鮮芋仙 Meet Fresh：位置優「鮮」

同老友晌尖沙咀食完晚飯，唔想太阻人做生意，所以，轉場搵個地方食糖水，繼續傾吓偈。最近、最就腳就喺呢間「鮮芋仙」，揀佢絕對喺貪方便，位置優先。

餐廳位處美麗華商場一角，鋪形窄長，雖然有店員，佢哋基本上喺唔會點理啲客，近乎自己招呼自己。

走到最入收銀櫃枱落單，俾個傳呼機你，等響就自己埋去廚房窗口拎。題外話，得兩個店只負責樓面，加上都幾多客，所以，啲客食完，枱面清潔就馬虎咗啲。

餐牌都喺嗰啲，一貫台式見慣見熟嘅出品，唔多介紹，自己睇睇。

另外，就仲有啲季節限定嘅芒果產品，有飲品，有甜品。

招牌豆漿豆花 $50

老友就睇中經典豆花系列，而7款選擇中，佢就最心水最大堆頭而店家推介嘅招牌豆漿豆花，裡面喺豆花加豆漿底，並加入芋圚、芋頭同珍珠。無論豆漿，抑或豆花，都好有豆香，豆花口感更喺好嫩滑，而底下有大大嚿粉香嘅芋頭蓉，搭埋煙韌嘅芋頭同珍珠，老友就讚幾好味。

芋圓3號 $48
手工芋圓系列有6款，其配搭都喺大同小異，小弟就揀由芋圓、紅豆、花生、珍珠組合成嘅3號。大大兜，餡料堆到滿一滿，雖然咁喺，其實下面主要都喺刨冰，天時暑熱食落又真喺幾爽；而芋圓、地瓜圓好咬口，加埋清甜嘅紅豆、鬆化嘅花生、QQ嘅珍珠，真喺多重口感，食完涼透心之餘，填飽埋胃內剩餘空位。

一餐飯都喺有個甜品到肚先至覺得完整，而食到好食嘅甜品，當然就更覺滿足啦。

個人評分
味道：8/10
環境：6/10
服務：6/10
抵食：7/10
平均每人消費：HK$50

餐廳資料：
鮮芋仙 Meet Fresh
地址：尖沙咀彌敦道132號美麗華廣場1期2樓206號舖
電話：5105 0372