綠怡咖啡廳 Greens Café：細嚐咖喱海鮮二人餐．烹煮得「怡」

嚟到「綠怡咖啡廳」又唔一定食自助餐嘅，今晚同舊同學聚聚舊，過嚟一試佢哋嘅「細嚐咖喱」海鮮套餐。其實，絕大部份酒店內做自助餐嘅餐廳，都可以散點叫餐，因為都要照顧到唔食自助餐嘅酒店旅客，不過，就較被忽略。

環境方面，始終呢個場主力都喺做自助餐，所以，格局如大多數西餐廳咁，但難得地方闊落，枱櫈又唔會話排得好密，加上是夜客人唔算多，所以，感覺喺幾舒服悠然。我哋被安排坐晌近窗口位，叫有多少少街景睇吓，感覺又會開揚啲。

而今次所試嘅「細嚐咖喱」海鮮套餐分一人及二人份，以泰式手法配以不同嘅香料及海鮮製作出多款美食。溫馨一提，上述嘅二人套餐所用嘅海鮮都喺新鮮生猛靚貨，故此，需提前1日預訂，以確保貨源高質，就喺呢個亮點吸引我哋。仲有，經官網eshop訂，有9折優惠添。

百香果梳打、班蘭梳打
二人餐本身都包杯特式飲品，我哋對飲品都無特別偏好，所以，就各試一杯。友人就話佢杯百香果梳打好清爽，酸酸香香，襯晒啲咖喱蟹；而小弟所試嘅班蘭梳打，外表喺非常搶眼嘅翡翠綠，啜落真喺幾重班蘭味，又唔會太甜，幾舒服。

柚子蝦沙律

隨特飲一拼送上仲有呢一道經典嘅泰式沙律，除咗泰國金柚、鮮蝦，仲有車厘茄、青瓜絲、提子乾、炸椰子片，賣相做得好靚仔。柚肉拆得大大件、一梳梳，咬落好爆汁，味道清甜，完全無澀味；蝦肉口感彈牙，味道鮮甜， 加上調味上加咗啲辣汁，帶嚟點點刺激感，叫人越食越醒神，不愧為經典。

泰式黃咖喱炒蟹配蒜蓉包
主菜類可以揀炒蟹或者波士頓龍蝦，識食嘅當然揀炒蟹啦，絕對有新鮮游水貨式嘛。甫打開蓋，強勁嘅咖喱香氣一湧而出，睇到大大隻大肉蟹，貨真價實，當夾起隻鉗已經有種先聲奪人嘅感覺，肉蟹鮮甜多汁，蟹味清甜，食得出絕對喺新鮮貨色，沾滿晒充滿香料味嘅黃咖哩，連肉都滲透着陣陣咖喱香，實在非常滋味。

再講多少少個黃咖喱，推得好香，卻唔會好嗆喉、好辣，非常啱我口胃，用嚟配個蒜蓉包，非常搭配。食完晒隻蟹，煲底仲有唔少黃咖喱，真想打包拎走，攞返屋企配公仔麵食。

馬拉盞炒雜菜
馬拉盞炒菜唔使講夠晒惹味啦，馬拉盞就好似我哋啲蝦膏咁，用嚟炒菜真喺好夾，再加埋小小蝦乾碎，自然無得輸。雜菜主要係啲細細棵嘅椰菜仔，咬落去帶點爽口感，又有點鮮嫩，同埋食落好夠鑊氣。

菠蘿炒飯

另一經典泰式美食就喺菠蘿炒飯，原個菠蘿登場當然好睇好多，個炒飯內混有唔少蝦肉、菠蘿粒，以及肉鬆及腰果，比較意外嘅喺仲有唔少臘腸粒，故此，口感非常豐富，我本身都鍾意食臘腸，所以更合口味，再者啲飯粒炒得夠爽身，唔油膩，而且，份量好足。

椰汁西米糕、時令生果
嘩！眼前呢份甜品拼生果唔喺「些牙」嚟食，而喺一人一份架。啲西米糕做得唔錯，清爽有咬口，面頭嘅椰汁滑溜並滿滿椰香。生果有哈密瓜、菠蘿、西瓜，都喺屬於夏天當造嘅多汁水果，再加少少雜莓點綴吓，等今餐飯有個甜蜜嘅結尾。

其實話就話二人餐，但份量個人就覺得3個人都夠食，除非你喺極之大食嘅人。綜合而言，用料確喺高質，尤其隻肉蟹，又大隻，又好肉，超級新鮮；而服務方面，非常熨貼，不時幫忙換碟、收拾、遞上額外濕紙巾……等等，貫徹番酒店級水平，啲侍應態度又好有禮，所以，整體嘅體驗都非常之好，朋友都食得好稱心。

個人評分
味道：9/10
環境：7/10
服務：9/10
抵食：8/10
平均每人消費：HK$465

餐廳資料：
綠怡咖啡廳 Greens Café
地址：北角英皇道665號北角海逸酒店2樓
電話：2185 2155