龍媽媽糕點 Mama Long Pastry：「糕」手在民間

早前睇過啲飲食雜誌嘅報道，先知呢間賣傳統中式糕點嘅「龍媽媽」原來製作喺咁有誠意，所以，今日襯出開嚟佐敦一帶都有少少專誠過到嚟幫襯下，買啲糕點返去當飯後甜品，加上老婆本身都鍾意食呢一類中式糕點。

門口放咗兩組凍櫃，所有出品一眼睇晒，左邊矮身凍櫃放晒所有糕點，右邊高身凍櫃就放咗一啲滋潤養身飲品，睇起嚟都幾特別，不過，今次就試試店家嘅糕點先。不得不講，無論糕點，還是飲品，都放得整齊。

再細看啲糕點，唔單止款式多，而且，有啲可以講喺坊間少見，重點喺真材實料製作，並非工場交貨嘛！定價$20 / 3件，最正喺可以任搭，咁就可以一次過試到多款唔同口味。

晌等候期間，又無意中睇到鋪內一角，果然嚴選優質材料嚟製作，更標明每日新鮮製造。

左度右度，買咗6件心水嘅返去試試。件件糕點都大片又厚身，而拎起嚟都好墜手，感覺份量十足無欺場。

紅棗糕

紅棗糕夠養顏， 揀嚟畀老婆試，聞落就唔喺好特別，但食落就確喺好有紅棗嘅清甜味，口感軟軟糯糯，糕身算喺幾挺身，裡面仲有少少紅棗肉。

椰汁桂花糕
兩層桂花糕夾一層椰汁糕，所以，賣相好睇，桂花都睇得出落唔少，所以，桂花糕部份好有自然嘅桂花香氣，淡雅清幽，糕身亦好有彈性；而椰汁糕部份，椰香十足，兩者估唔到都以夾。

黑糖薑汁糕
色澤最深沉嘅一款糕點，但絕對喺「有料」之糕，咬落糕身比較煙韌，味道方面，先有陣陣黑糖香氣，但嗒落去，薑汁嘅味道強勢滲出嚟，更感受到嗰份辛辣之勁，冬天食呢款糕，實有禦寒之效。

綠豆糕
咁多款糕品中，以綠豆糕相對平淡少少，不過，你睇見糕身平均填滿綠豆，同樣喺用料無欺場。其實，食味都唔錯，有淡淡綠豆香，只不過，喺無咁特別而已。

紅豆糕

老婆一向對紅豆情有獨鍾，所以，晌眾多糕品之中，就幾鍾意食紅豆糕。呢一件紅豆糕，質素都唔錯，裏面嘅紅豆大大粒、好飽滿，清甜味十足，又唔會太甜。

椰汁斑蘭千層糕
雜誌特別講到佢哋喺用新鮮斑蘭葉榨汁，所以，點都揀一款有斑蘭元素嘅糕點。呢件千層糕，綠白相間足有9層，絕對喺心機嘢，而淡淡綠色絕對唔喺人造色素，原汁原味以斑蘭汁去做，故入口確有有陣陣斑蘭清香，質地煙韌有彈性，配以椰汁糕，極具東南亞風，好睇又好食。

先後分享咗6款糕點，可謂各有特色，果真用料十足，平均算為$7件，呢個價實在喺抵食。仲有，糕點都喺當日做當日賣，食過之後，每一件都都食得出喺新鮮貨，唔會話放耐咗有啲部分就會變硬嘅感覺，真喺好夠誠意。

個人評分
味道：9/10
環境：7/10
服務：8/10
抵食：9/10
平均每人消費：HK$20

餐廳資料：
龍媽媽糕點 Mama Long Pastry
地址：佐敦偉晴街81-87號翡翠閣地下H號舖
電話： 9568 5108