拾味山西刀削麵館 Shi Wei：「拾」拿九穩刀削麵

難得有位老死約食飯喎，當然出嚟啦，不過，佢放工有少少唔定時，地點就梗喺要就佢啦，所以，今晚就過咗嚟灣仔。因為同呢位老死久唔久都見吓面，所以，今晚就純粹食餐飯，搵間經濟實惠嘅小店，喺網上搵到呢間「拾味山西刀削麵館」，諗住十拿九穩。

睇相你就知絕對喺間街坊小店，一室灰白色調，裝修平實，簡簡單單，勝在整潔光猛，又有電視撈飯。嚟嘅都喺打工仔，收工過嚟食碗粉麵先返屋企。

餐牌有兩大頁，A至H系列，有麵有菜飯，仲有滋味小食同飲品，一時間睇到眼花撩亂，都要慢慢研究吓。

而落單就自己嚟，晌枱角有二維碼，相信依家大部份人都熟晒用。如果搞唔掂，就搵阿姐落單啦。

此外，枱上有少少調味料擺晌度任用，枱側嘅櫃桶就如茶記咁，擺咗筷子同牙簽。

H07 上海雲吞溫泉蛋木耳刀削麵 $63
老友醒目，揀咗款多配料嘅刀削麵，雖然隻溫泉蛋唔喺好「溫泉」，不過，木耳就俾咗好多，雲吞都有4大隻，可以講餸料俾足，味道亦唔錯，木耳好爽脆，雲吞好爽滑，啲刀削麵喺點？下面再講。

C04 蒜泥牛展刀削麵 $62
小弟就揀咗個蒜泥牛展，麵餸喺分開裝，加上麵條之上就再無任何配料，所以，顯得碗麵好寡。講到啲牛展，其實都幾好食，滷到好入味，咬落有咬口，質感帶點點韌勁，不過，就咁配啲生蒜泥得個辣字；麵條要啲爽啲，其實，食落都喺以煙韌感為主。

豆漿 +$6

所有嘢都散點，無話套餐嘅選項，除非着住校服嚟，有飲品奉送，否則就額外加錢，所以，我哋兩個都嗌咗杯凍豆漿，杯豆漿唔知來貨定自家製，但味道都唔錯，好香濃，有豆香。

整體嚟講，啲刀削麵喺唔錯，不過，就唔喺話好有驚喜，正正常常咁啦，如晌啲配菜有多少少心思，令性價比更高。

個人評分
味道：8/10
環境：7/10
服務：7/10
抵食：8/10
平均每人消費：HK$68

餐廳資料：
拾味山西刀削麵館 Shi Wei
地址：灣仔灣仔道212-214號怡康大廈地下A號舖
電話：2819 6635