椈 KIKU：尋味快活「椈」

好耐無約老死夏總食飯，又喺襯無飯開嘅日子，約佢過嚟中環一間居酒屋「椈」聚一聚，居酒屋肯定啱晒佢，因為佢同佢老婆都好鍾意去日本旅行，差唔多一年一次咁滯，所以日本嘢肯定好合佢口味。

一入門口就見到專做串燒嘅吧枱，非常吸睛，傳來陣陣串燒香氣，如果人少少，兩個人就最啱坐喺呢個位置，一邊食一邊傾，又可以同師傅交流下、吹下水。

此外仲有啲二人、四人枱，裝修非常型格，又極富現代感，卻不失和風嘅元素。嘆下串燒、隊下啤，喺非常之爽嘅地方，好有傳統日式小店嘅感覺。

既然喺居酒屋，食物嘅種類一定喺非常多，前菜、小食、串燒、炸物，牆上嘅黑板仲寫有啲主食或推介之類。飲品方面，既然以居酒屋定位，梗喺有好多清酒啦，此外，仲有生啤、果汁、汽水 ……等等。

Suntory頂級啤酒 $98、可口可樂 $15
雖然小弟唔好酒，但飲少少絕無問題，難得同夏總一聚，啤一啤佢。杯Suntory嘅泡沫綿密，好易入口，加上冰凍透心涼，襯晒啲炸物、串燒，夏總就一向只喜歡飲可樂。

煙三文魚沙律 $78

先嚟一客開胃嘅沙律作開場，晌盛夏清爽吓都喺好爽嘅選擇。爽脆嘅沙律菜以外，仲有車厘茄、粟米粒、蟹籽配以蛋黃醬，本身沙律都好好食；加埋啲鹹香油潤嘅煙三文魚，為呢餐飯打開好好嘅序幕。

炸物拼盤 $88
跟住登場嘅係炸物。分別有炸雞軟骨、炸豆腐、黃金一口芝士，不得不讚啲炸嘢炸得金黃均勻，又好香口，入口一啲都唔油膩，師父嘅炸功有一手。雞軟骨咬落咯咯聲，好過癮；啲豆腐真真正正嘅外脆內嫩，灑上少少七味粉正呀餵；一口芝士咬落去軟綿鹹香，一口芝士一啖啤酒襯到絕。

阿波雞腎 $38、大蔥雞頸肉 $38、日本雞頸肉 $32、豬頸肉串 $38、雞軟骨串 $38/兩件

試完一輪炸嘢，再落嚟就喺試試串燒，一口氣嚟咗5款。咪睇樣以為普普通通，除咗燒得靚仔之外，仲喺用料不賴。曾喺串燒店食過阿波尾雞，知道喺無激素嘅一款日本雞種，當然食得安心啲啦。啲雞腎好爽口，雞頸肉就特別嫩滑，配大蔥又另一番滋味，豬頸肉就口感帶爽脆，仲有啲雞軟骨，樣樣都好食。

明太子雞翼 @$38

雞翼嘅外皮燒到金黃仲帶點焦香，裡面填滿明太子，絕無欺場，一口咬落去，外皮非常之香脆，肉嫩多汁，明太子帶出嚟鹹鹹辣辣之味，非常之好味。

鹽燒油甘魚鮫 $88、燒蕃薯仔 $28

燒三文魚鮫就食得多，油甘魚鮫印像中好似第一次，唔好睇少啲魚鮫，其實都好多肉，燒到金香，再灑點檸檬汁，食起來更清爽，至於啲魚肉非常之嫩滑，亦富油香，另外串蕃薯仔又粉又甜，口感非常之綿密，同樣好味。

最中餅雪糕 @$38
最後，嚟一道甜品作結，咁就完美喇，嗌咗一杯香芋口味、一杯抹茶口味，唔單止有雪糕，食落原來仲有清甜嘅紅豆同軟糯嘅抹茶蕨餅，真喺有啲驚喜；加上脆口嘅最中餅，以及香滑抹茶雪糕，真喺滿足晒。

咪以為淨喺食吓炸物、串燒，好似濕濕碎碎咁，食得我哋兩個都好飽，我哋兩個死佬邊飲、邊食、邊吹水，講咗好多昔日往事，人生就係咁，好快三年又三年。

個人評分
味道：8/10
環境：8/10
服務：8/10
抵食：8/10
平均每人消費：HK$400

餐廳資料：
椈 KIKU
地址：中環榮華里13號榮華大廈A座地下G號舖
電話：3488 1770