Pati by Lassana：Pati．百變．自選午餐

應該都有成年無嚟過Pati食嘢，應朋友之約，嚟食吓嘢，傾吓近況，朋友大嘆依家啲生意難做，所以，小弟就選擇打工，雖然無出頭，勝在風險細啲。今日嚟到依個廠廈食堂嘅美食廣場，相對咁多間店舖，Pati確喺有幾多人幫襯喎！

環境喺美食廣場格局，以前食評都有介紹，所以，都唔多提，睇相就知喺點。

上次嚟食意粉餐，今次就想食番自選午餐，有沙律、主菜及配菜，抵啲嘛。睇番佢個價錢牌，時隔一年，自選沙律餐賣$46、一人自選午餐賣$63，兩者都無加到價，只喺二人自選午餐賣$120，加價輕微，全部包基本茶啡、果茶，改其他先要加錢，而份量仍然俾咁多，保持咁抵食。

沙律類

沙律共有5款選擇，都唔喺「求求其其」嘅款式，包括甜薯沙律、螺絲粉沙律、昆士蘭沙律、煙鴨胸沙律及凱撒沙律，睇得出用料不賴及製作認真嘅出品。

主菜類

除多款肉類，仲有多款特色麵包，前者共有5款：炸蟹餅、日式烤雞扒、日式燒春雞、烤鴨脾配香橙燒汁及醬燒豬肋骨，真啖款款都想試；至於後者，亦有4款選擇：醬燒豬柳三文治、白汁碎蛋三文魚牛角包、巴馬火腿車打芝士三文治及吞拿魚三文治，啲包款仲要喺意式拖鞋包、牛角酥、墨汁包等特色包款。

配菜類

依個類別都無迤做，至少唔喺啲普通炒什菜、炸薯條，共有4款選擇，分別喺炒雜菇、水牛芝士焗西蘭花、焗忌廉菠菜及美式焗薯。所以，朋友都話抵，晌Oliver's Super Sandwiches淨食個焗薯都幾十蚊啦。

甜薯沙律、醬燒豬肋骨伴焗忌廉菠菜

果然份量十足，啲甜薯有雞蛋黃同紫薯兩款，兩款都粉甜又有蕃薯味，同樣以烤焗製作，感覺寧舍香；豬肋骨唔止烤得鬆化軟腍，一切就離骨，而且個醬汁濃香惹味，入晒落啲豬肋骨度；而焗忌廉菠菜都好食，啲菠菜焗到好綿好滑，整體嚟講，確喺有質素，抵食，唯一挑剔喺始終快餐模式，雖然睇見店員喺晌下面暖櫃取出豬肋骨，非玻璃櫃面，但主菜及配菜未夠熱辣喺會打少少折扣。

煙鴨胸蜜桃沙律、炸蟹餅配炒雜菌

友人激讚佢啲炸蟹餅好食，話雖然蟹肉唔算超多，亦確喺食到唔少蟹肉，又炸得脆口甘香唔油膩，抵俾個讚。再配個蜜桃沙律，清爽一下，煙鴨胸又鹹鹹香香，加埋個炒雜菌，友人覺得喺完美組合喎，佢又真喺有啲誇！

鮮奶咖啡 +$6

餐飲就升一升級，補少少要杯鮮奶咖啡，沖得唔算好好，奶泡亦沖得有啲失準，但個咖啡入口仍然醇香。

雖然時隔一年，難得水準都保持到，價錢又無乜點貴，值得翻兜再幫襯！

個人評分
味道：7/10
環境：7/10
服務：8/10
抵食：8/10
平均每人消費：HK$66

餐廳資料：
Pati by Lassana
荔枝角青山道688-690號嘉名工廠大廈地下VeryFood Court 11-12號舖
2393 0888