Snkrholic：醉佳拍檔

雖然小弟唔喺籃球迷，但晌公牛最顛峰嘅時代，都識邊個喺佐敦、柏賓、洛文，最佳拍檔三劍俠。嚟到依間新奇波鞋鋪「Snkrholic」，無鞋賣，但可以買醉，店內唔少外地及本土手工啤，更有唔少餸啤酒嘅小食。

講到Snkrholic，唔可以唔提佢嘅環境，店舖地方唔大，但絕對有唔少對籃球迷嚟講嘅亮點，由門口到室內，不難發現「珍藏」，簽名球衫、絕版波鞋，又有啲搞作嘢，天花光管籃球場，就連夾餐牌用嘅墊板都喺塊球場作戰板。

同老友研究吓有咩好食先，頭版就喺一個任飲晚餐，兩個鐘任飲，加一款主菜，好飲之人嘅超抵之選，不過，我哋真喺高興吓啤一啤，而老友亦知我唔喺好酒之人，所以，依個晚餐唔喺好啱我哋。

反而，小食就啱我哋啲，不過，唔知喺咁啱得咁橋，定唔好彩，打算叫嘅幾款嘢食都無貨，如遠程大炮、籃板皇意大利飯，感覺有啲可惜啫。

咁就順便介紹埋店家供應嘅飲品，晌餐牌內你會搵到多款世界各地嘅特色生啤、手工啤，為照顧小部分唔飲酒嘅客人，亦有啲非酒精嘅選項。

而有部分手工啤則未有列入餐牌內，但就全放晌水啤前嘅嘅位，唯一麻煩啲喺要走埋去逐支睇喺乜，不過，亦可以詢問店員有咩推介，此外，無標價錢亦喺另一麻煩事，吓吓要問價錢好似有啲尷尬。

Day of the Dead $88

老友所揀支手工啤酒精度只喺8%左右，所以，飲咗唔使死。佢話支啤酒幾好飲，麥味重，又帶微微果香，原來成份中有加入啲菠蘿，頗有個性。

Snkrholic Good Good Beer $118

我就乜都唔識，淨喺識叫店員介紹支酒精無咁重嘅推介俾我，而依支同本地薑「麥氏釀酒廠」合作嘅手工啤就真喺啱晒我。因為一來酒精度只得5%，二來加入紅菜頭汁釀製，故倒出嚟嘅啤酒都紅紅哋色，非常之易入口，味道輕怡。

雙層味覺薯條 $55

底下墊咗啲沙律菜，而幼身薯條塞滿小鐵罐，咁何謂「雙層味覺」？就喺除混和芝士醬之外，仲加咗啲藍莓醬，唔算話超驚喜，但就幾得意。

鵝肝窩巴配蘋果醬 $88

啱唔無晒窩巴，店員問改用多士介唔介意，我哋都無乜所謂嘅。一客有兩件，賣相做得幾靚仔，而且鵝肝都幾大件，蘋果醬塗滿晌多士上，夾埋件鵝肝一口咬落去，油香盤繞於口腔中。

洛文漢堡 $98

餐牌中嘅漢堡三劍俠，唔知點解佐敦竟然喺「身價」最少嗰位？而我哋就揀身價最高嘅洛文漢堡（牛肉漢堡），以竹炭包夾滿多款材料，有炒洋蔥、煙肉、芝士、牛肉、蕃茄、生菜，口感豐富，件漢堡牛超厚之餘，肉味濃，又鬆化。

西班牙豬鞍配蜜糖芥末汁 $128

個西班牙豬鞍做得有板有眼，並伴有薯菜，不過，都只喺普通嘅沙律菜搭啲脆炸薯條，而豬鞍幾有肉味，肉質帶點爽，百零蚊貨仔都唔抱太大期望，但依家食落都算唔錯。然而，個蜜糖芥末汁似燒汁多少少，因為覺得個芥末味唔突出。

我哋正餐時段嚟，客人唔多，但越晏越多人，啲人都喺啤一啤，嗌啲小食。晌度啤吓感覺又幾輕鬆自在，食物質素唔好期望太高，如果喺籃球迷，更可睇睇番電視所播放嘅昔日精彩比賽片段，話題相信會更多。

個人評分
味道：7/10
環境：7/10
服務：6/10
抵食：7/10
平均每人消費：HK$210

餐廳資料：
Snkrholic
旺角煙廠街31號地下
2387 9828