捌捌陸 Seeyalater：「捌」面玲瓏

今晚又無飯開，但多得老友陪我食晚飯，就番我就定晌荔枝角D2 Place搵食，食完我行番屋企都得，而佢亦有巴士直達返大圍。D2 Place無論一期定二期，算喺嚟荔枝角搵食嚟得最多嘅地方，不過，小弟都喺鍾意試新嘢，所以，都甚少重複食同一間，一向都喜歡台菜，故相中「捌捌陸」。

餐廳嘅設計喺開放型，挨住商場嘅通道，無牆間隔，所以，觀感上就會大好多，否則，其實個環境會變得長長窄窄。裝修簡約，一室明亮，令人坐落都幾舒服。

餐牌一張過，分為湯麵、拌麵、滷肉飯，仲有啲台式滷水、台式小食，而甜品就得一款；此外飲品方面，絕大部分都喺常見嘅台式飲品，整體嚟講，定價都公遁。

一坐低，侍應就會俾個二維碼你，自己慢慢碌住手機慢慢點，呢度嘅主食可以加$20轉為套餐，多一款涼拌小食及$28以下嘅飲品，亦可以選其他嘢飲，只要補返差價就可以啦，所以整體嚟講 都幾多彈性。

涼拌木耳、涼拌小青瓜（套餐）
套餐所包嘅涼拌小食有三款選擇，我哋就揀咗木耳同青瓜，兩款涼拌都做得唔錯，清清爽爽，襯晒一陣間主食嘅濃味、油香嘢食。

台式滷水拼盤 $78

本來好想試個台式小食拼盤，不過，剛好賣晒，改為一試個滷水拼盤，包括有牛展、牛筋、牛肚、豬手同百頁豆腐，份量非常十足，滿滿嘅一大碟，滷得色澤深沉。 牛展好鬆化，牛筋腍滑，牛肚柔韌，豬手好重骨膠原，豆腐甚有豆香，全部都滷得好入味，整體都有水準。

紅燒牛三寶麵 $78

拼盤都滿足唔到老友，佢就揀咗個牛三寶，即喺有牛展、牛筋、牛肚，上文都講咗店家嘅滷水喺有一手，而個湯底甚具肉香，濃而不濁，飲咗大半碗都無口渴嘅問題，手工麵亦好有質素，柔韌耐浸，食到尾都無話腍晒，好食。

鹽酥排骨滷肉飯 $68
我就揀個配鹽酥排骨嘅滷肉飯，無論麵條，還是滷肉飯，都會配隻滷蛋。餸料放到滿滿晌飯面，鹽酥排骨做得唔錯喎，外層甘香鬆脆，唔油膩，肉質鬆化；而呢度啲滷肉就切得比較大粒，少少肥膏咁啦，但好惹味，撈飯真喺一流，

凍頂烏龍茶、黑糖珍珠鮮奶 +$10

雖然小弟一向好鍾意飲奶茶，但檢視吓自己嘅食評，原來台式嘢飲中，揀黑糖珍珠鮮奶多過黑糖珍珠奶茶喎。雖然餐廳無講明喺用咩鮮奶，但飲落奶味醇厚，好鮮味，而攪勻之後，黑糖嗰陣陣清租純香嘅糖味，確喺好特別，好唔同，而底下有好多珍珠，煮得非常QQ，煙韌而有嚼勁。

如果唔喺點個拼盤，其實呢度人均消費大概$90左右，已可以食到好飽，加上香港人都幾鍾意食台灣菜，睇到餐廳一張枱都可以做到兩三轉生意 ，希望社會經濟繼續好啲，人人有工開，日日食餐好。

個人評分
味道：8/10
環境：7/10
服務：8/10
抵食：8/10
平均每人消費：HK$132

餐廳資料：
捌捌陸 Seeyalater
地址：荔枝角長義街9號D2 Place一期3樓306號舖
電話：2217 8866