雖然話晌「食代館」美食廣場內，但其實都喺獨立一個鋪位經營，所以，裝修都幾「骨子」，更擺放咗好多瓷器、清酒，更具和風感。L形兩邊座位，設有唔少卡位，非常闊落好坐，雖然抽風系統用上抽式，但效果佳，食完唔會一身油煙味。
睇番主餐牌，又其實唔止得燒肉、壽喜燒嘅，仲有沙律、小食、燒物、刺身、壽司、丼飯……等等。而燒肉、壽喜燒可以單點，亦有套餐供應，更可追加食材。飲品方面，除蜜飲、汽水、梳打特飲之外，更有啤酒、清酒以供選擇。
你想慳少少呢，亦有得俾你揀，就喺晚餐，A-K共10款，有唔同嘅丼飯或刺丼，定價$68-$288，包味噌湯，另可以優惠價加配飲品，正所謂豐儉由人。更標明外賣自取免收加一，當然，喺想做多啲外賣生意，此外，出面就喺美食廣場，可以買咗晌出面食，一樣舒舒服服，唔使拎到返屋企先嘆。
我哋嘅攻略就喺點一份燒肉拼盤，再加一份晚餐墊肚，可以用一個加配飲品嘅優惠，再點份小食。正所謂工欲善其事，必先利其器，落好單，就送上圍裙、燒肉夾及蘸汁（燒肉汁同酸汁）。
熱情果菠蘿梳打 +$18（跟晚餐加配） 今晚食嘅嘢都喺味濃，又加上喺燒肉，點都要搵杯冰涼嘅凍飲襯一襯，梳打類中首選喺呢個特飲，貪佢熱情果酸酸咪咪夠清爽，又可以清新一下口腔，裡面仲有啲菠蘿肉食吓，喺嫌得幾片少咗啲啫，哈哈。
荔枝西柚梳打 $32（散點價）老死就揀另一款口味，以荔枝糖漿做嘅梳打，加入西柚果肉，同樣好清爽，配燒肉就啱晒。
香煎和牛餃子 $68 未食燒肉前，先嗌份小食過吓口癮，豬肉餡做嘅餃子就食得多，和牛喎！真喺第一次食，呢個喺店長推介我哋試，一來用上和牛，二來自家每日包製，保證新鮮。的確，煎得外皮很香脆，亦好薄身，咬落去，好爆汁，仲有一份油香感，啲肉亦搓得鬆化，喺跟平常嘅餃子有啲分別。
特上燒肉拼盤 $328今日嘅主角卒之登場，餐牌就標示有320g，包括5款肉：日本A5上州和牛、澳洲M7腰脊心、美國頂級牛小排、美國安格斯西冷及牛舌，每款有4-5件，擺盤非常靚，啲肉嘅色澤又好，每款肉亦附有名牌，唔怕唔知邊款打邊款。仲附有一粒「牛油」（牛脂）俾你起鍋減少黐底。
美國頂級牛小排 牛小排油花睇都睇到唔會好多，主要都喺食佢哋嘅肉味，燒過之後，焫香兩面就已經OK，入口非常軟腍，甚具肉香，又富肉汁，果然喺夠頂級呀。
澳洲M7腰脊心試完美國嘢，跟住試試澳洲貨色，腰脊心就真喺唔多識咩部位，不過，外觀一樣咁靚。食落去，跟牛小排有啲相似，肉味重，沾上酸汁真喺令人回味。
美國安格斯西冷西冷就唔使多介紹，大家食扒時經會食到，西冷薄切少少，口感一流。而入口非常嫩滑，既有肉香，又有油香，改用枱上備有嘅即磨黑椒嚟調和，風味更好。
日本上州A5和牛肩胛重中之重，粉嫩嘅上州和牛華麗登場，睇樣就知啲油花有幾重，並且平均分布。食落唔會話一口油，卻充滿脂香，確喺有少少入口即化嘅感覺，一人兩片，唔太多，啱啱好。
牛舌本身都幾鍾意食牛舌，不時西餐有燴牛脷嘅菜式，都會選上，因為口感、味道都好獨特。厚切嘅牛舌，口感十足，柔韌帶點彈牙，味道則有種牛舌獨有嘅羶香，呢個一定沾燒肉汁啦。
西班牙黑豚叉燒烏冬 $88 食咗咁多燒肉，所以，再晌晚餐度揀咗一款烏冬，一來有個主食墊吓肚，二來食啲濕濕哋嘅嘢，又有啖湯飲，感覺個人無咁乾。
枱旁有壺茶，初時以為只喺熱水，原來喺玄米茶，整體招呼幾好，不時清走已食完嘅碗碟，侍應都好有禮。好難得同老死舒舒服服食餐日式燒肉，大家講到將來，都喺吃喝玩樂咁啦，哈哈！
個人評分
味道：9/10
環境：8/10
服務：8/10
抵食：9/10
平均每人消費：HK$295
味道：9/10
環境：8/10
服務：8/10
抵食：9/10
平均每人消費：HK$295
餐廳資料：
上州一頭和牛 Jyoushu Ittou Wagyu
地址：旺角太子道西193號MOKO新世紀廣場3樓食代館
電話：3751 5589
上州一頭和牛 Jyoushu Ittou Wagyu
地址：旺角太子道西193號MOKO新世紀廣場3樓食代館
電話：3751 5589
沒有留言:
發佈留言