話雖為分店，但店名有別，加多個「雅」字，卻更有詩意，而且，空間比銅鑼灣店更闊落。一踏入店內，一室紫與白，雲石地板、素白窗紗、雅致盆栽、摩登吊燈……都令餐廳變得光潔而有份高雅氣質。除少量卡位，有多組二、四人枱，適合三五知己聚餐。
轉入餐廳內籠，跟銅鑼灣店一樣，設有兩個貴賓廂房，亦可打通共用。所以，一大棚人晌度開一、兩圍都無問題。
打開餐牌，羅列咗好多選擇，由午市套餐、下午茶套餐、晚巿套餐，以至唔同時段嘅散點、甜品、飲品，仲有多款供12人享用嘅圍菜，真喺唔同時段嚟都有大把選擇。不過，溫馨提示，餐廳晌唔同時段均設有唔同嘅最低消費額，例如，晚市就每位$200，但以前已問過，都唔喺強硬性執行，指標性嘅作用比較多啲。
都唔喺第一次光顧，知道佢哋啲晚巿套餐份量足又抵食，5道菜包括前菜、手卷、湯品、主食及甜品，定價只喺$228-$238 + 10%，絕對豈止一人份量，所以，3人行，點兩個套餐再加少少散點，唔怕食唔晒嘥嘢，又一定過到最低消費額！
四喜烤麩
稱得「四喜」，梗喺有4樣嘢啦：烤麩、木耳、筍片及毛豆，烤麩軟綿吸滿醬汁，食落煙韌咬口；木耳爽脆，營養益有。
柚香紅菜頭蘋果拌合桃
除咗有一道日本山藥麵線拌熱情果汁，依一個紅菜頭蘋果拌合桃我就覺得喺佢哋嘅招牌前菜，賣相嬌紅已夠吸引，而爽脆嘅蘋果粒，軟腍嘅紅菜頭，再配搭香脆嘅合桃，唔止口感多變，更喺健康富營養。
麻醬沙薑豆絲粉皮
呢一道前菜未試過，喺雞絲粉皮嘅素菜版，「雞絲」以一啲類似麵根碎（沙薑豆）嚟代替，外觀及口感都幾像真，配以柔綿嘅粉皮及清爽嘅青瓜絲，晌濃郁嘅麻醬襯托下，味道富層次。
露筍素香鬆苜蓿芽手卷、香芒牛油果苜蓿芽手卷
我哋點兩客晚餐，就有兩客手卷，但手卷比較難「些牙」，所以就散叫多點一客。以有機苜蓿芽代替米飯，加埋嫩滑無渣嘅露筍、清爽嘅青瓜及有啲鹹香嘅素香鬆，咬落爽爽脆脆，又清爽。另一款以芒果及牛油果取代露筍及青瓜，高纖嘅苜蓿芽夾雜軟綿嘅牛油果同鮮甜嘅芒果，同樣清甜好食。啲紫菜仲脆到咔咔聲，整具咬口。
菠菜忌廉桃膠濃湯
西湯加入中式食材 ，喺依度嘅新色，上次試過嘅南瓜甘筍栗子雪耳忌廉濃湯仲記憶猶新，今回加入嘅中式食材「桃膠」，更喺近來大熱嘅健康食品。湯底本身已經好濃郁，充滿菠菜味，碧綠嘅色澤更相當吸引。湯內嘅桃膠唔算好多，但都夠我哋人人試啲，桃膠煙煙韌韌咁，又有點似雪蛤膏，本身喺無乜味，所以，就靠個忌廉湯。
竹笙紅棗蓮子百合黃耳燉湯
中式喺燉湯，就好啱我老婆，尤其依家寒寒哋，極之啱晒。個湯有咁多健康嘅食材，樣樣都健康有益，而且唔單用料足，亦火喉十足，感覺非常清潤，所以，點唔討人歡心吖。
黑松露薯蓉焗大啡菇 $148（散點）
據說喺店中招牌菜，但咁耐以嚟都一直未有試，所以，散點一客試試佢嘅焗大啡菇，一客3件又啱啱好夠我哋分。大啡菇釀入薯蓉，加芝士及黑松露嚟焗，香氣撲鼻就唔在講，入口大啡菇好夠汁，薯蓉亦好柔滑，而芝士、黑松露令味道昇華，卻又無互相搶味。
栗子紫薯牛油果鮮豆包焗千層闊麵 $238（套餐）
