Mano：出色手工薄餅

呢日約咗另一老死東叔叔聚一聚，佢喺東九人，又揸開車，所以，搵咗離地鐵站遠少少，又方便泊車，位於「海濱匯」嘅「Mano」，晌度泊車又有優惠。好幾年前都嚟過「海濱匯」食嘢，所以，對呢度唔叫陌生。

餐廳裝修簡約得嚟又幾型格，以灰黑色為主調，但又襯番少少粉色，雲石枱、格仔地磚，滲出少少復古風。由於開放式鋪面連住商場通道，對街嘅一邊喺一排玻璃窗，加上樓底高，所以空間感好強，有少少陽光滲入就令人更加舒服。

枱上嘅紙枱墊，其實就喺散點餐牌，分類嚟講好簡單，就喺前菜、主菜、手工薄餅、手工義大利麵，選擇唔少。點解揀呢度，就喺佢哋啲出名嘅手工薄餅同埋意大利麵。

嚟食晏就當然揀Brunch Set啦，比散點就肯定食得划算啲嘛，有10多款選擇，定價由$108到$178，正所謂豐儉由人，包一杯基本餐飲，另外，仲可以加錢配是日餐湯、是日沙律是或日甜品。

餐飲方面都喺好基本嘅奶茶、咖啡、檸茶、檸水，冷熱都得。如果唔喺亦可以加錢升級其他飲品，選擇就會變得多好多。

臨走時，見到好多親子家庭客，就喺門口睇返個餐牌，原來你食Branch Set，就有免費兒童餐，我就無問題詳情，不過，既然咁多親子家庭，應該都喺好著數嘢。

是日餐湯 +$15
呢個湯堅喺真材實料喎，又好大碗，其實夠晒兩個人分。試一口，餐湯喺洋蔥薯仔湯，既有洋蔥香，又有好濃嘅薯仔味，唯獨喺質感比較杰身咗少少，但整體感覺唔錯。

是日沙律 +$15

初時諗住都喺啲普普通通嘅田園沙律，但又有少少驚喜喎，沙律菜非常新鮮爽脆，以油醋稍稍調味，酸香開胃；亮點就喺面頭放咗兩大片火雞肉，食落比預期嫩滑。

香草紅酒汁燴牛面肉配黃薑蕃茄飯 $118
睇勻啲主菜類，呢個算喺最心水，因為燴牛面肉向來都鍾意食，因為肉味濃，口感鬆化，而呢度做嘅牛面肉確喺有水準，加上以紅酒汁煮，就更加正；配以黃薑蕃茄飯，口感有少少似炒飯，黃薑味突出，反而蕃茄味就隱約少少。

意式辣肉腸薄餅 $158
薄餅新鮮焗製就特別好食，送到上枱堅喺熱焫焫，不愧為手工薄餅，批底口感有韌勁，果然有個性，又焗到有啲燶邊位，入口甚具「碳火」香。每件有大大片莎樂美腸，鹹香惹味，而批面搽上大量意大利辣肉腸醬、聖馬札諾蕃茄蓉及馬蘇里拉芝士，味道豐厚，濃香有層次，單喺個批，都已經好正，味道一流。

熱奶茶、凍檸茶
成餐晏唯一甩轆喺我哋嘅餐飲冷熱對亂咗，原本叫嘅喺凍奶茶及熱檸茶，嚟到變成熱奶茶、凍檸茶，費事換嚟換去就照飲。老死想飲凍嘅，我就飲奶茶啦，呢度嘅熱奶茶當然唔及茶記嘅好，幾西餐廳嚟講，算喺唔錯喇。

講環境，呢度確喺蠻舒服開揚，招呼亦唔錯，啲侍應幾有禮，不過，眼見都喺外藉人士。食完嘅話，可以行吓觀塘海濱長廊，直到觀塘碼頭打吓卡。

個人評分
味道：8/10
環境：8/10
服務：8/10
抵食：8/10
平均每人消費：HK$170

餐廳資料：
Mano
地址：觀塘海濱道77號海濱匯1樓4號舖
電話：2897 6168