山區裡的走走趯趯: 喫麵 YumMee：全新「麵」貌

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2022年12月28日星期三

喫麵 YumMee：全新「麵」貌

老婆交完數，專登同佢晌尖沙咀食晏晝飯，原來K11 Musea地庫層有個美食廣場「Food Playground」，真喺唔講唔知，亦無諗過呢個高檔商場內都有個美食廣場，當然，擺得晌度嘅，啲餐廳又會高檔啲啦。先兜一個圈，真喺有好多選擇，最後揀咗主打亞洲各地美食於一身嘅「喫麵」。

先講吓個用餐環境，唔講都唔覺喺美食廣場，昏暗嘅燈光，襯以舒適嘅梳化椅，加上有點配置裝飾，地方又相對寬敞，真喺有錯覺以為喺某家中檔餐廳添。

美食方面，主要分為3大類，就喺湯麵、炒飯麵、小食肢及甜品。每款主食，都附送涼菜三小碟，而飯麵更會送多個餐湯，此外，+$15可配飲品，仲有，就喺可半價追加小食，着數嘢當然唔錯過啦。

而飲品，就晌櫃枱旁，擺晒出嚟，落咗單後就自取。

鋪側有自助落單機，見無乜人，就晌番櫃枱位落單。如大多數美食廣場咁，落好單，就俾部機仔你，一響就可以出去拎。

泰式雞肉串燒 $24（半價）
泰國、馬來西亞嘅串燒都好出名，當然，梗喺要點串串燒嚟試試啦，一客3串，半價咗就更抵食。出嚟嘅質素唔錯，做到有碳火香，啲雞肉亦嫩滑，唔會燒到乾身，最正就喺啲沙嗲醬，濃厚有花生香，夠晒惹味，趁熱食，一流。

泰式白灼魚蛋 $19（半價）

曾經晌大美督嘅「」食過一次泰式魚蛋，知道其實跟港式差唔多，同樣做得爽彈，較大分別喺外型，泰式嗰啲做到成粒欖核咁。不過，呢份白灼魚蛋正就正在啲泰式汁醬，正正喺食泰式鳳爪嗰種，酸酸辣辣，醒胃、刺激。

海鮮喇沙 $98
咁多款亞洲麵食，老婆最心水喺喇沙，其實小弟都好喜歡。碗海鮮喇沙大大碗，用料十足，面面放滿餸料，有青口、海蝦、魷魚、魚蛋、魚片、豆卜，仲有半隻溏心蛋，底下嘅油麵亦都份量十足。先講個湯頭，亦喺食嘢沙嘅精華所在，色澤金黃，濃郁而充滿椰香，微微辣，極富層次，加上夠杰身，好掛麵；啲餸亦好鮮味，海鮮好鮮甜，魚蛋好爽口，隻溏心蛋更喺做得高水準。