M Square：寫意無限

近來熱話就喺港人北上消費，小弟就比較少北上，反而喜歡晌香港郊區四周走走，今日就「東闖」過到嚟西貢探索一吓，最後，嚟到「WM Hotel」內以Sports & Grill為主題嘅餐廳「M Square」，食埋餐飯先打道回府。

由西貢碼頭沿海濱長廊行過嚟餐廳都好方便，仲可以欣賞下靚海景，感覺非常舒服。嚟嘅原因都喺環境，裡面地方頗大，枱與枱嘅間隔又好闊落，加上超高樓底，所以，空間感好強，讓人可以好好放鬆。

一室以白色為主調，再襯以木系傢俱，無論梳化椅，抑或藤椅，都好舒服，加埋少少盆栽點綴，好有悠閒感。對海濱一邊入口全喺落地玻璃窗，相信日頭嚟，陽光射入室內，感覺更清爽。

此外，四面又設有大電視或投影，不斷播放唔同嘅運動比賽，有英超就啱晒我啦。仲有就喺餐廳一角，設有張美式桌球枱、高爾夫球體驗、枱上足球機、電玩遊戲機……等等，故此，見到唔少喺親子客，而食完飯又可以過嚟比試吓。

餐具、餐紙、餐碟、白開水早早就放喺枱上，自由取用，唔使煩侍應咁多。

食物方面有好多選擇，大大個餐牌列晒各大類別食物，如主打嘅燒烤類同薄餅，仲有一系列特色薯條、沙律、小食、意大利麵、意大利飯、全日早餐……等等。

飲品方面選擇亦多，由一般啡茶、汽水，到奶昔、生啤、汽泡酒、紅白餐酒、雞尾酒……到多種烈酒，都一應俱全。

而深受女士喜愛嘅甜品，就有另一組餐牌，主要都喺啲窩夫同梳乎厘班戟，圖文並茂，看上去甚為吸引。

Chocolate Milkshake $64、Strawberry Milkshake $64、Ginger Ale $32、Lion Rock (Draught) $78

始終喺夏天，外間天氣炎熱，雖然坐咗晌度涼緊冷氣，但加多杯凍飲就更加爽，先落單嗌啲飲品。表姨甥女同仔仔就揀咗好睇亦好飲嘅奶昔，佢老公就話嘆番杯充滿麥香又冰凍嘅生啤，小弟呢？Ginger Ale就啱我啲，薑味梳打入口清爽，啱晒襯啲濃味嘢食。

Buttermilk Chicken Salad $145
除咗飲杯凍飲，先嚟個清新嘅沙律喺為今餐有個好開始，呢個沙律都幾豐富，餐牌就已經詳細寫咗有烤雞扒、牛油果、煙肉、溫泉蛋、羅馬生菜、蛋黃沙律醬 仲加埋少少酸香嘅車厘茄、煙韌嘅意式長條包。一大碗幾個人共享就啱晒，首先喺啲沙律菜好新鮮，再將隻溫泉蛋篤爛撈勻所有食材，味道更加豐富，再者啲雞扒粒烤得香口，為成個沙律錦上添花。

Black Truffle Cheese Chips $58

啲細路特別鍾意食薯條，所以，都特別嗌一款香濃惹味嘅黑松露芝士汁薯條，又黑松露，又芝士，基本上都無得輸，加上薯條炸得脆口唔油膩，個細路一條接一條食到唔停口，搞到佢阿媽都要佢一啖沙律菜先再配給幾條薯條過佢。

Pulled Pork & Pineapple Pizza $195

一來怕細路唔食得辣，二來睇嚟呢款手撕豬肉菠蘿薄餅都幾有特色，所以，其中一份主菜就揀佢。新鮮焗製熱焫焫嘅薄餅送到，除咗手撕豬肉、菠蘿之外，仲有紫洋蔥及大量芝士，非常吸引。先講過批底，邊位帶少少脆口，批身好軟熟，口感卻有點煙韌，雖然手撕豬肉比預期少，但配上菠蘿、芝士，個味道都好唔錯，大家都食得好滋味。

Smokey Baby Back Ribs $320

另一款主菜，我哋就揀咗煙燻豬肋骨，見啲食評中亦有唔少人推介佢。全份嘅豬肋骨非常夠份量，睇到沾滿晒燒烤醬，並且伴有少少酸青瓜及 大量薯條同沙律菜，成為一道非常豐富嘅主菜。不得不讚，豬肋骨肉質好鬆化，輕易一咬就開，而且，有濃濃煙燻香味，醬汁調教得好好，一啖肉，又一嚿酸青瓜作間牆，調和一下濃味，所產生嘅化學反應更奇妙。

Tiramisu Pancake $139
甜牌餐牌中嘅梳乎厘班戟都好吸引，搞到心大心細又想試試，既然大家都仲有位，就來一客共享一下。由我發板揀咗最心水嘅意大利芝士餅口味，兩層厚厚嘅梳乎厘班戟，淋上自家製提拉米蘇醬，撒上燕麥同松子仁，加埋啲鮮果做裝飾，賣相絕對好吸晴，高打卡度。班戟入口勁鬆軟，口感微微濕潤，又富蛋香，單喺佐以啲提拉米蘇醬，再倒上咖啡糖漿，已經好正。

無怪乎咁多客人都唔介意山長水遠咁走入嚟食番餐，環境舒服寫意，出品水準高，其實，配合埋西貢碼頭周邊嘅景點，絕對喺好玩嘅本地一日行程。

個人評分
味道：8/10
環境：9/10
服務：8/10
抵食：8/10
平均每人消費：HK$301

餐廳資料：
M Square
地址：西貢惠民路28號WM酒店地下低層A1號舖
電話：2367 3333