Green Waffle Diner：鑊仔午餐

表哥出開嚟中環，同佢快閃食個晏，揀咗「Green Waffle Diner」， 貪佢地方大，只要搭半山扶手電梯上到去大館個位，落返地面荷李活道，往上環方向行唔夠1分鐘，晌擺花街交界就見到。

講到環境，有好多落地大玻璃，採光十足，整間餐廳以鮮橙襯白，予人應感覺非常醒目，加上擺放好多植物作點綴，樓底又夠高，所以，空間感強。

睇佢明顯喺一間咖啡店或西餐廳，但最估唔到星期五、六竟然會營業到凌晨3:00am，明顯喺想做埋附近雲咸街一帶、蘇豪區一帶嘅酒吧客嚟食個宵夜。

目標就喺試吓佢啲「薯粒鑊仔菜系列」，喺極之邪惡嘅選擇。

牛油果雜菜薯粒鑊仔 $94
雖然表哥揀呢一款又有牛油果、又有雜菜，其實一樣喺唔健康，哈哈！熱焫焫新鮮焗製，裡面有羽衣甘藍、蘑菇、西芹、車厘茄、洋蔥、炸薯粒、溫泉蛋，再晌表面加上車打芝士同牛油果，所以賣相非常吸引，表哥都話唔錯，味道豐富。

烤卡津雞肉薯粒鑊仔 $98
我就要個配烤雞肉嘅，裡面有烤雞肉、西芹、燈籠椒、車厘茄、洋蔥、炸薯粒、溫泉蛋，再晌面頭加上大量車打芝士嚟烤焗，雖然我哋揀細份，其實食起嚟都好夠，味道非常之香口，但都幾「漏」吓。

鮮奶咖啡 $43、菠蘿橙汁 $38
表哥想清爽啲，就揀杯菠蘿汁溝橙汁，酸酸甜甜好清新，當然，明白唔會喺鮮榨啦，但都好濃香；小弟就襯杯鮮奶咖啡，拉花頗靚仔，口感唔錯。

聽到店員同隔離枱啲客講，有VIP卡申請，以後消費有9折，即變相唔使加一；另外，早餐、午餐時段，如果揀過濾咖啡，原來喺可以無限量添飲。兩項嘅優惠，都啱晒附近嘅返工客。

個人評分
味道：8/10
環境：8/10
服務：7/10
抵食：7/10
平均每人消費：HK$155

餐廳資料：
Green Waffle Diner
地址：中環擺花街43號地舖
電話：2887 9991