翠苑餐廳 Tsui Yuen Restaurant：快快「翠」醒晨早餐

星期六一朝早走到嚟荃灣做身體檢查，事前梗喺要空腹嚟抽血啦，所以，一做完身體檢查即刻晌附近嘅茶記食返個早餐先，不過，話豐富，都只不過喺早餐ABC嘅啫，無刻意食太多。而喺眾安街兜兩兜，發覺同一款早餐組合，「翠苑」真喺定價最抵。

「翠苑」絕對喺街坊茶記，嚟嘅差唔多大部份都街坊裝，撻對拖鞋，所以，雖然已經10點鬆啲，但一樣坐滿晒人。

一版面早餐餐牌一目了然，有晒咩早餐選擇，雖然有啲特盛扒麵餐，但唔喺我嘅心水，我就睇啱沙嗲牛麵，而同類型嘅早餐，附近幾間茶記都賣超過40，喺「翠苑」只賣35。

醒晨早餐 B $35
眾多系列，醒晨早餐睇落最抵，而小弟揀嘅呢個餐嘅組合喺沙爹牛肉麵配火腿煎蛋、牛油方包，包基本熱飲。

當然火腿、煎蛋、方包都喺大路嘢，唔會有咩特別，正常茶記快速質素，至少食得出啲火腿唔喺啲平價貨。

碟沙爹牛麵算喺咁啦，俾咗唔少沙爹牛肉，亦好軟腍，個醬汁都濃郁惹味，麵底相信都喺茶記常用嘅大光麵，唔太高要求嘅其實都OK，最緊要師傅唔好煮過籠，食落仲有少啲爽身已經收貨。

嚟茶記梗喺揀熱奶茶啦，喺最穩膽之選。面前呢杯熱奶茶飲落都有質素，茶底芳香，茶奶比例又好，口感確喺唔錯，就算唔叫最好，亦喺中上嘅質素。

雖然話家下香港乜都貴晒，其實，全球通帳高企，有啲地方嘅嘢仲貴呀。你搵大陸、東南亞比，無嘢講啦，但你試吓搵歐美比，就更加肯定香港喺美食天堂呀！呢個早餐，包埋餐飲先三十幾蚊，真喺抵架，唔使預備，唔使煮，又唔使洗嘢，食完走人，仲想點！

個人評分
味道：8/10
環境：7/10
服務：7/10
抵食：9/10
平均每人消費：HK$35

餐廳資料：
翠苑餐廳 Tsui Yuen Restaurant
地址：荃灣眾安街7-9號地下
電話：2612 2322