石屋咖啡冰室 Stone Houses Cafe：一石二鳥．又食又睇！

因為老婆晌九龍城上堂，經常由樂富行過去，行經石屋家園發覺原來有家餐廳「石屋咖啡冰室」，試過之後話好好食，一於搵次帶我嚟試吓，所以，就趁2016嘅最後一日，晌燦爛嘅陽光下，嚟嘆餐午飯，懶洋洋、悠悠閒渡過一個中午。

嚟石屋咖啡冰室食嘢，我覺得賣點就喺環境，相信唔少人都知佢喺三級歷史古建築活化而成嘅餐廳，有關石屋家園嘅歷史，小弟就唔費唇舌多講，貼上佢嘅簡介單張，自然一清二楚。

其實，佢嘅用餐環境都好正，室內配合番石屋嘅環境，貼上舊花款嘅瓷磚，又掛上唔少舊產物、舊海報做裝飾，帶點懷舊風，有種老味道。

仲有樓上雅座，夠晒靜局。而且，環境仲保留原有設施，天花更喺木瓦結構，保養得好好，實在難得！

至於，露天茶座位更喺眾多客人嘅心水座，尤其是日中午，絢爛嘅陽光，清爽嘅氣溫，開揚嘅環境，感覺真喺一流。每張枱都撐起太陽傘，唔使怕陽光直接照射，卻又享受到陽光嘅溫暖。怪不得小情侶、兩三知己或一家大細都喜歡揀坐依度。故此，餐後我哋都多坐一陣睇睇書。

點餐方面採用半自助形式，先到石屋內點餐、俾錢，再由店員送上，而餐具、調味料就則到餐廳尾自由取用。雖然，餐後有店員會收拾餐具，但不妨多行一步，將餐具送回去水吧！

基本餐牌得一個，包括多款經典冰室食品、特色咖啡、奶類、茶類、特飲、沙冰、全日早餐及下午茶餐……等恒常提應。

主餐牌以外，另有一款全日供應嘅特色比高包。而且，店子不需加一服務，更實惠。

仲有，每日午市時段供應嘅套餐，定價$48-$58，配餐飲，但只有3款選擇：蘑菇雞扒飯、蕃茄芝士牛肉意大利粉及烘脆煙火腿芝士比高包。

賓尼迪蛋配煙肉+英式鬆餅 $48

睇住送上枱嘅兩粒賓尼迪蛋嘅蛋黃盪吓盪吓，已感到水準差唔得去邊，雖然，切開啲蛋黃唔算「扒扒聲」咁流，但慢流嘅效果就表示蛋黃帶點黏力，濃郁嘅蛋香味再配合微酸嘅荷蘭汁及鬆軟嘅英式鬆餅，真喺好食。

另再試試夾上煙肉，多份鹹香，味道就更有層次，不得不講，煙肉都睇得出唔喺得啲肥膏嘅普通貨色，煎得又唔會太乾太硬。順帶一提，伴碟嘅沙律菜及粟米粒，淋上嘅應該喺自家調嘅千島汁，唔會得會酸字，亦無一撻撻醬嘅情況，加埋杯餐飲整體只賣$48，實在超值。

蘑菇雞扒飯 $55

驚份賓尼迪蛋唔夠飽肚（其實都夠），所以，另一個主食就揀午餐嘅雞扒飯。對比起個蛋，賣相就明顯普通啲，話雖如此，亦見到少少心思位，米飯砌成貝殼形，伴碟嘅沙律菜及粟米粒淋上嘅唔喺千島汁，而喺襯番個胡麻汁，即喺無迤住做。至於件雞扒，份量唔多，只得一件，但都嫩滑無雪味，個蘑菇汁亦做得唔錯，整個飯屬平穩之上。

雖然套餐已經喺配即磨咖啡，不過，咁好環境，就當然想飲得更好，再者，自助餐具櫃對出，見師傅不時即場炒豆，嗰朕香氣好似勾魂咁叫你試佢啲靚嘢。

榛子鮮奶咖啡 +$10

轉鮮奶咖啡，都只喺補多10蚊雞，絕對划算，點解？咁靚嘅貓咪拉花都值啦，然而，入口嘅柔順感略差少少，感覺奶泡跟濃縮咖啡溝得未至最「勻巡」，但醇香度一流。

茉莉花茶

由於啲花茶唔喺用茶包沖泡，所以，唔知店家用咩品牌，但入口很有茶香，茉莉花香幽幽而隨風飄。

晌個咁好、咁悠閒嘅環境，只喺食個午餐實在未夠喉，所以，臨尾再點客甜點細細嚐、慢慢嘆。佢哋提供甜品組合，一客甜品配一杯餐飲，賣$48-$58，如果唔要嘢飲，可以減$10，結果就點一客蘋果批。

蘋果批配雪糕 $48

依個蘋果批喺小弟真心加超值推介，驚喜位有兩點，第一喺送到嚟嘅批喺熱辣辣，而配合個雪糕球，絕對食出冰火之效。第二，批殼鬆化富牛油香，內裡填滿唔只蘋果肉，更有蘋果蓉，蘋果香無出其右，兼且混有玉桂，味道實在一流。再者，雪糕更唧上小弟至愛嘅甜醬「焦糖漿」，我實加分俾佢架。

講明活化，就唔好嚟食一餐就算，因為餐廳旁另一室僻為主題展覽館「文物探知中心」，現在就正正做緊「消失的地標 - 啟德機場」，雖然展廳唔大，除歷史介紹，有唔少珍貴昔日圖片及機場未發展時嘅原貌，懷緬下又好，俾小朋友知下又好，都值得入去睇睇。

此外，樓上亦設有展板介紹石屋家園嘅歷史及九龍城嘅今昔，而石屋內仍保留昔日用房時嘅情景，如廚房、寢室。

暖和嘅陽光底下，享受嘅唔止喺美食，賓尼迪蛋及甜點都好出色，仲有享受嗰份無拘束嘅悠閒，花費又唔多，值得再訪。

個人評分
味道：9/10
環境：9/10
服務：8/10
抵食：9/10
平均每人消費：HK$80

餐廳資料：
石屋咖啡冰室 Stone Houses Cafe
九龍城聯合道133號石屋家園
2325 0131