傅記茶餐廳 Fu Kee Restaurant：未分勝「傅」

嚟親深井食嘢，都喺因為行山，上年年中就同個舊同學行「元荃古道」，由荃灣行到嚟深井，再食個下午茶。今次有朋友提議由小弟帶隊行多次，當然今次就舒服好多，感覺清爽涼快 同樣都喺深井為終點，又喺落番「傅記」食下午茶。

環境就唔多介紹喇，因為上次食評都有講 ，但由於呢次天氣比較舒服，我哋就唔需要坐入裡面「冷氣房」，而喺坐晌出面嘅「帳篷區」，不過，感覺比較污糟，尤其帳篷邊下面，好多垃圾、煙頭、口罩。

唔似入面，餐具放晒晌枱側嘅抽櫃，出面嘅，基本嘅調味料、紙巾、餐具就放晒晌枱面，自由取用。

呢度嘅下午茶好早就開始，1:30pm就有得嗌，所以，可以午餐時間嚟食都得。下午茶種類有好多選擇，上次就試咗脆脆豬仔包餐，今次就選上燒味湯瀨粉餐，咪睇佢喺一間茶餐廳，其實隔離鋪又喺佢哋：傅記燒味海鮮飯店，所以燒味一環亦都有保證，至少唔喺街外來貨，由自己鋪「直送」。

燒鵝瀨 + 熱檸水 $47
我同老婆各揀一款燒味瀨粉，咁就變相成為雙拼，先講講燒鵝瀨，燒鵝嘅份量算喺俾得唔少，而燒鵝食落都幾香口，外皮帶點焦脆，鵝肉都好嫩滑，並且充滿油香，真心覺得唔錯；老婆慣例飲熱檸水，就話可以消消油膩感喎。

叉燒瀨 + 熱奶茶 $43

另一個喺叉燒瀨，啲叉燒燒得幾靚仔，仲有唔少燶邊位，咬落肉質算鬆化，最緊要無乜肥膏，同樣叉燒嘅分量都好足，此外，瀨粉份量亦唔少，食晒成碗瀨粉真喺幾夠飽；而杯奶茶同上次飲落嘅感覺差唔多，唔叫好好，亦唔差，不過不失咁啦。

以前食下午茶餐，都喺講緊廿零蚊，而家就無呢支歌仔唱，而且，有啲茶餐份量直頭可以當正餐，提供好多炒粉飯麵、湯粉麵之類一堆飽肚嘢。今次所食嘅兩款燒味嘢，都好唔錯，喺環境嘅感覺差少少啫！

個人評分
味道：8/10
環境：6/10
服務：6/10
抵食：8/10
平均每人消費：HK$45

餐廳資料：
傅記茶餐廳 Fu Kee Restaurant
地址：深井深井村路56號地下
電話：2491 8002