蓮香咖啡：長洲搵食第四站：「蓮」月痕跡

噚晚晌渡假屋瞓得麻麻，啲隔音好差，隔離單位嘅外國人又玩到半夜三更，不過，都照原定計劃，今早早起，晌長洲食埋早餐先走，然後搭橫水渡過坪洲玩多半日。晌市區都越嚟越少大牌檔、冬菇亭，所以，早餐專登嚟到「蓮香」試試。

環境地踎，但對好多香港人嚟講，喺一份情懷，圓摺枱、膠櫈、大牛角扇……等等，好多細細個嘅片段都返晒嚟，甚具年月嘅痕跡。雖然地方簡陋，但都算乾淨企理，我哋又喺一早嚟，客人亦唔多。

餐牌底面兩頁，一面嘢食，一面飲品，唔好當正佢喺時下慣常去嘅茶記，選擇唔算多，定價本來唔算貴，但全部嘢都喺散點，無話早餐、午餐、套餐之類，好多嘢又要另外加錢，所以，夾埋以茶記而言，就會感覺有啲貴，好似我哋兩公婆叫兩碗粉麵，加兩杯熱飲，就已經近一嚿水。

自家製韭菜餃米粉 $29
本來有款心水嘅韭菜餃，仲要喺店家推介，老婆都滿心歡喜，隻隻包得好大粒，塞滿晒餡，睇樣真喺好對辦，不過，咬一口就唔收貨，佢話啲餃質感好粉，照道理自家製應該唔會咁差，但小弟食一粒，又真喺粉得交關，口感絕對好奇怪，喺噚日賣剩雪過嚟都唔應該會喺咁，故此，只好由小弟頂咗去，同佢對換啲餸嚟食。

沙嗲新鮮牛肉公仔麵 $35

本應叫個新鮮牛肉公仔麵只收$29，但要沙嗲就另外加多$6。我碗沙牛麵就好好多，佢哋啲湯本身喺清湯，無乜味，所以，加咗沙嗲真喺香濃好多倍，充滿花生香，而啲新鮮牛肉就好似平時打邊爐時所點嘅新鮮滑牛，肉質好嫩滑，好有肉香，曲身嘅麵條亦無煮過腍，又特別掛汁，掛起啲沙嗲汁，真喺好滋味。

枱上放置咗少少粒基本調味料，當依家講求衛生，都用上一包包嘅糖包，但呢度仲喺好舊式，逐羹逐羹嚟，晌疫情下，自然覺得唔衛生，但環保角度，又變成另一會事，少咗包裝紙，可以半羹或少半羹咁落。

熱奶茶、朱古力 @$17
話晒茶記，揀奶茶喺好自然嘅事，亦喺非常穩膽嘅選擇。奶茶嘅茶色幾靚，深沉有光澤，味道都唔錯，茶底醇香，但口感就覺得未喺好絲滑；反而老婆就讚杯朱古力勁濃郁，應該唔喺朱古力粉沖，而喺用上唂咕，我都試番啖，喺濃郁好多。

餐廳只喺離碼頭兩、三分鐘腳程，所以，睇住時間慢慢食，食完再斯斯然行過去，咁就完成長洲嘅行程。講真，嘢食、嘢飲就無乜驚喜，啲韭菜餃仲唔喺好得，招呼都唔錯，個阿姐都幾好傾，但整體而言，叫試過就算。

個人評分
味道：6/10
環境：7/10
服務：7/10
抵食：6/10
平均每人消費：HK$49

餐廳資料：
蓮香咖啡
地址：長洲大興堤路二號熟食巿場四號檔
電話：2981 7566