德興茶餐廳：茶餐「德」力素

上次同一班朋友行完「大刀屻」之後，落咗粉嶺嘅「名都商場」，試咗「太興」，食物都唔錯，喺定價貴啲啲，座位又逼啲啲。今次近乎原班人馬，行完「八仙嶺」終點自然落返粉嶺，改食返「德興」，其實唔喺特別偏好，只喺大家行到好攰吓，純粹就腳費事周圍再搵。

之前食評講過嘅嘢就唔再重複，總之佢喺茶餐廳之名，快餐店式營運，而下午茶時段照樣多人，不過，好在快餐店嘅客都喺快上快落，轉頭就搵到靠牆四人卡位。不過，講真呢度啲位其實都一樣唔太好坐，比較窄。

門口前就楝咗個下午茶餐牌，一眼睇晒，下午茶餐、公仔麵茶餐、三文治茶餐同粉麵特價餐。

晌門口櫃枱落單，攞住張飛仔去另一邊廚房櫃枱擺低，等叫「冧巴」，朋友初時唔知個做法，反而擺低咗個牌仔，自己揸住張飛，好似平常晌快餐店咁，所以，都出咗啲亂子，而收銀位嘅店主同啲師傅都唔喺好理，由得啲生客亂晒籠。

雲吞米 + 熱檸水 $36
老友A食嘢比較清淡，不過，佢都話有啲肚餓，所以揀咗碗雲吞米。佢話碗米粉特別就唔特別喇，啲雲吞OK啦，裏面都足料有大大隻鮮蝦，而且非常之大碗，好夠份量，食得佢好飽，喺啲湯好似少咗啲啫。

西多士配雞中翼 + 熱華田 $36

老友B就話食份西多都差唔多夠，所以揀咗呢個西多士搭雞中翼，兩隻雞中翼炸得有少少乾，猶幸啲肉都無話嚡晒，但都喺嗰句，唔喺話有咩特別嘢；西多士都喺好似其他茶記咁，中間夾花生醬，但佢話牛油就俾得寒酸啲，而糖膠成樽晌出面拎，自己任斟。

炸雞脾配沙律 + 熱奶茶 $36
上次見老友食炸脾，都幾唔錯，今次都輪到我食返次啦。同上一次唔同，當時炸脾喺淨食，無話配沙律或薯條，但就只收$30，依家就貴6蚊，不過搭多咗沙律或薯條。

揀咗沙律嚟平衡隻炸脾，減低啲罪惡感，好港式嘅薯仔雜果沙律，裝到好大碗，滿一滿成碗飯咁，哈哈！睇樣你都知又喺無咩特別啦，罐頭雜果貨色，食嘅都喺一份懷舊港味。

隻炸髀就堅大隻，大過我隻手掌有多。首先就喺無炸燶，而且，炸得皮脆甘香，唔會好油膩，脾肉又夠嫩滑，比預期好。最怕就係炸到又燶又乾又嚡，呢隻脾絕對合格有餘。

熱奶茶

仲記得上次嚟飲嘅奶茶喺唔錯嘅，加上喺茶記揀熱奶茶喺非常穩陣之選。奶茶色深有光澤，入口茶底醇厚芳香之餘，口感亦算幼滑。鍾意佢哋用番傳統茶記厚身瓦杯，保溫力強，更喺一種情懷。

有時食嘢就喺咁，揀啱嘢食感覺會好好多，上次嘅菠蘿油唔得，今次嘅炸脾好啱食，食個下午茶，雖然體力唔會即刻返晒嚟，話晒行咗6粒鐘，12公里上山落山，但算喺心靈滿嘅最佳「得力素」。

個人評分
味道：7/10
環境：6/10
服務：5/10
抵食：8/10
平均每人消費：HK$36

餐廳資料：
德興茶餐廳
地址：粉嶺粉嶺車站路18號粉嶺名都商場3樓26-28號舖
電話：2682 0813