早十零分鐘到達，成個場人多到水洩不通，一枱接一枱，雖然話一枱供12人用，其實都幾逼架，尤其我哋12件死佬，部份喺橫版彪形大漢咁嘅身形。環境除咗逼之外，就喺夠街坊，粗聲粗氣講嘢都唔怕，爛撻撻上嚟都無問題。
個蛇宴有咩食，睇睇佢之前宣傳單張就一清二楚，大小同價，位位$215。
蛇酒、啤酒、汽水任食
寫到明任食，雖然主要都喺得可樂同忌廉，我哋無咩要求，都OK啦，席間不時有工作人員問飲唔飲蛇酒，我哋一班死佬竟然無一個有興趣，所以，免得嘥人啲嘢，就一杯都無攞，相片欠奉。
太史五蛇羹（3窩）
率先登場喺蛇羹，因為地方有限，所以，蛇羹逐窩逐窩上，窩窩都好大窩，每窩睇得出，又食得出真材實料，堅真喺多料，啖啖蛇肉、木耳絲，佐以薄脆，但欠菊花瓣啫，總之無欺場，食完行氣活血一身暖晒。
椒鹽焗中蝦
一人一隻，無多無少，啲中蝦雖然唔算大隻，但炒得幾香，椒鹽味都平衡，蝦肉都算爽口，不過，一隻真喺過唔到口癮。
紅棗香栗扣全鴨仲記得舊年晌富臨皇宮都有依道菜，最印象難忘唔喺個味道，而喺連封肚嘅鋼針都跟埋隻鴨一齊上。今次依隻扣全鴨就無依樣甩轆事件，打開鴨肚，塞滿栗子，反而紅棗唔太多，而啲栗子未算焗得好透，部份入口仲有少少硬，但啲鴨扣得極為鬆化，隻鴨又幾大隻，幾多肉食。
陳皮豉汁蒸河鮮河鮮喺蒸鱔，蒸鱔恰到好處，肉質油潤滑溜，豆豉味夠出，果皮香相對弱少少，但已覺得夠晒惹味！如提供白飯，啲陳皮豉汁就肯定唔會嘥。
鮮竹五蛇卷
一望就知肯定唔止12件，當喺賣大包，以為喺以鮮竹或腐竹包住啲蛇肉嚟炸，但原來喺以啲麵粉皮包住啲鮮腐竹、甘筍絲及蛇肉嚟炸，口感唔算脆，亦比較油。
淮杞烏雞響螺炖三蛇湯
過去兩次食蛇宴，都喺依款炖湯，真喺唔知喺咪蛇宴嘅指定「例湯」。由湯底撈一撈就知用料有幾堅，原隻烏雞、雞腳、響螺、蛇肉、淮山、杞子、圓肉，絕對童叟無欺，個炖湯入口醇和夠火喉，啖啖精華。
枝竹羊腩煲
一大煲羊腩裝得滿滿，熱氣騰騰，又多枝竹，睇見都開心呀。啲羊腩炆得好軟腍微羶，醬汁濃香，認真正斗，除枝竹，底下仲有啲蓮藕，兩者嗦晒汁，自然入味好食。
蛇湯浸時蔬
時蔬以生菜入饌，再加啲本菇，就算用咗蛇湯浸都仲喺無乜味，所以，羊腩煲啲汁底就大派用場，啲生菜沾一沾啲羊腩汁，好難講唔好食囉。
臘味糯米飯
個糯米飯又做得幾好喎，雖然唔似生炒，飯粒分明，入口黏糯有咬口，混滿臘腸、蝦米，每口都有臘味香。
Italian Tomato皇牌士多啤梨蛋糕 $380
平時都會有啲糖水作結，依一餐就甜品欠奉，但喺，好彩死佬孔七兄買埋個士多啤梨蛋糕過嚟，順便慶祝一月牛一嘅死佬，話晒唔喺晌酒樓，咪指意提供新碟俾你，佢醒目到買埋膠叉、膠碟嚟，讚呀！不過，講到佢分蛋糕，就好似劈友咁，左斬右斬，「求其」得緊要，總之但求人人分到有得食。
當人人散緊場，我哋就仲晌度食緊蛋糕，不過，一於好少理，就因為依度夠街坊，當自己去咗大牌檔咁，你有你食，佢有佢走，而且，準時8:00pm開席，9:30pm左右就散水，正所謂快靚正。
個人評分
味道：8/10
環境：6/10
服務：8/10
抵食：8/10
平均每人消費：HK$215（未計蛋糕）
味道：8/10
環境：6/10
服務：8/10
抵食：8/10
平均每人消費：HK$215（未計蛋糕）
活動資料：
主辦：民協深水埗民生關注組
地點：港九勞工社團聯會
太子大埔道6-8號福耀大廈二樓
主辦：民協深水埗民生關注組
地點：港九勞工社團聯會
太子大埔道6-8號福耀大廈二樓
沒有留言:
發佈留言