千層闊麵個賣相跟一般西餐無咩分別，不過，啲餡料就大不同，而且，非常佩服大廚晌用料上嘅心思同創意，睇菜名唔使我多講都知有咩成份。切開睇睇，果然真材實料，蜜潰嘅栗子好甜蜜，紫薯清甜，最有趣喺中間夾咗塊鮮豆包，十分有豆香，而配上蕃茄醬，鮮活嘅蕃茄香，令味道更上一層樓。
黑椒猴頭菇扒配意式薯菜 $238（套餐）
套餐中有一個選擇喺分店限定廚師推介，經店員介紹喺猴頭菇扒，好似幾特別，加上平時用嚟煲湯嘅多，但做西菜就真喺第一次聽，故一致決定試試。整道菜賣相好西式，有板有眼，所配嘅薯菜亦唔喺「求求其其」，意大利蕃茄仔、椰菜仔……都處理過，好食！主角猴頭菇扒，一客都有3、4件，相信視乎件菇本身大細而俾幾多件，總之就份量唔少，切同食起嚟，都有幾分似食鮑魚，佐以黑椒汁就固然之惹味。
藍蝶花雪梨汁 +$20
晚餐本身唔包飲品，但可以選擇加錢配，啡茶佢哋都有供應，但就有更多特色嘅飲品，就好似店員推介我哋試吓嘅新品「藍蝶花雪梨汁」，一身幻紫，幾襯個環境。藍蝶花以前都接觸過好幾次，知道佢喺有減壓同抗氧化作用之效，因藍蝶花花香味唔突出，杯嘢嘅味道主要就喺雪梨味，梨味突出，清甜滋潤。
店中有一系列冷壓鮮果汁，喺小弟好推介俾朋友試試，因為除配搭特別外，更列明唔同成份及其功效，仲以慢磨機嚟打果汁，慢慢磨，務求唔產生高熱而除去鮮果營養嘅流失或變質，保持原汁原味。
紅石榴蘋果汁 +$35
顧名思義，簡單以紅石榴及蘋果打做，故色澤鮮紅。友人貪佢色靚兼有減少脂肪積聚及可以降血壓，再者，味道酸爽清甜。
Vita-C奇異果汁 +$35
以奇異果、香橙、檸檬及香蕉打成，店員話絕無加水，所以，味道濃郁，酸酸甜甜，清新清涼，酸甜味中以香蕉味稍稍突出啲，重要嘅喺有多種功效嘛！
紅棗桂圓椰汁糕、紅棗乳酪蛋糕
套餐裡嘅甜點，一喺選紅棗桂圓椰汁糕（2件），一喺就紅棗乳酪蛋糕（1件），店家好好俾多件乳酪蛋糕我哋。前者似上海甜點拉糕
咁，柔軟煙糯，紅棗及椰汁味都出色，又混有少少桂圓肉，朋友大讚好食。後者就喺用上紅棗嚟做嘅芝士蛋糕，除咗餅底較厚身外，強烈嘅紅棗味，餅面伴丁點蜜糖，同樣叫人食得滋味。
咁，柔軟煙糯，紅棗及椰汁味都出色，又混有少少桂圓肉，朋友大讚好食。後者就喺用上紅棗嚟做嘅芝士蛋糕，除咗餅底較厚身外，強烈嘅紅棗味，餅面伴丁點蜜糖，同樣叫人食得滋味。
比起銅鑼灣店，尖沙咀店既方便到我等九龍人，環境又闊落啲，重點喺食物嘅賣相、味道及健康並重，由前菜、湯品、主菜到甜品，都無令人失望，加上店員有禮，服務殷勤，值得推薦嘅素食店。
個人評分
味道：9/10
環境：8/10
服務：8/10
抵食：8/10
平均每人消費：HK$275
環境：8/10
服務：8/10
抵食：8/10
平均每人消費：HK$275
餐廳資料：
雅‧悠蔬食 Leisurely Veggie
尖沙咀金馬倫道48號中國保險大廈3樓B號舖
3706 5827
雅‧悠蔬食 Leisurely Veggie
尖沙咀金馬倫道48號中國保險大廈3樓B號舖
3706 5827
沒有留言:
發佈留言