山區裡的走走趯趯: 小越廚 Le Saigon Cuisine：討人喜「越」

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2023年8月25日星期五

小越廚 Le Saigon Cuisine：討人喜「越」

一向都鐘意支持吓小店，今晚同位家住荃灣嘅好弟兄落到嚟「小越廚」食餐便飯，唔喺講笑，雖然店家位處周圍都有唔少車房、五金嘅享和街，但一樣好夠人氣，我哋都要等10min先有枱。

小店地方唔大，入到去一眼望晒，左邊喺散枱，右邊喺卡位，目測所見全場應該大概廿幾個位左右，整體裝修都有唔少越南特色嘢，例如天花嘅笠帽燈罩，牆上嘅掛畫，以及一啲小手工藝品。

睇店名你以為喺食越南嘢，其實裡面有埋泰式、馬拉嘢。散點餐牌分幾個，包括主食類：如湯河、咖喱飯；特別推介類：有小食、沙律、主菜，總之都喺啲特色菜；仲有飲品餐牌，有港式、泰式、越式飲品。

有一款「二人套餐」，可以任揀兩款粉麵飯或咖喱，指定小食就五款中任揀三款，或者加$50升級另一類較貴價嘅小食，仲包兩杯飲品，冷熱均可，除非你升級轉飲奶昔或滴漏咖啡，成個套餐只賣$208，非常人氣，因為見唔少枱都喺叫呢款套餐。

晌門口排隊時就睇到店家湯底嘅介紹，用上東南亞唔同香料融合製作，所以，我哋都專登揀番湯粉麵作主食。

枱角貼有二維碼，今時今日，唔使多介紹你都知點用啦！

而枱邊仲放有餐具，以及一些調味醬料，如魚露、辣醬……等等，自由取用。

泰式香辣魚餅、蒜香雞翼、泰式酸辣鳳爪（二人套餐）
好神奇，明明喺二人餐，但每款小食就有3件，加上啲主食都大大碗，所以，我覺得女生嚟嘅話 3個人食都夠食。講返3款小食，味道唔錯，魚餅口感爽彈，帶少少辣勁，好有泰式風味；雞翼炸得好香口，食落都唔算油，仲有陣陣蒜香，唯挑剔位喺鹹咗少少；冰涼嘅鳳爪酸酸爽爽，食咗會增加開胃感。

越式三寶湯河

4款湯底中，我哋揀咗胡椒牛骨湯，呢款三寶湯河喺各款湯河中較貴，當然揀佢啦。重點喺「三寶」跟湯河分開上，唔會浸腍餸料，而且，份量仲好多。先試過牛骨湯，果然夠晒香濃，非常有嗰陣陣骨香，而且，散發出陣陣胡椒香氣，卻唔搶喉，啲河粉比廣東嘅幼身啲，但同樣好滑溜；三寶包括香茅豬扒、越式札肉及河內炸春卷，啲豬扒好鬆化，滲出陣陣香茅味，札肉亦都好爽口，一食就知唔會喺溝粉貨色，而春卷好脆口，香而不膩。