悠蔬食 Leisurely Veggie：一較糕下（二）

一到過年，就收到啲朋友、親友所送嘅賀年糕點，年年如是，無一例外，故先多謝朋友及親友嘅厚愛。今年所收到嘅糕點，可歸納為嚟自4家餐廳或餅點，分4篇嚟評論吓，依一篇分享嘅喺悠蔬食嘅兩款糕點。

老婆近年偏向食素，佢本身亦好鍾意悠蔬食嘅餸菜，所以，佢哋出賀年糕品，當然要試吓。兩款糕點分別喺羊肚菌蘿蔔糕同黑糖椰汁合桃年糕，同以真空包裝，細細盒，一餐半餐就食得晒。

羊肚菌蘿蔔糕

成份除白蘿蔔，仲有羊肚菌、冬菇、甘筍，無其他化學添加，雖然羊肚菌唔喺好多，但睇落都非常之素，非常健康。

蘿蔔糕味道比較清甜，感覺唔會太調味、太化學。第一回我哋用煎，糕身質感少少削身，所以，第二回我哋用蒸，感覺蒸嘅效果比煎好。

黑糖椰汁合桃年糕

成分唔使多講，主要就喺黑糖、椰汁、合桃，同樣無化學添加，叫人食得健康，但食用期非常短。

平常好多人都會沾蛋漿嚟煎，唔怕煎好黐埋一嚿嚿，其實，大火辣一辣底面，煎到可以外脆內軟，而且，疊住都未必咁易黐埋。件年糕入口清甜又帶少少椰香，外層有少少焦脆，內層十分軟糯。

除咗依兩款糕，佢哋仲有一款松茸菌芋頭糕，無論邊款，因為喺素糕，老婆食得非常安心，唔使一邊食糕，一邊挑走啲臘腸、臘肉。

個人評分
味道：8/10
環境：- /10
服務：- /10
抵食：- /10
平均每人消費：HK$0（朋友送贈）

餐廳資料：
悠蔬食 Leisurely Veggie
銅鑼灣渣甸街50號渣甸中心25樓
3565 6393