山城毛兒老火鍋：再下一「城」

幾個月前嚟過一趟「山城毛兒老火鍋」打邊爐，當時食評嘅總結喺嘢食質素高，部份食材好少食到，所以，顯得有特色，加上由正宗四川人主理，啲阿姐招呼又真喺幾好，所以，對整體印象都好正面。有朋友就話想食火鍋，要特色少少，今晚再下一城，嚟到呢度打邊爐。

環境方面，唔講太多啦，因為上次嘅食評都描述咗好多，最主要呢度就喺樓底夠高，同埋啲座位都寬敞，坐落比較舒服。

講講餐牌先，即喺張點菜紙，一大張點菜紙列晒所有鍋底、特色菜、葷菜類、素菜類、小食、涼拌、飲品、酒類……等等。

晌門口，仲見店家貼咗張「優惠好消息」，就喺消費滿$1,000免收湯底費$148，大棚人嚟食應該好易達標。

原本諗住照番上次嘅套路咁點法，但見出咗一個新套餐兼推出咗一款消暑鍋底，且做緊優惠價，2-3人餐特價$688，而3-4人餐特價$888，睇落啲嘢啱食，價錢又平咗，包埋醬料費，唔收加一，無理由錯過架。

侍應先會捧嚟幾款佐料，如蒜蓉、芫荽、蔥粒、辣椒，當然，唔夠嘅話之後再加都得；另外，晌枱面仲放有醬油、麻油。

瑤柱冬瓜盅雞鍋

夏天食用冬瓜有消暑之效，夏天推出呢個冬瓜盅雞鍋感覺幾合時宜。個冬瓜上面放咗勁多瑤柱絲，再加啲香花菜，賣相幾靚仔，鮮雞講明有半隻，絕對無呃秤。先飲幾啖湯，味道清甜，之後再試啲雞件，嫩滑鮮甜，一食就知新鮮貨。當然，亦可以揀鴛鴦鍋，嗜辣嘅朋友就更加要試試店家嘅紅油麻辣湯，上次老友就讚辣得過癮。

涼拌皮蛋
其實個火鍋未嚟之前，先俾碟涼拌皮蛋過過口癮，你睇佢紅噹噹淋咗好多紅油，其實唔係好辣，帶少少麻，而皮蛋外層晶瑩，蛋心口感綿密，有陣陣獨特味道。

特級手切牛頸肉

上次試嗰啲美國肥牛，都好有質素，而今次個套餐包咗再高檔啲嘅牛頸肉，真喺有啲期待。啲本地牛頸肉色澤艷紅，紋理清晰，一片搭一點擺放得好靚仔，輕輕灼一灼十秒秘八秒，食落唔單止嫩滑可口，又有嗰種咬肉嘅質感，仲好有肉香。

極品西班牙黑毛豬
大刀腰片同黑毛豬二揀一，上次就試咗腰片，呢次就試試黑毛豬。咪睇佢好似片片都肥肉多過瘦，灼熟之後，入口又無想像中咁肥、咁油，但嗰陣陣脂香就好突出，兼且肉質好柔嫩。

原隻台山生蠔（6隻）

隻隻連殼，加上有拳頭咁大，所以擺出嚟個陣非常有睇頭，望上去非常肥美，一啲都唔輸蝕俾外國貨，而且肯定係原隻，因為蠔肉仲黐住條蠔柱。灼熟咗都唔會點樣縮水太多，都仲喺好大隻，而且入口蠔味十足，絕不失禮。

響鈴
雖然不時都打邊爐，但並唔喺每次都會叫響鈴，小弟就較喜歡將響鈴放落湯浸一浸就食，貪佢外層就腍腍滑滑，裡面仲有丁點脆口，再者，啲響鈴都好有豆味。

五香牛皮豆干
上次食過已覺得好正，所以，專登叫老友試多幾片。唔好以為淥耐啲就腍，點淥最後入口都喺好煙韌，比起響鈴，就更富豆香，豆味更濃。

手工萵筍片
上次都有食呢個，叫得手工，確喺睇得到啲萵筍切到有幾薄，晾晒晌個竹架上。個人就建議唔好灼得太耐，因為太耐會過腍，又容易夾爛，灼佢大概分半鐘左右都差不多，咁當然都要視乎個人喜好，總之咬落清甜爽口，實在唔錯。

雜菜拼盤

店員話當日有咩靚菜就俾咩菜，有時一兩款、兩生款，有時就好似我哋咁樣成份都喺皇帝菜。啲皇帝菜灼熟之後，好嫩滑，又好有菜味。

紅薯粉
你咪睇少啲紅薯粉好似得一小兜，其實食完所有嘢到尾聲，都九成幾飽。呢啲紅薯粉，其實好飽肚，入口滑嘟嘟，煙韌有咬口，仲嗦滿湯，好味又飽肚。

飲品

如果飲得啤酒，食火鍋就梗喺配啤酒啦，夠晒爽 。不過，配酸梅湯嚟清爽下，一樣好唔錯。套餐就唔包飲品，飲嘢就另計。

呢個3-4人餐，一般情況下，4個人都夠食嘅，除非個個有番咁上下食力嘅男士，唔夠嘅，臨尾咪額外再加啲紅薯粉、烏冬、出前一丁之類囉。跟上次一樣，啲阿姐招呼都好唔錯，又好好口，臨走時仲猛咁講多謝，叫下次再嚟。

個人評分
味道：9/10
環境：8/10
服務：8/10
抵食：9/10
平均每人消費：HK$315

山城毛兒老火鍋
地址：佐敦上海街152號地舖
電話：9258 8688 (WhatsApp)