Cassio：情迷西班牙……小食

後生時算叫做膽粗粗闖蕩過歐洲，不過，西班牙卻喺未踏足過嘅國家，有計畫希望依三、四年內可以成行前往這歐洲最西嘅國度。是夜，同幾位朋友嚟到Cassio，先感受一下西班牙小食Tapas嘅魅力。

晌雜誌睇過其介紹，Cassio基本上可以講喺倫敦著名餐廳Barrafina嘅延續姊妹店，因為不單採用上Barrafina部份菜式，其他嘅都喺由Barrafina為Cassio創作，廚房更晌當地受訓，既然Barrafina已獲米芝蓮一星，Cassio嘅水平亦唔會差得去邊。

餐廳位處LKF Tower二樓，接待處嘅女服務員會為妳引路，如身穿大衣更可安排代為保管。而餐廳大致可劃分為酒吧、用餐區及露天平台。恰好嘅燈光，令整體環境有情調夠氣氛，配合輕鬆而懷舊嘅音樂，令人加倍放鬆。

就算唔喺嚟食嘢，坐晌吧枱，跟朋友淺酌一杯談天說地，睇睇調酒師嘅表現，亦可以講喺幾賞心樂事。

如秋高氣爽，天氣唔太凍，露天平台位亦喺唔錯嘅選擇。就算絲絲細雨都唔使怕，大可放心，因為話雖露天平台，但仍有瓦遮頭。

枱上餐具、餐碟，以至餐巾，都認真得一絲不苟，尤其條餐巾，非常有古老西餐廳嘅味道。

稍為移開餐碟，下面嘅餐墊就正正喺餐牌嚟，分門別類，包括：Para Picar / Snacks、Cold Meats、Tortillas / Potato Omelette、Seafood、Meat、Salad、Vegetables、Desserts及各款餐酒。

此外，另有一個Daily Special餐牌，喺店家不時推出嘅特色菜，啱晒貪新鮮、貪新奇嘅人。

除咗餐枱墊餐牌所列出嘅餐酒、啤酒外，仲有一套飲品餐牌，提供不同種類嘅香檳、雞尾酒、非酒精雞尾酒及烈酒，甚至啡茶、果汁都有。

Sangria $120

喺每一間西班牙菜館梗有嘅酒類飲品，依度可配紅酒或白酒，友人點嘅喺紅酒，而佢哋嘅特點喺由調酒師像做雞尾酒般即場調製。友人話紅酒與果香平衡，酒精中散發出絲絲清新果甜，雖然賣到百幾蚊一杯，但極為大杯。

Cassio Homemade Lemonade $88

正所謂各施各法，每家店做Lemonade都有自己做法。Cassio嘅色澤帶點啡褐色，原來喺加入咗浸過雪莉醋嘅士多啤梨、蘿勒葉，令檸檬酸香以外，多咗種層次感，冰涼清香。

Beetroot $88

採用法國紅菜頭自然喺身價高級咗，配以自家調製嘅焦糖化嘅洋蔥汁，再以青蔥做裝飾，好睇又好食。

Assorted Cold Meats $248
喜歡一邊飲嘢，一邊傾偈，依一道凍肉拼盤就喺最佳朋友，有齊散點嘅4款西班牙風乾火腿及肉腸（由近至遠）：Jamon、Fuet、Chorizo及Salchichon。店長介紹佢哋嘅Jamon喺屬於世界上最高級火腿之一，且有50個月熟成，入口果然不同凡響，油潤鹹香，肉質細膩；其他嘅西班牙風乾肉腸同樣各具特色，較常見喺Chorizo西班牙辣香腸，整體嚟講，雖然見到又唔少肥肉，但卻無一種油膩嘅感覺。

Classics Tortillas $88
西班牙風乾火腿固然喺名物，西班牙奄列亦都喺另一出名嘅Tapas，不得不提一吓，件奄列煎得金黃，特別之處喺裡面包住好多蕃茄漿，蛋內又有薯仔，雖然簡單，但薄薄嘅蛋皮口感做得嫩滑，又富蛋香。

Tuna Tartare $188

曾經喺另一家西班牙餐廳食過一道Octopus Tartare，八爪魚醃得油潤，煙韌爽口。不過，另一款小食Tuna Tartare同樣做得出色，不單賣相立體有層次，將吞拿魚、牛油果蓉、本菇撈勻，伴以脆餅，非常好食。

Octopus with Capers $178

八爪魚切得薄薄，應以橄欖油浸潤過，糝下辣香粉，再加一粒水瓜柳，令柔中帶韌嘅八爪魚，晌酸香味中更突出佢嘅鮮味，亦喺另一伴酒嘅好友美食。

Roasted Meat Croqueta $68
Croqueta亦喺一種常見嘅Tapas美食，可以講喺西班牙式可樂餅，又或炸手指，炸得金黃，一咬外層脆到咔咔聲，內裡有少少黏糯嘅口感，又帶點烤豬肉香，真喺唔錯喎。

雖然Cassio嘅消費價位唔平，但氣氛好，食物具質素，三兩知己摸吓酒杯底，食吓西班牙小食，絕對可以驅走人生悶氣。

個人評分

味道：8/10
環境：8/10
服務：9/10
抵食：6/10
平均每人消費：HK$440

餐廳資料：
Cassio
中環蘭桂坊雲咸街33號LKF Tower 2樓
3792 0129