由門面到內廳，都極富中國色彩，環境卻又不失高雅。右邊一排喺一個接一個嘅廂房，但據了解，如果無人訂房 亦作為堂食散枱之用。
講明消費高，淨喺品茗，茶錢都收$28-$38位，但款款都喺靚茶。我哋揀飲福建安溪鐵觀音，茶色清徹，茶味醇厚芳香，誇張啲講，入口真喺有份心曠神怡，就連茶壺都精緻過人。
餐前小食喺烤麩，比起啲花生、蝦片、酸菜更有誠意，烤麩入味又咬口。
餐牌有兩大組，一個主餐牌，喺各式散點菜式，另一個就主要擺咗各式套餐，如午市商務套餐、尊貴晚市套餐及一些6人晚市套餐……等等。我哋所食嘅喺尊貴晚市套餐，會員價每位$648，非會員就要$708 + 10%，兩位起。
先上嘅前菜，就有4款精緻嘅美食，包括清香柚子凍鮑魚、涼拌海蜇頭、意大利黑醋手拍黃瓜及招牌黑毛豬叉燒，雖然喺食中菜，但整晚嘅流程所有菜式都主要以位上。
清香柚子凍鮑魚
鮑魚唔喺幾多頭幾多頭大大隻嗰啲，喺一口呎吋，一啖入口，慢慢咀嚼，柔韌而鮑魚味慢慢滲出，混和飽滿嘅柚子肉，清新嘅柚子味更吊起鮑魚嘅甜味。
涼拌海蜇頭
海蜇皮（即喺一般做到好似橡筋嘅海蜇）較多食，海蜇頭則相對食得少，海蜇頭較厚身，食落就更爽脆，更有咬口，並帶點蒜香，伴有木耳及蕃石榴，好清爽嘅一道前菜。
意大利黑醋手拍黃瓜
手拍黃瓜覺得唔喺重點，重點反而似喺落晌意大利黑醋中，醋香醇厚，酸香得嚟唔嗆喉，而黃瓜夠新鮮爽脆已OK喇。
招牌黑毛豬叉燒
件叉燒肥瘦適中，睇落好似有點點肥膏，卻喺入口不膩，做得好軟腍，而且，燒得外層焦香，佈滿蜜汁，不愧用黑毛豬所做嘅叉燒。
鮮人參竹絲雞燉鱷魚尾膠功夫湯
「功夫湯」唔單止以潮州嘅功夫茶咁款奉上，原個紫砂茶壺又能更保溫，此外，聽侍應介紹，鱷魚尾膠要浸發成個星期，可謂功夫多，不過，佢本身就無乜味，質感軟腍，入口好膠，幾似食花膠嘅感覺，最重要含豐富骨膠原蛋白；此外，貨真價實，成條鮮人參，夠補氣。倒出嚟湯色清澈，味道醇和帶甘，滋潤平和。
輪到主菜登場，主菜分別有3道菜式，包括特色脆皮京都骨、黃金沙律汁蝦球及西班牙火腿米皇浸時蔬，睇名就好似無咩特別，但食得到師傅手功紮實，亦唔會過於花巧，而忽略食材嘅重要性。
特色脆皮京都骨京都骨與我哋慣常所見有很大分別，以豬肋骨肉嚟做，較有肉地又鬆化，而且，做成一大件，難以一啖搞掂，故備以刀叉享用。切開外層粉漿薄而超脆，唔講得笑，估唔到脆到好似食薯片咁，而個醬汁啱啱好包住件京都骨外層，卻無多餘嘅汁，酸甜細緻。
黃金沙律汁蝦球雖然件蝦球無講明以咩蝦入饌，但相信唔喺普通貨色，因為，蝦球大過一個乒乓波有多，而且，鮮爽到不得了，絕對食得出喺靚料；面頭塗上嘅沙律汁，估計有調校過，所以嗒落無咁酸，底下再伴以輕煎過嘅茄子，軟腍好食；反而，食唔出碟面黃色嘅醬汁，初時以為喺芒果汁，但一食就知肯定唔喺，有少少似以蛋做嘅醬汁，不過，味道唔強悍。
西班牙火腿米皇浸時蔬
時蔬採用豆苗，色澤翠綠，入口無渣，口感柔嫩，最得意喺配個米漿，好有米香；雖然，聽落咁嘅組合好寡，但加咗一片西班牙黑毛豬火腿，成件事可以唔同晒，火腿鹹香油潤，不妨鎅開幾小片，夾住啲豆苗同食，包你感覺好唔同。
魚湯斑球泡飯
主食上場喺一道泡飯，外表稱得上平平無奇，但亮點在於個魚湯，集鮮濃香，絕無腥味，再加啲炸過嘅米粒，令個泡飯多重口感；況且，啲斑球好嫩滑，又唔會碎濕濕，飯量又唔少，食埋個飯就一定夠晒飽。
紅棗千層糕
餐牌中嘅精選甜品喺無我揀，不過，紅棗千層糕都好啱我哋。紅棗味夠突出，亦頗清甜，一層隔一層共8層，唔喺難，但睇得出師傅願意花多少少時間製作，喺誠意嚟。
成餐飯，除咗好食，菜式都賞心悅目，自不然廚師嘅手勢功不可沒，更喺服務貼心，菜式位上固然高雅啲，然而侍應亦多咗功夫要做，此外，佢哋都好醒目，主動為客人添茶、換碟。老實講，大公館定價絕對唔便宜，但唔介意花多少少錢，確可以換嚟好嘅服務同精彩美食！
個人評分
味道：9/10
環境：8/10
服務：9/10
抵食：7/10
平均每人消費：HK$650
餐廳資料：
大公館 Greater China Club
荔枝角長義街9號D2 Place一期10樓A號舖
2743 8055
大公館 Greater China Club
荔枝角長義街9號D2 Place一期10樓A號舖
2743 8055
沒有留言:
發佈留言