嚟得襯啲。
金薄梅酒啫喱
加入金箔，自然顯得更貴氣，但跟啫喱嘅色澤相若，未能更突出呈現到，反而加片薄荷葉可令賣相更靚仔。啫喱帶有好酸香嘅梅子味，質感做得滑嘟嘟，酒香亦緩緩散發於口腔內，不錯啊！
睇完上文，可能你都估到小弟嘅總結會點寫，用料確實具質素，不過，以二人餐而言，份量相對少，但喺當你諗諗，晌度喺以居酒屋嘅心態嚟幫襯，飲吓酒，食吓嘢，唔喺嗰種要食到飽上心口嘅，就會明白質素同氣氛先喺重點。
個人評分
味道：8/10
環境：7/10
服務：8/10
抵食：6/10
平均每人消費：HK$200
味道：8/10
環境：7/10
服務：8/10
抵食：6/10
平均每人消費：HK$200
餐廳資料：
Shack Tapazaka
銅鑼灣耀華街1-1A號地下
2555 6058
Shack Tapazaka
銅鑼灣耀華街1-1A號地下
2555 6058
沒有留言:
發佈留言