盛意小館點心粥麵 Dim Sum Kitchen：「盛」意之作

相信好多香港人都鍾意嘆番一盅兩件，家下多咗好多點心專門店，咁咩時候呢都可以有點心食。最近就喺近尖東呢邊到訪過一間應該開無耐嘅點心專門店「盛意小館」，同一位即將出國兩年做宣教工作嘅老死餞行。

踏進鋪內，地方都幾大吓，鋪位好深，除咗卡位，仲有唔少細圓枱。主調色系以天藍色襯金黃，加上牆上嘅燈飾裝置，天花嘅波燈，感覺令人幾醒神。

枱上有齊基本調味，好鍾意啲餐具，外觀清秀雅致，而眼見侍應都喺啲後生仔女，又幾有禮貌。

張點心紙就喺餐牌，呢度都喺用番傳統嘅剔吓剔吓點心紙形式落單。咪以為呢度淨喺食點心，其實門口嘅招牌都露出少少端倪，再睇睇餐牌，原來選擇非常多元化，有生滾粥、湯粉麵、炒粉飯麵、小炒、燉湯。此外，仲寫住喺米芝蓮星級師傅主理點心，所以，今晚主力就喺食點心，晌度名茶收$5-$10位，視乎你揀咩茶葉，但就全日免加一。

招牌蝦餃皇 $20

雖然叫蝦餃皇，但無預期咁大粒，不過，做得晶瑩，摺紋細緻，咬落外皮軟熟卻唔黏牙，裡面全部都喺鮮蝦，非常之爽彈，甚具蝦嘅鮮甜味，最好就喺可以點兩粒，方便試到多啲嘢。

沙巴鮮蝦燒賣皇 $18
平常我都比較少食燒賣，但見到呢度有別一般嘅豬肉燒賣，喺加入沙巴鮮蝦，咁自然有啲好奇，想試試。比起個蝦餃皇，呢兩粒燒賣認真大粒，鬆化嘅豬肉餡中，堅有原隻鮮蝦，食落口感同味道都升咗另一個層次。

香芒大蝦脆脆卷 $30

小弟一向都鍾意食芒果，所以，就專登揀咗呢個脆脆卷。脆卷炸得金黃，咬落非常之香脆，但唔算好油，裡面有沙律醬、芒果肉同蝦肉，所以食起嚟幾清爽，不過，就唔好期望有好多芒果用蝦肉。

翠綠小梨子鹹水角 $28
再試嘅都係炸嘢，就喺呢個賣相的骰可愛嘅鹹水角，唔使講都知呢個點心嘅賣點喺其小梨子造型，做得好像真，非常有趣。至於味道方面，同平常食嘅鹹水角差唔多，無話有咩好大驚喜，但都喺食得開心嘅。

竹炭黑金360鮮奶包 $32

食點心又點可以少咗包點類呢！最鍾意食就喺叉燒包同奶皇包，不過呢度就無供應，故試咗另一款未食過嘅鮮奶包，因為包身加入竹碳元素，面頭搽咗少少食用金漆，賣相高貴。包身好軟熟，鮮奶好滑溜，有陣陣奶香。題外話，好奇點解叫做360鮮奶包，而唔喺用上更有亮點嘅3.6牛乳包！

香滑馬蹄牛肉腸粉 $27
除咗包點，腸粉又喺點可以錯過呢！幾款腸粉中，以呢個馬蹄牛肉最想試，因為從未食過咁嘅配搭。腸粉皮拉得夠薄夠透，口感滑溜，而內餡就喺免治牛肉加咗少少馬蹄粒，肉味唔算好濃，但加咗爽口嘅馬蹄，口感又幾特別。

椰香蜜糖脆蛋散 $29

最後梗喺甜品時間啦，一口氣試咗兩款甜品，依家蛋散都唔喺間間酒樓會提供，所以呢……都好想食。所謂耶香，就喺灑咗好多椰絲，蛋散幾脆口，有蛋香，沾上蜜糖，夾埋啲椰絲香氣，實在喺好唔錯嘅甜點。

沖繩黑糖年糕伴黃金糕 $28
準確嚟講，點心紙上呢個唔喺擺喺甜品類，但在我嚟講就覺得可以當甜品咁食，黑糖一向喺小弟「飛弗」嘅食材，年糕煎得口感軟糯， 陣陣黑糖 清香味，好食；不過黃金糕煎過之後，脆口又唔算脆口，軟糯又唔算軟糯，感覺做唔到外脆內軟嘅口感，喺咪失手咗呢！

食吓食吓、唔覺唔覺，就食咗8款點心，仲食到我哋好飽。晌度食嘢有個好處，可以慢慢食，慢慢嘆，更可以慢慢傾，兩個中佬講咗好多前塵往事，亦有好多未來展望，在此祝老友兩年嘅異國生活都一切順利。

個人評分
味道：8/10
環境：7/10
服務：8/10
抵食：8/10
平均每人消費：HK$111

餐廳資料：
盛意小館點心粥麵 Dim Sum Kitchen
地址：尖沙咀漆咸道南67-71號安年大廈地舖
電話：6169 9208