Miam Bakery：「焙」着你走

晌西營盤嘅「SEOI」食完下午茶，都打算閃人，但記得以前同事請我食過鬆餅，就喺出自附近嘅麵包小店「Miam」，查一查位置，就晌上一條街，所以，順道睇睇有無啱食嘅麵包。

因為又喺閒日，又喺下午，所以，客人就正正得我一個。從門口已睇得見，小店一間，前鋪後工場，所以，一踏入店內，一室香氣，睇住幾個師傅晌裡面密密做，故此，啲麵包又點會唔新鮮吖。

因為時近聖誕，店內都多添咗啲聖誕佈置，當然，烘焙產品中就唔少得薑餅人先生啦！

由於食完個下午茶先過嚟，嚟到都近5:00pm，所以，睇睇玻璃櫃內，得番半個櫃嘅烘焙產品，都喺一啲歐陸款式嘅包點、餡批、牛角酥、磅蛋糕之類。當注目諗緊要咩時，店員話稍後仲有啲出爐貨，實際唔止餅櫃咁少，只喺未擺晒出嚟，的確又喺，透個玻璃門望入去，餅房嘅層架仲有好多麵包。佢哋喺不斷少量製作，務求出品新鮮。

麵包、餡批，就梗喺搵杯咖啡嚟襯啦，所以，佢哋仲會供應多款咖啡，以及一啲特飲，而且，睇見後面啲器材，相信咖啡嘅製作都喺唔馬虎。

最後選咗兩款包，以簡單嘅紙袋袋起，仲搵張聖誕貼紙封番個袋口，而裡面，更以紙張分隔開兩款包，非常細心。

玉桂卷 $27

上次同事請我食嘅喺鬆餅，而從店家嘅食評中，知道其「玉桂卷」甚有口碑，咁呢一次親身嚟到，點都要試番次嘅。嘩！唔喺講笑，啲玉桂漿多到不得了，直頸逼晒出嚟，所以，晌屋企以多士焗爐稍微翻熱，啲玉桂香已好澎湃，咬落個包好有口感，煙韌有嚼勁，唔會得陣風咁，而玉桂味好濃郁，每一口都食到玉桂味，少少偏甜，不過，襯番杯咖啡就恰到好處。

朱古力丹麥酥 $26
牛角包、丹麥酥呢一類烘焙產品，就好考師傅手勢，所以，另一款包就試試其朱古力丹麥酥。賣相就夠晒靚仔喇，烘得金黃，打側一望，就見到啲酥皮一層層，一口咬落去，面層咔嚓應聲裂開，層酥皮真喺堅香脆，並充滿牛油香，而裡面捲住唔少朱古力餡漿，軟滑濃郁，同樣襯咖啡真喺一流。

玉桂卷果然喺店家嘅招牌之作，不過，丹麥酥嘅質素都唔輸蝕，今次真好，所食到嘅兩款都喺高質嘅出品。

個人評分
味道：9/10
環境：7/10
服務：8/10
抵食：8/10
平均每人消費：HK$26

餐廳資料：
Miam Bakery
地址：西環西營盤第三街73號興華樓地舖
電話：5592 5507